ҚОНУНИ
ҶУМҲУРИИ ТОҶИКИСТОН
ДАР БОРАИ КОМИССИЯИ МАРКАЗИИ ИНТИХОБОТ ВА РАЪЙПУРСИИ ҶУМҲУРИИ ТОҶИКИСТОН

Қонуни мазкур асосҳои ҳуқуқӣ ва ташкилии фаъолияти Комиссияи марказии интихобот ва раъйпурсии Ҷумҳурии Тоҷикистонро муайян менамояд.

БОБИ 1. МУҚАРРАРОТИ УМУМӢ

Моддаи 1. Комиссияи марказии интихобот ва раъйпурсии Ҷумҳурии Тоҷикистон

1. Комиссияи марказии интихобот ва раъйпурсии Ҷумҳурии Тоҷикистон (минбаъд – Комиссия) мақоми давлатии Ҷумҳурии Тоҷикистон буда, интихоботи Президенти Ҷумҳурии Тоҷикистон, аъзои Маҷлиси миллӣ, вакилони Маҷлиси намояндагони Маҷлиси Олии Ҷумҳурии Тоҷикистон ва раъйпурсии умумихалқиро ташкил мекунад ва мегузаронад, ба низоми комиссияҳои интихоботӣ роҳбарӣ мекунад, инчунин ташкил ва гузаронидани интихоботи вакилон ба Маҷлисҳои маҳаллии вакилони халқ ва Ҷамоатро назорат карда, риоя ва татбиқи якхелаи қонунгузории Ҷумҳурии Тоҷикистон дар бораи интихобот ва раъйпурсиро таъмин менамояд. 
2. Комиссия мақоми дастаҷамъӣ буда, ҳангоми амалӣ намудани ваколатҳои худ мустақил мебошад, ба мақомоти ҳокимияти давлатӣ, мақомоти худидоракунии шаҳрак ва деҳот ва шахсони мансабдор ҳисоботдиҳанда намебошад.
3. Комиссия шахси ҳуқуқӣ буда, дорои суратҳисоб ва ҳисобҳои дигар, муҳру бланкҳо бо ифодаи номи худ ва тасвири Нишони давлатии Ҷумҳурии Тоҷикистон мебошад. 

Моддаи 2. Қонунгузории Ҷумҳурии Тоҷикистон дар бораи Комиссияи марказии интихобот ва раъйпурсӣ 

Қонунгузории Ҷумҳурии Тоҷикистон дар бораи Комиссияи марказии интихобот ва раъйпурсӣ ба Конститутсияи Ҷумҳурии Тоҷикистон асос ёфта, аз Қонуни мазкур ва дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалие, ки Тоҷикистон онҳоро эътироф намудааст, иборат мебошад.

Моддаи 3. Принсипҳои фаъолияти Комиссия 

Комиссия дар фаъолияти худ принсипҳои демократии низоми интихобот ва раъйпурсиро амалӣ намуда, барои изҳори озодонаи иродаи интихобкунандагон ва раъйдиҳандагон шароити мусоид фароҳам меорад. 

Моддаи 4. Ошкорбаёнӣ дар фаъолияти Комиссия 

1. Комиссия фаъолияти худро ба таври шаффоф амалӣ менамояд. Ҷаласаҳои Комиссия ошкоро гузаронида шуда, барои аҳли ҷомеа ва воситаҳои ахбори омма дастрас мебошанд.
2. Комиссия дар бораи ҳайат ва қароргоҳи худ, ҷаласаҳо ва қарорҳои дар онҳо қабулгардида, инчунин чорабиниҳое, ки мегузаронад, дар воситаҳои ахбори омма иттилоъ медиҳад.

Моддаи 5. Макони ҷойгиршавии Комиссия

1. Макони  ҷойгиршавии  Комиссия  пойтахти  Ҷумҳурии Тоҷикистон - шаҳри Душанбе мебошад.
2. Дар бинои Комиссия Парчами давлатии Ҷумҳурии Тоҷикистон афрохта мешавад.

БОБИ 2. ТАРТИБИ ТАЪСИС ВА ҲАЙАТИ КОМИССИЯ

Моддаи 6. Тартиби таъсис ва ҳайати Комиссия 

1. Комиссия дар ҳайати 7 нафар аъзо, аз ҷумла раис, муовин ва 5 нафар аъзо бо пешниҳоди Президенти Ҷумҳурии Тоҷикистон аз ҷониби Маҷлиси намояндагони Маҷлиси Олии Ҷумҳурии Тоҷикистон интихоб карда мешавад.
2. Котиби Комиссия аз ҳисоби аъзои он дар ҷаласаи Комиссия интихоб карда мешавад.
3. Узви Комиссия чун қоида бояд дорои таҳсилоти олии ҳуқуқшиносӣ ё сиёсатшиносӣ бошад.

Моддаи 7. Муҳлати ваколати узви Комиссия 

Муҳлати ваколати узви Комиссия 7 сол мебошад.

Моддаи 8. Узвият дар Комиссия 

1. Узви Комиссия шахсе интихоб шуда метавонад, ки танҳо шаҳрвандии Ҷумҳурии Тоҷикистонро дошта бошад, синни ӯ аз 30 кам набуда, дорои таҳсилоти олӣ бошад, дар ҳудуди Ҷумҳурии Тоҷикистон 5 соли охир истиқомати доимӣ дошта, забони давлатиро донад. 
2. Шаҳрвандони зерин ба ҳайати Комиссия интихоб шуда наметавонанд:

- номзадҳо ба мансаби Президенти Ҷумҳурии Тоҷикистон;

- номзадҳо ба узви Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикистон;

- номзадҳо ба вакили Маҷлисҳои маҳаллии вакилони халқ ва Ҷамоат;

- узви Маҷлиси миллии Маҷлиси Олии Ҷумҳурии Тоҷикистон;

- вакили Маҷлисҳои маҳаллии вакилони халқ ва Ҷамоат;

- узви ҳизби сиёсӣ;

- шахсони боэътимоди номзадҳо ба мансаби Президенти Ҷумҳурии Тоҷикистон, ба узви Маҷлиси миллӣ, ба вакилии Маҷлиси намояндагони Маҷлиси Олии Ҷумҳурии Тоҷикистон ва ба вакилии Маҷлисҳои маҳаллии вакилони халқ;

- шаҳрвандоне, ки суд қобилияти амали онҳоро маҳдуд ё онҳоро ғайри қобили амал эътироф кардааст;

- ходимони касбии иттиҳодияҳои динӣ;

- шаҳрвандоне, ки барои ҷиноятҳои аз беэҳтиётӣ содиркардаашон доғи судӣ доранд, инчунин шаҳрвандоне, ки барои содир кардани ҷиноятҳои қасдона маҳкум шудаанд ё дар асоси моддаи 32 Кодекси мурофиавии ҷиноятии Ҷумҳурии Тоҷикистон барои содир намудани ҷиноятҳои вазнин ва махсусан вазнин аз ҷавобгарии ҷиноятӣ озод шудаанд;

- нафақагири давлати хориҷӣ. 

3. Шаҳрванде, ки узви ҳизби сиёсӣ мебошад, дар ҳолате номзад ба аъзои Комиссия пешниҳод мегардад, ки бо тартиби муқарраргардида узвияташро дар ҳизби сиёсӣ қатъ намуда бошад.

БОБИ 3. ВАЗЪИ ҲУҚУҚИИ КОМИССИЯ, РАИС, МУОВИН, КОТИБ ВА УЗВИ КОМИССИЯ

Моддаи 9. Ваколатҳои Комиссия 

Комиссия дорои ваколатҳои зерин мебошад:

- интихоботи Президенти Ҷумҳурии Тоҷикистон, аъзои Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон ва раъйпурсии умумихалқиро бо тартиби муқаррарнамудаи қонунгузории Ҷумҳурии Тоҷикистон ташкил ва мегузаронад;

- ба низоми комиссияҳои интихоботӣ роҳбарӣ мекунад; 

- ташкил ва гузаронидани интихоботи вакилон ба Маҷлисҳои маҳаллии вакилони халқ ва Ҷамоатро назорат мекунад;

- ҳуқуқи шаҳрвандони Ҷумҳурии Тоҷикистонро оид ба интихобот ва раъйпурсӣ таъмин менамояд;

- риояи принсипҳои раванди интихобот ва раъйпурсиро, ки тибқи Конститутсияи Ҷумҳурии Тоҷикистон ва қонунгузории Ҷумҳурии Тоҷикистон муқаррар гардидаанд, таъмин менамояд;

- татбиқи якхелаи қонунгузории Ҷумҳурии Тоҷикистон дар бораи интихобот ва раъйпурсиро дар ҳудуди Ҷумҳурии Тоҷикистон назорат мекунад;

- шакли бюллетенҳои овоздиҳии интихобот ва раъйпурсиро муқаррар менамояд;

- дар доираи ваколатҳои худ барои татбиқи дуруст ва якхелаи қонунгузории Ҷумҳурии Тоҷикистон дар бораи интихобот ва раъйпурсӣ дастур ва тавзеҳоти ҳатмӣ қабул мекунад;

- мушоҳидони байналмилалиро аз давлатҳои хориҷӣ ва созмонҳои байналмилалӣ мутобиқи қонунгузории Ҷумҳурии Тоҷикистон аккредитатсия менамояд ва ба онҳо шаҳодатномаи шакли муқарраршударо месупорад;

- барои аъзои комиссияҳои интихоботӣ ва комиссияҳои раъйпурсӣ конференсияҳо, семинарҳо ва машғулиятҳои омӯзишӣ ташкил мекунад;

- дар ҳамкорӣ бо вазорату идораҳо ва мақомоти иҷроияи маҳаллии ҳокимияти давлатӣ барои ташкил ва гузаронидани интихобот ва раъйпурсӣ чорабиниҳои дахлдорро мегузаронад;

- барои баланд бардоштани маърифати ҳуқуқии интихобкунандагон, раъйдиҳандагон ва иштирокчиёни дигари маъракаҳои интихоботӣ ва раъйпурсӣ чорабиниҳои зарурӣ ташкил менамояд;

- натиҷаҳои интихобот ва раъйпурсиро ҷамъбаст ва онҳоро эълон мекунад;

- ваколатҳои дигарро, ки қонунҳои конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон», «Дар бораи интихоботи Маҷлиси Олии Ҷумҳурии Тоҷикистон», «Дар бораи раъйпурсии Ҷумҳурии Тоҷикистон», «Дар бораи интихоботи вакилон ба Маҷлисҳои маҳаллии вакилони халқ», Қонуни мазкур ва дигар санадҳои меъёрии ҳуқуқии Ҷумҳурии Тоҷикистон пешбинӣ намудаанд, амалӣ менамояд. 

Моддаи 10. Ваколатҳои раиси Комиссия 

1. Раиси Комиссия дорои ваколатҳои зерин мебошад:

- ба фаъолияти Комиссия ва дастгоҳи он роҳбарӣ менамояд;

- ҷаласаҳои Комиссияро даъват менамояд ва дар онҳо раисӣ мекунад, рӯзномаи ҷаласаро барои баррасӣ ва тасдиқи Комиссия пешниҳод менамояд;

- ба қарорҳо ва протоколҳои Комиссия имзо мегузорад;

- иҷрои қарорҳои қабулкардаи Комиссияро назорат менамояд;

- ба муовини раис ва аъзои Комиссия супоришҳои хаттӣ ва шифоҳӣ медиҳад;

- баррасии муроҷиатҳои шаҳрвандон ва шахсони ҳуқуқиро, ки ба Комиссия ворид мегарданд, таъмин менамояд;

- намояндагони мақомоти ҳокимияти давлатӣ, ҳизбҳои сиёсӣ, иттиҳодияҳои ҷамъиятӣ, корхонаҳо, муассисаҳо, ташкилотҳои дигар ва шахсони алоҳидаро барои иштирок кардан дар ҷаласаҳои Комиссия даъват менамояд;

- Комиссияро дар муносибатҳо бо мақомоти ҳокимияти давлатӣ, мақомоти худидоракунии шаҳрак ва деҳот, ҳизбҳои сиёсӣ, иттиҳодияҳои ҷамъиятӣ, корхонаҳо, муассисаҳо ва ташкилотҳои дигар, шахсони мансабдор, созмонҳои байналмилалӣ ва давлатҳои хориҷӣ намояндагӣ мекунад;

- кормандони дастгоҳи Комиссияро ба вазифа таъйин ва аз вазифа озод менамояд;

- ваколатҳои дигарро, ки Қонуни мазкур ва дигар санадҳои меъёрии ҳуқуқии Ҷумҳурии Тоҷикистон пешбинӣ кардаанд, амалӣ менамояд.

2. Раиси Комиссия дар доираи ваколатҳои худ оид ба масъалаҳои фаъолияти Комиссия ва дастгоҳи он фармоиш ва амрҳо қабул менамояд.
3. Дар ҳолати ваколатҳояшро амалӣ карда натавонистани раиси Комиссия ё холӣ будани вазифаи раис ваколатҳои раисро муовини раиси Комиссия амалӣ менамояд. 

Моддаи 11. Ваколатҳои муовини раиси Комиссия 

1. Муовини раиси Комиссия дорои ваколатҳои зерин мебошад:

- уҳдадориҳои алоҳидаро, ки аз ваколатҳои Комиссия бармеоянд, иҷро менамояд;

- иҷрои дастуру супоришҳои раисро дар доираи ваколатҳои худ таъмин мекунад;

- ваколатҳои дигарро, ки Қонуни мазкур ва дигар санадҳои меъёрии ҳуқуқии Ҷумҳурии Тоҷикистон пешбинӣ кардаанд, амалӣ менамояд.

2. Дар ҳолати ваколатҳояшро амалӣ карда натавонистани муовини раиси Комиссия ё холӣ будани вазифаи муовини раис ваколатҳои ӯро котиби Комиссия амалӣ менамояд.

Моддаи 12. Ваколатҳои котиби Комиссия 

Котиби Комиссия дорои ваколатҳои зерин мебошад:

- корҳои омодагиро ба ҷаласаҳои Комиссия анҷом медиҳад ва аъзои Комиссияро бо маводи баррасишаванда таъмин мекунад;

- протоколҳои ҷаласаҳои Комиссияро тартиб медиҳад ва ба онҳо имзо мегузорад;

- супоришҳои раиси Комиссияро иҷро мекунад;

- роҳбари дастгоҳи Комиссия мебошад;

- ваколатҳои дигарро, ки Қонуни мазкур ва дигар санадҳои меъёрии ҳуқуқии Ҷумҳурии Тоҷикистон пешбинӣ кардаанд, амалӣ менамояд. 

Моддаи 13. Ҳуқуқу уҳдадориҳои узви Комиссия 

1. Узви Комиссия дорои ҳуқуқу уҳдадориҳои зерин мебошад:

- ба рӯзномаи ҷаласаи Комиссия таклиф пешниҳод намояд, вобаста ба масъалаҳои баррасишаванда фикру ақидаҳои худро изҳор намуда, дар музокираҳо иштирок кунад;

- дар ҷаласаҳои Комиссия иштирок намуда, дар қабули қарорҳо беғаразона овоз диҳад;

- дар таҳияи санадҳои меъёрии ҳуқуқӣ ва санадҳои дигар вобаста ба ташкил ва гузаронидани интихобот ва раъйпурсӣ, инчунин масъалаҳои дигаре, ки ба ваколати Комиссия дохиланд, иштирок намояд;

- аз рӯи тақсимот вазифаҳои гузошташударо иҷро намояд;

- супоришҳои Комиссия, раис ва муовини раисро оид ба назорати кори комиссияҳои интихоботӣ ва комиссияҳои раъйпурсӣ иҷро намояд;

- бо супориши Комиссия ва раиси Комиссия муроҷиатҳоро баррасӣ намуда, аз натиҷаи он ба Комиссия гузориш диҳад;

- ваколатҳои дигарро, ки Қонуни мазкур ва дигар санадҳои меъёрии ҳуқуқии Ҷумҳурии Тоҷикистон пешбинӣ кардаанд, амалӣ намояд.

2. Узви Комиссия ҳуқуқ надорад дар ташвиқу тарғиби пешазинтихоботии номзадҳои бақайдгирифташуда ва дар раъйпурсӣ вобаста ба масъалаи гузошташуда иштирок намояд.

Моддаи 14. Фаъолияти меҳнатии узви Комиссия 

1. Раис, муовини раис ва аъзои Комиссия мансаби давлатии ҳокимияти давлатии Ҷумҳурии Тоҷикистон мебошанд. 
2. Раис, муовини раис ва аъзои Комиссия дар асоси касбӣ ва доимӣ фаъолият менамоянд. Онҳо, ба истиснои фаъолияти илмиву эҷодӣ ва омӯзгорӣ, наметавонанд вазифаи дигареро ишғол кунанд ва бо соҳибкорӣ машғул шаванд. 
3. Музди меҳнати раис, муовини раис ва аъзои Комиссия аз ҷониби Президенти Ҷумҳурии Тоҷикистон муқаррар карда мешавад.
4. Ба раис, муовини раис ва аъзои Комиссия тибқи қонунгузории Ҷумҳурии Тоҷикистон ба муҳлати 45 рӯзи тақвимӣ рухсатии меҳнатии ҳарсолаи пардохтшаванда дода мешавад.
5. Нафақаи раис, муовини раис ва аъзои Комиссия бо тартиби муқаррарнамудаи қонунгузории Ҷумҳурии Тоҷикистон таъмин карда мешавад.
6. Кафолатҳои моддӣ ва иҷтимоии раис, муовини раис ва аъзои Комиссия, таъминот ва хизматрасонии тиббию иҷтимоии онҳо бо тартиби муқаррарнамудаи қонунгузории Ҷумҳурии Тоҷикистон сурат мегирад. 

Моддаи 15. Бозхонди раис, муовини раис ва аъзои Комиссия

1. Раис, муовини раис ва аъзои Комиссия дар асоси пешниҳоди Президенти Ҷумҳурии Тоҷикистон аз ҷониби Маҷлиси намояндагони Маҷлиси Олии Ҷумҳурии Тоҷикистон бозхонд карда мешаванд.
2. Раис, муовини раис ва аъзои Комиссия бо асосҳои зерин пеш аз муҳлат бозхонд карда мешаванд:

- ариза дар бораи бо хоҳиши худ даст кашидан аз узвият;

- қатъ гаштани шаҳрвандии Ҷумҳурии Тоҷикистон;

- соҳиб шудан ба шаҳрвандии давлати дигар;

- барои истиқомати доимӣ аз ҳудуди Ҷумҳурии Тоҷикистон баромадан;

- мувофиқат накардан ба талаботи моддаи 8 Қонуни мазкур;

- эътибори қонунӣ пайдо кардани ҳукми айбдоркунандаи суд нисбати  ӯ;

- бо қарори суд бедарак ғоибшуда ё фавтида эълон гардидани ӯ;

- бе сабабҳои узрнок иштирок накардан дар ҷаласаҳои Комиссия;

- иштирок кардан дар тарғибу ташвиқи пешазинтихоботии номзадҳои бақайдгирифташуда ва масъалаи дар раъйпурсӣ гузошташуда, инчунин ошкор гардидани ғаразнокии ӯ дар масъалаҳои баррасишаванда;

- бо сабаби  вазъи саломатӣ ё сабабҳои дигари узрнок муддати дуру дароз (на камтар аз чор моҳ пай дар пай) уҳдадориҳои худро иҷро накардани ӯ;

- риоя накардани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон»;

- бо сабаби ба кори дигар гузаштан;

- дар ҳолати вафоти ӯ.

3. Ҳангоми ба вуҷуд омадани асосҳои дар қисми 2 моддаи мазкур пешбинишуда, то баррасии масъалаи пеш аз муҳлат бозхонд намудани раис, муовини раис ва аъзои Комиссия ваколатҳои онҳо бо қарори Комиссия боз дошта мешаванд.

БОБИ 4. ТАШКИЛИ ФАЪОЛИЯТИ КОМИССИЯ

Моддаи 16. Ташкили фаъолияти Комиссия 

Фаъолияти Комиссия тибқи Қонуни мазкур, санадҳои дигари қонунгузории Ҷумҳурии Тоҷикистон, Дастури Комиссия, инчунин санадҳое, ки Комиссия қабул кардааст, ташкил карда мешавад.

Моддаи 17. Шакли фаъолияти Комиссия 

1. Фаъолияти Комиссия дар шакли ҷаласаҳо сурат мегирад. Дар ҷаласаҳо масъалаҳое, ки ба ваколати Комиссия дохиланд, мавриди баррасӣ қарор дода мешаванд.
2. Ҷаласаҳои Комиссия аз рӯи зарурат ва дар давраи интихобот ва раъйпурсӣ на камтар аз як маротиба дар як моҳ гузаронида мешаванд. 
3. Ҷаласаҳои Комиссия дар сурати ҳузур доштани на камтар аз се ду ҳиссаи аъзои Комиссия баргузор мегарданд.

Моддаи 18. Қарорҳои Комиссия 

1. Комиссия аз рӯи натиҷаи баррасии масъалаҳо қарор қабул намуда, иҷрои онро назорат мекунад. 
2. Қарори Комиссия бо овоздиҳии ошкоро ва тарафдории аз нисф зиёди аъзои Комиссия қабул карда мешавад. Дар сурати баробар будани овозҳо, овози раисикунандаи ҷаласа ҳалкунанда мебошад. 

Моддаи 19. Иҷрои қарорҳои Комиссия 

1. Иҷрои қарорҳои Комиссия, ки дар доираи ваколаташ қабул шудаанд, барои мақомоти давлатӣ, мақомоти худидоракунии шаҳрак ва деҳот, ҳизбҳои сиёсӣ, иттиҳодияҳои ҷамъиятӣ, корхонаҳо, муассисаҳо, ташкилотҳои дигар ва шахсони мансабдор, номзадҳо, интихобкунандагон, ҳамчунин барои ҳамаи комиссияҳои интихобот ва раъйпурсӣ ҳатмӣ мебошанд. 
2. Нисбат ба қарори Комиссия бо тартиби муқарраргардида ба Суди Олии Ҷумҳурии Тоҷикистон дар давоми даҳ рӯзи баъди қабули он шикоят кардан мумкин аст.
3. Комиссия ҳуқуқ дорад, ки доир ба масъалаҳои тайёрӣ ва гузаронидани интихобот ва раъйпурсӣ ба мақомоти давлатӣ, мақомоти худидоракунии шаҳрак ва деҳот, ҳизбҳои сиёсӣ, иттиҳодияҳои ҷамъиятӣ, корхонаҳо, муассисаҳо, ташкилотҳои дигар, шахсони мансабдор муроҷиат кунад ва онҳо уҳдадоранд, ки онро баррасӣ карда, ба Комиссия дар муҳлати на дертар аз се рӯз ҷавоб диҳанд.

Моддаи 20. Тартиби пешниҳоди муроҷиатҳо ба Комиссия 

Шаҳрвандон ва шахсони ҳуқуқии Ҷумҳурии Тоҷикистон ҳуқуқ доранд ба Комиссия аз рӯи масъалаҳои ба ваколатҳои он дахлдошта муроҷиат намоянд. Муроҷиатҳо бо тартиби муқаррарнамудаи Қонуни мазкур, санадҳои қонунгузорӣ дар бораи интихобот ва раъйпурсӣ, инчунин дигар санадҳои меъёрии ҳуқуқии Ҷумҳурии Тоҷикистон  баррасӣ карда мешаванд.

Моддаи 21. Уҳдадориҳои вазорату идораҳои Ҷумҳурии Тоҷикистон дар ташкил ва баргузории интихобот ва раъйпурсӣ

Вазорату идораҳои Ҷумҳурии Тоҷикистон уҳдадоранд дар ташкил ва баргузории интихобот ва раъйпурсӣ тибқи қонунгузории Ҷумҳурии Тоҷикистон ба Комиссия мусоидат намоянд.

Моддаи 22. Уҳдадориҳои мақомоти иҷроияи маҳаллии ҳокимияти давлатӣ дар ташкил ва баргузории интихобот ва раъйпурсӣ 

Мақомоти иҷроияи маҳаллии ҳокимияти давлатӣ дар ташкил ва баргузории интихобот ва раъйпурсӣ уҳдадоранд:

- дар муҳлат ва тартиби муқаррарнамудаи Комиссия маълумоти дахлдорро оид ба шаҳрвандони Ҷумҳурии Тоҷикистон, ки дар ҳудуди шаҳру ноҳияҳои дахлдор истиқомат карда, ҳуқуқи интихоб кардан ва раъй доданро доранд, пешниҳод намоянд;

- барои комиссияҳои дахлдори интихоботӣ ва раъйпурсӣ ҷойҳои мувофиқро барои ҷойгиршавӣ ва баргузории интихобот ва раъйпурсӣ ҷудо намоянд;

- комиссияҳои дахлдори интихобот ва раъйпурсиро бо таҷҳизоти зарурӣ таъмин намоянд;

- ба комиссияҳои дахлдори интихоботӣ барои баргузории вохӯрии номзадҳо ба мансаби Президенти Ҷумҳурии Тоҷикистон, узви Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикистон, вакили Маҷлисҳои маҳаллии вакилони халқ, шахсони боэътимоди онҳо бо интихобкунандагон, инчунин вохӯрии гурӯҳҳои таблиғотиро оид ба масъалаҳои дар раъйпурсӣ гузошташуда бо овоздиҳандагон толорҳои дахлдор ва ҷойи мувофиқ ҷудо намоянд;

- бо тартиби муқарраргардида номзадҳоро ба аъзои комиссияҳои ҳавзавии интихоботӣ ва раъйпурсӣ, инчунин комиссияҳои участкавии интихоботӣ ва раъйпурсӣ пешниҳод намоянд;

- уҳдадориҳои дигарро, ки дар қонунҳои конститутсионӣ оид ба интихобот ва раъйпурсӣ ва дигар санадҳои қонунгузории Ҷумҳурии Тоҷикистон пешбинӣ гардидаанд, иҷро намоянд.

БОБИ 5. ҲАМКОРИИ БАЙНАЛМИЛАЛИИ КОМИССИЯ

Моддаи 23. Ҳамкорӣ бо мақомот оид ба интихобот дар давлатҳои хориҷӣ ва созмонҳои (ассотсиатсияҳои) байналмилалӣ

1. Комиссия метавонад бо мақомот оид ба интихобот дар давлатҳои хориҷӣ ва созмонҳои (ассотсиатсияҳои) байналмилалӣ оид ба масъалаҳои интихобот ҳамкорӣ намояд.
2. Комиссия бо тартиби муқарраргардида метавонад ба созмонҳои (ассотсиатсияҳои) байналмилалии соҳавӣ ҳамроҳ шавад.

Моддаи 24. Иштироки узви Комиссия дар ҳайати мушоҳидони байналмилалӣ 

Узви Комиссия бо тартиби муқарраргардида метавонад ба сифати мушоҳиди байналмилалӣ дар ташкил ва гузаронидани интихобот ва раъйпурсии давлатҳои хориҷӣ иштирок намояд.

БОБИ 6. ДАСТГОҲИ КОМИССИЯ ВА ТАЪМИНОТИ МОДДИЮ МОЛИЯВИИ ФАЪОЛИЯТИ КОМИССИЯ

Моддаи 25. Дастгоҳи Комиссия 

1. Барои таъмини фаъолияти Комиссия дастгоҳи Комиссия таъсис дода мешавад. 
2. Кормандони дастгоҳи Комиссия хизматчиёни давлатӣ мебошанд.
3. Дастгоҳи Комиссия тибқи Низомномаи он таъминоти ташкилӣ - методӣ, иттилоотӣ-таҳлилӣ ва моддӣ-техникии фаъолияти Комиссияро амалӣ менамояд. Комиссия Низомномаи дастгоҳи Комиссияро тасдиқ менамояд. 
4. Сохтор ва шумораи воҳидҳои кории дастгоҳи Комиссия бо пешниҳоди раиси Комиссия аз тарафи Президенти Ҷумҳурии Тоҷикистон тасдиқ карда мешавад. 

Моддаи 26. Маблағгузории фаъолияти Комиссия

1. Маблағгузории фаъолияти Комиссия аз ҳисоби буҷети давлатии Ҷумҳурии Тоҷикистон амалӣ карда мешавад.
2. Дар буҷети давлатии Ҷумҳурии Тоҷикистон ҳар сол дар сатри алоҳида маблағҳои зарурии таъмини фаъолияти Комиссия пешбинӣ карда мешавад.
3. Молу мулке, ки барои фаъолияти Комиссия зарур аст, дар идоракунии оперативии Комиссия буда, моликияти Ҷумҳурии Тоҷикистон мебошад.

БОБИ 7. МУҚАРРАРОТИ ХОТИМАВӢ

Моддаи 27. Ҷавобгарӣ барои риоя накардани талаботи Қонуни мазкур

Шахсони воқеӣ ва ҳуқуқӣ барои риоя накардани талаботи Қонуни мазкур бо тартиби муқаррарнамудаи қонунгузории Ҷумҳурии Тоҷикистон ба ҷавобгарӣ кашида мешаванд.

Моддаи 28. Тартиби мавриди амал қарор додани Қонуни мазкур

Қонуни мазкур пас аз интишори расмӣ мавриди амал қарор дода шавад.

               Президенти 

     Ҷумҳурии Тоҷикистон                                                                                 Эмомалӣ РАҲМОН

             ш. Душанбе,

         19 июли соли 2019,

                 № 1642

ҚОНУНИ

ҶУМҲУРИИ ТОҶИКИСТОН

ДАР БОРАИ ТАЪМИНИ АҲОЛӢ БО МАҲСУЛОТИ ХӮРОКВОРИИ ҒАНИГАРДОНИДАШУДА

(Ахбори Маҷлиси Олии Ҷумҳурии Тоҷикистон, с. 2019, №7, мод. 468; ҚҶТ аз 23.12.2021с., №1828)

Қонуни мазкур муносибатҳои ҷамъиятиро дар самти таъмини аҳолӣ бо маҳсулоти хӯроквории ғанигардонидашуда танзим намуда, асосҳои ташкилию ҳуқуқии пешгирӣ намудани норасоиҳои микронутриентӣ ва бемориҳои вобаста ба онро муайян мекунад.

БОБИ 1. МУҚАРРАРОТИ УМУМӢ

Моддаи 1. Мафҳумҳои асосӣ

Дар Қонуни мазкур мафҳумҳои асосии зерин истифода мешаванд:

- бехатарии маҳсулоти хӯроквории ғанигардонидашуда – хусусияти маҳсулоти хӯроквории ғанигардонидашуда, ки истифода ва ё нигоҳдории барои ҳаёт ва саломатии аҳолӣ бехавфро дар давоми муҳлати истифодаи муқарраргардида таъмин намуда, барои саломатии насли ҳозира ва оянда бехатар мебошад; 

- бемориҳо вобаста ба норасоии йод дар организм – ҳолатҳои номуътадиле, ки аз вайрон шудани фаъолияти ғадуди сипаршакл дар натиҷаи норасоии йод дар ҷисми инсон пайдо мешаванд (паст шудани қобилияти зеҳнӣ, камақлӣ, бачапартоӣ, таваллуди кӯдаки мурда ва ғайра);

- ғанигардонӣ – раванди ворид (илова) намудани як ва зиёда аз он микронутриентҳои зарурӣ ба маҳсулоти хӯрокворӣ;  

- йодноккунии намак ва маҳсулоти хӯрокворӣ – раванди ғанигардонии намак ва маҳсулоти хӯрокворӣ бо йод бо мақсади пешгирӣ намудани бемориҳои норасоии йод;

- сифати маҳсулоти хӯроквории ғанигардонидашуда – маҷмуи талаботи техникӣ оид ба мутобиқат ба нишондиҳандаҳои органолептикӣ (таъм, бӯй, ранг ва намуди зоҳирӣ), физикӣ ва кимиёвии маҳсулоти хӯроквории ғанигардонидашуда; (ҚҶТ аз 23.12.2021с., №1828)

- микронутриентҳо – моддаҳои ғизоии ивазнопазир, яъне сарчашмаҳои ҳаётан муҳим, ки арзиши ғизоии маҳсулоти хӯроквориро муайян намуда, барои сохти дуруст, рушд, навшавии узвҳо, бофтаҳо, мубодилаи моддаҳо ва рушди ҷисми инсон ба таври умумӣ зарур мебошанд; 

- маҳсулоти хӯроквории ғанигардонидашуда – маҳсулоти хӯрокворие, ки ба он бо дар назар доштани меъёрҳои мувофиқи истеъмоли маҳсулоти хӯрокворӣ дар раванди (давраи) истеҳсол (омодасозӣ) як ва ё зиёда микронутриенти зарурӣ ворид карда шудаанд;

- норасоии микронутриентӣ – ҳолати ҷисми инсон, ки дар натиҷаи ба қадри кофӣ қабул накардани витаминҳо, оҳан ва микроэлементҳои дигари ба онҳо ҳамарӯза ҷисми инсон эҳтиёҷдошта, ба воситаи маҳсулоти хӯрокворӣ, ки ба пайдошавӣ ва инкишофи бемориҳои норасоии оҳан, йод ва бемориҳои дигар боис мегардад;

- намаки ошӣ – намаки барои истеъмоли инсон ва ҳайвонот пешбинигардида;

- премикс – маҷмӯи витаминҳо ва минералҳо, ки барои ғанигардонии маҳсулоти хӯрокворӣ истифода мешавад; 

- пешгирии норасоии микронутриентӣ ва бемориҳои вобаста ба он – маҷмӯи чораҳои бартарафсозии омилҳои хавфи пайдошавӣ ва авҷгирии норасоии микронутриентӣ ва бемориҳои вобаста ба он равонагардида;

- шиносномаи истеҳсолот – ҳуҷҷати шакли муқарраргардида, ки нишондиҳандаҳои иқтидори истеҳсолии истеҳсолкунанда, хусусиятҳои асосӣ ва танзимкунандаи истифодаи таҷҳизоти мавҷудаи онро барои риоя намудани раванди технологии истеҳсолот нишон медиҳад.

Моддаи 2. Қонунгузории Ҷумҳурии Тоҷикистон дар бораи таъмини аҳолӣ бо маҳсулоти хӯроквории ғанигардонидашуда

Қонунгузории Ҷумҳурии Тоҷикистон дар бораи таъмини аҳолӣ бо маҳсулоти хӯроквории ғанигардонидашуда ба Конститутсияи Ҷумҳурии Тоҷикистон асос ёфта, аз Қонуни мазкур, дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалие, ки Тоҷикистон онҳоро эътироф намудааст, иборат мебошад.

Моддаи 3. Вазифаҳо ва доираи амали Қонуни мазкур 

1. Вазифаҳои Қонуни мазкур иборатанд аз:

- мусоидат намудан ба пешгирии норасоии микронутриентӣ ва бемориҳои вобаста ба он бо роҳи ғанигардонии маҳсулоти хӯроквории аз ҷиҳати ғизонокӣ босамар ва дорои хусусияти пешгирикунӣ;

- фароҳам овардани шароит барои бартарафсозии норасоии микронутриентӣ, пешгирӣ намудани бемориҳои гуногун, пешгирии  фавти модару кӯдак ва афзун намудани дарозумрии инсон;

- таҳия намудани механизму чораҳои дастгирии давлатии истеҳсолкунандагони ватанӣ ва паҳнкунандагони (дистрибюторон ва фурӯшандагони) маҳсулоти хӯроквории ғанигардонидашуда, тақвият додани оқибатҳои дар натиҷаи амалигардонии барномаҳои ғанигардонии маҳсулоти хӯрокворӣ бадастомада.

2. Амали Қонуни мазкур ба ҳамаи тайёркунандагон, истеҳсолкунандагон, содиркунандагон, воридкунандагон, дистрибюторон ва фурӯшандаҳо, инчунин шахсони воқеӣ ва ҳуқуқии дигар, ки барои фаъолият оид ба ғанигардонии маҳсулоти хӯрокворӣ ва муомилоти онҳо, аз ҷумла премиксҳо ҷалб карда мешаванд, паҳн мегардад. (ҚҶТ аз 23.12.2021с., №1828)

3. Амали Қонуни мазкур нисбат ба фаъолияти шахсони воқеӣ ва ҳуқуқие, ки ба омодасозӣ, истеҳсол ва муомилоти иловаҳои ғизоӣ, аз ҷумла иловаҳои аз ҷиҳати биологӣ фаъол машғуланд, паҳн намегардад.

Моддаи 4. Принсипҳои ғанигардонии маҳсулоти хӯрокворӣ 

Ғанигардонии маҳсулоти хӯрокворӣ ба принсипҳои зерин асос меёбад:  

- мутобиқи меъёр будани мавҷудияти ҷузъҳои ғанигардонии маҳсулоти хӯрокворӣ, раванди (усулҳои) истеҳсол, нигоҳдорӣ, интиқол, фурӯш ва истифода;

- ҳатмӣ будани риоя ва иҷро намудани талаботи қонунгузорӣ, регламентҳои техникӣ (санадҳои меъёрии техникӣ), қоидаю меъёрҳои санитарӣ, дастурамалу дастурҳои технологӣ ва санадҳои дигари меъёрӣ дар соҳаи ғанигардонии маҳсулоти хӯрокворӣ; (ҚҶТ аз 23.12.2021с., №1828

- ҳатмӣ будани пешбурди назорати истеҳсолӣ, истифодаи шаклу усулҳои аз ҷиҳати илмӣ асоснокшудаи мониторинги ғанигардонӣ ва истеъмоли маҳсулоти хӯроквории ғанигардонидашуда;

- таъмини мавҷудияти витаминҳо, моддаҳои минералӣ ва моддаҳои дигар дар сатҳи на камтар аз меъёри барои муҳлати нигоҳдории маҳсулоти ғанигардонидашуда тавсияшаванда;

- самарабахшии тасдиқгардидаи маҳсулоти хӯроквории ғанигардонидашуда, ки бехатарии пурра, сифатҳои муносиби таъм, ҳазмшавии хуби онҳо, хусусияти ба таври назаррас беҳтар намудани таъмини ҷисми инсон бо витаминҳо, минералҳо ва моддаҳои дигари ба таркиби маҳсулоти ғанигардонидашуда воридгардида ва нишондиҳандаҳои солимии ба моддаҳои мазкур вобастаро нишон медиҳад;

- роҳ надодан ба бадшавии хусусиятҳои истеъмолии маҳсулоти хӯрокворӣ;

- баҳисобгирии эҳтимолияти таъсири мутақобилаи кимиёии иловаҳои ғаникунанда ва ҷузъҳои маҳсулоти ғанигардонидашаванда, муносибӣ, шакл, усулҳо ва марҳилаҳои илова намудани онҳо.

Моддаи 5. Сиёсати давлатӣ дар самти пешгирии норасоии  микронутриентӣ ва бемориҳои вобаста ба он 

Сиёсати давлатӣ дар самти пешгирии норасоии микронутриентӣ ва бемориҳои вобаста ба он бо роҳҳои зерин амалӣ карда мешавад: 

- амалӣ намудани чораҳои иқтисодӣ, ҳуқуқӣ ва ташкилии ба ғанигардонии бозори истеъмолӣ бо маҳсулоти хӯроквории ғанигардонидашуда равонагардида;

- амалӣ намудани назорати давлатии сифат ва бехатарии маҳсулоти хӯроквории ғанигардонидашуда ва шароити нигоҳдории он;   

- дастгирии давлатии тадқиқоти илмӣ дар самти пешгирии норасоии микронутриентӣ ва бемориҳои вобаста ба он;

- амалисозии чорабиниҳои пешгирикунанда оид ба таъмини кӯдакон ва занони синни қобили таваллуд бо маводи дорувории дорои йод ва оҳан; 

- мониторинги самарабахшии чорабиниҳо оид ба  ғанигардонии маҳсулоти хӯрокворӣ, пешгирии норасоии микронутриентӣ ва бемориҳои вобаста ба он;

- такмили низоми иттилоотию таҳлилӣ ва омории бақайдгирӣ дар самти пешгирию табобати норасоии микронутриентӣ ва бемориҳои вобаста ба он;

- рушди ҳамкории байналмилалӣ дар самти пешгирӣ ва табобати норасоии микронутриентӣ ва бемориҳои вобаста ба он.

БОБИ 2. ТАНЗИМ, ИДОРАКУНӢ ВА ДАСТГИРИИ ДАВЛАТӢ ДАР САМТИ ТАЪМИНИ АҲОЛӢ БО МАҲСУЛОТИ ХӮРОКВОРИИ ҒАНИГАРДОНИДАШУДА

Моддаи 6. Назорати давлатӣ ва санҷиш дар самти таъмини бехатарии маҳсулоти хӯроквории ғанигардонидашуда

Назорати давлатӣ ва санҷиши фаъолияти шахсони ҳуқуқӣ ва соҳибкорони инфиродӣ оид ба истеҳсол ва муомилоти маҳсулоти хӯроквории ғанигардонидашуда, аз ҷумла премиксҳо ва хизматрасонӣ оид ба савдои чаканаи маҳсулоти хӯроквории ғанигардонидашуда ва хӯроки умумӣ аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ бо тартиби муқаррарнамудаи қонунгузории Ҷумҳурии Тоҷикистон амалӣ мегардад. 

Моддаи 7. Салоҳияти Ҳукумати Ҷумҳурии Тоҷикистон дар самти таъмини аҳолӣ бо маҳсулоти хӯроквории ғанигардонидашуда

Ба салоҳияти Ҳукумати Ҷумҳурии Тоҷикистон дар самти таъмини аҳолӣ бо маҳсулоти хӯроквории ғанигардонидашуда мансубанд:

- таҳияи самтҳои асосии сиёсати давлатӣ дар самти пешгирии норасоии микронутриентӣ ва бемориҳои вобаста ба он; 

-  назорати фаъолияти мақомоти иҷроияи марказӣ ва маҳаллии ҳокимияти давлатӣ оид ба масъалаҳои ғанигардонии маҳсулоти хӯрокворӣ ва пешгирии норасоии микронутриентӣ ва бемориҳои вобаста ба он; 

 - тасдиқи барномаҳои илмию тадқиқотӣ оид ба пешгирии норасоии микронутриентӣ ва бемориҳои вобаста ба он, таъмини аҳолӣ бо маҳсулоти хӯроквории ғанигардонидашуда, ташкил намудани захираҳои давлатии маҳсулоти ғанигардонидашуда ва муайян намудани манбаи маблағгузории онҳо; 

- бамеъёрдарории давлатӣ дар самти муомилоти маҳсулоти хӯроквории ғанигардонидашуда ва андешидани чораҳо оид ба дастгирии давлатии субъектҳои хоҷагидор, ки маҳсулоти хӯроквории ғанигардонидашударо истеҳсол мекунанд;

- амалӣ намудани ваколатҳои дигари пешбининамудаи  қонунгузории Ҷумҳурии Тоҷикистон. 

Моддаи 8. Ваколатҳои мақоми ваколатдори назорати давлатии тандурустӣ ва ҳифзи иҷтимоии аҳолӣ дар самти таъмини аҳолӣ бо маҳсулоти хӯроквории ғанигардонидашуда

Ба ваколатҳои мақоми ваколатдори назорати давлатии тандурустӣ ва ҳифзи иҷтимоии аҳолӣ дар самти таъмини аҳолӣ бо маҳсулоти хӯроквории ғанигардонидашуда дохил мешаванд:

- амалигардонии сиёсати давлатӣ дар самти пешгирии норасоии микронутриентӣ ва бемориҳои вобаста ба он;

- ҳамоҳангсозии фаъолияти вазорату идораҳо, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, субъектҳои хоҷагидор ва иттиҳодияҳои ҷамъиятӣ ҷиҳати амалисозии барномаҳои давлатӣ оид ба ғанигардонии маҳсулоти хӯрокворӣ ва таъмини аҳолӣ бо маҳсулоти хӯроквории ғанигардонидашуда; 

- муқаррар намудани талаботи санитарию эпидемиологӣ оид ба ғанигардонии маҳсулоти хӯрокворӣ, меъёрҳо ва сатҳи тавсияшавандаи ингредиентҳо дар таркиби маҳсулоти хӯроквории ғанигардонидашуда; 

- ташкил, таъмин ва иҷрои корҳо дар соҳаи танзими техникӣ, ки ба талаботи ҳатмӣ нисбат ба бехатарии маҳсулоти хӯроквории ғанигардонидашуда ва премиксҳои ба ғанигардонии маҳсулоти хӯрокворӣ таъйингардида вобастаанд; 

- тасдиқ намудани номгӯйи бемориҳои ба норасоии микронутриентӣ вобаста; 

- тасдиқ намудани номгӯйи витаминҳо, минералҳо, омехтаю моддаҳои витаминию минералӣ ва минералӣ, ки барои ғанигардонии маҳсулоти хӯрокворӣ истифода мешаванд;

- тасдиқ намудани номгӯйи минералу моддаҳое, ки истифодабарии онҳо ҳангоми ғанигардонии маҳсулоти хӯрокворӣ манъ аст; 

- тасдиқи тартиби анҷом додани тадқиқоти озмоишгоҳӣ бо мақсади арзёбии сифат ва бехатарии маҳсулоти хӯроквории ғанигардонидашуда, даврияти назорати давлатӣ дар объектҳои истеҳсол ва муомилоти маҳсулоти хӯроквории ғанигардонидашуда;

- гузаронидани мониторинги сифат, истеҳсол, нигоҳдорӣ, воридот ва фурӯши намаки йодноккардашуда ва маҳсулоти ғизоӣ;

- гузаронидани корҳои санитарию эпидемиологӣ ва фаҳмондадиҳӣ оид ба пешгирии норасоии микронутриентӣ ва бемориҳои вобаста ба он дар байни аҳолӣ;

- таҳияи дастурҳои методӣ барои истеҳсолкунандагон, фурӯшандаҳо ва истеъмолкунандагони маҳсулоти хӯроквории ғанигардонидашуда; 

- гузарондани чорабиниҳо оид ба огоҳкунии аҳолӣ дар хусуси хавфу оқибатҳои бемориҳои вобаста ба норасоии витамину микроэлементҳо дар маводи ғизоӣ ва зарурати истеъмол намудани маҳсулоти хӯроквории ғанигардонидашуда; 

- тасдиқ намудани талаботи санитарию гигиенӣ барои объектҳое, ки истеҳсол ва муомилоти маҳсулоти хӯроквории ғанигардонидашударо амалӣ менамоянд;

- гузарондани ташхиси санитарию эпидемиологии маҳсулоти хӯроквории ғанигардонидашуда ва додани сертификати гигиенӣ ба маҳсулоти хӯроквории ғанигардонидашуда;

- мувофиқасозии шарту меъёрҳои техникӣ, қоидаю меъёрҳо, дастуру дастурамалҳои технологӣ ва ҳуҷҷатҳои дигар оид ба ғанигардонии маҳсулоти хӯрокворӣ, риоя намудани меъёрҳо, қоидаю чораҳои дахлдори санитарӣ;

- тасдиқ намудани номгӯйи усулҳои андозагирӣ ва тадқиқи маҳсулоти хӯроквории ғанигардонидашуда, озмоишгоҳҳои ҳаммонандкунӣ, тадқиқ ва арзёбии самарабахшии маҳсулоти хӯроквории ғанигардонидашуда;

- арзёбӣ ва пешгӯйи дараҷаи паҳншавии норасоии микронутриентӣ дар байни аҳолӣ;

- назорати давлатии сифат ва бехатарии маҳсулоти хӯроквории ғанигардонидашуда;

- амалӣ намудани ваколатҳои дигари пешбининамудаи  қонунгузории Ҷумҳурии Тоҷикистон. 

Моддаи 9. Ваколатҳои мақоми ваколатдори давлатӣ оид ба танзими техникӣ ва метрология дар самти таъмини аҳолӣ бо маҳсулоти хӯроквории ғанигардонидашуда

Ба ваколатҳои мақоми ваколатдори давлатӣ оид ба танзими техникӣ ва метрология дар самти таъмини аҳолӣ бо маҳсулоти хӯроквории ғанигардонидашуда дохил мешаванд:

- татбиқи сиёсати давлатӣ дар соҳаи бамеъёрдарории техникӣ, стандартонӣ ва сертификатсияи ҳатмии маҳсулоти хӯроквории ғанигардонидашуда ва премиксҳо; 

- амалигардонии сертификатсияи низоми бехатарии истеҳсоли маҳсулоти хӯроквории ғанигардонидашуда, назорати метрологӣ ва ташхиси таҷҳизоти корхонаҳои истеҳсолкунандаи маҳсулоти хӯроквории ғанигардонидашуда;

- анҷом додани назорати давлатӣ нисбати шахсони воқеӣ ва ҳуқуқӣ оид ба риоя гардидани талаботи ҳатмии санадҳои меъёрӣ дар соҳаи танзими техникӣ ҳангоми истеҳсоли маҳсулоти хӯроквории ғанигардонидашуда ва премиксҳои барои ғанигардонии маҳсулоти хӯрокворӣ пешбинигардида;

- амалигардонии назорати давлатии риояи ҳатмии талаботи регламентҳои техникӣ (санадҳои меъёрии техникӣ) ва арзёбии мутобиқат ба талаботи регламентҳои техникӣ (санадҳои меъёрии техникӣ) дар самти муомилоти маҳсулоти хӯроквории ғанигардонидашуда; (ҚҶТ аз 23.12.2021с., №1828)

- амалӣ намудани ваколатҳои дигари пешбининамудаи  қонунгузории Ҷумҳурии Тоҷикистон. 

Моддаи 10. Ваколатҳои мақомоти маҳаллии ҳокимияти давлатӣ дар самти таъмини аҳолӣ бо маҳсулоти хӯроквории ғанигардонидашуда

Ба ваколатҳои мақомоти маҳаллии ҳокимияти давлатӣ дар самти таъмини аҳолӣ бо маҳсулоти хӯроквории ғанигардонидашуда дохил мешаванд:

- таҳия ва амалигардонии барномаҳои маҳаллӣ дар самти пешгирии норасоии микронутриентӣ ва бемориҳои вобаста ба он; 

- дастгирӣ намудани истеҳсолкунандагони маҳсулоти хӯроквории ғанигардонидашуда ва премиксҳо;
- иштирок дар раванди истифодаи ҳатмии маҳсулоти хӯроквории ғанигардонидашуда дар муассисаҳои таълимӣ, тандурустӣ, иҷтимоӣ ва ташкилотҳои дигари буҷетӣ;

- ташкил ва амалигардонии корҳои огоҳӣ ва пешгирикунанда оид ба пешгирии норасоии микронутриентӣ, ошкор намудани гурӯҳҳои мақсадноки дорои норасоии микронутриентӣ;

- таъмини дастрасии маҳсулоти хӯроквории ғанигардонидашуда ба аҳолӣ;

- андешидани чораҳо оид ба таъмин намудани сифат ва бехатарии маҳсулоти хӯроквории ғанигардонидашуда, премиксҳои барои ғанигардонии маҳсулоти хӯрокворӣ пешбинигардида ва шароити нигоҳдории онҳо;

- амалӣ намудани ваколатҳои дигари пешбининамудаи қонунгузории Ҷумҳурии Тоҷикистон.

Моддаи 11. Самтҳои асосии таъмини аҳолӣ бо маҳсулоти хӯроквории ғанигардонидашуда, дастгирии давлатии таъмини аҳолӣ бо маҳсулоти хӯроквории ғанигардонидашуда, пешгирии норасоии микронутриентӣ ва бемориҳои вобаста ба он 

1. Самтҳои асосии таъмини аҳолӣ бо маҳсулоти хӯроквории ғанигардонидашуда чунин мебошанд:

- муқаррар намудани номгӯйи маҳсулоти хӯрокворие, ки ҳатман ғанӣ гардонида мешаванд;

- таъмин намудани истеҳсоли маҳсулоти хӯроквории ғанигардонидашуда;

- таъмини мувозинати содироту воридоти маҳсулоти хӯроквории ғанигардонидашуда; 

- хариди давлатии маҳсулоти хӯроквории ғанигардонидашуда бо мақсади ташаккул, навкунӣ ва пурра намудани захираҳои дахлдори давлатӣ;  

- мониторинги мунтазами вазъи бозори маҳсулоти хӯроквории ғанигардонидашуда. 

2. Тартиби амалисозии дастгирии давлатии таъмини аҳолӣ бо маҳсулоти хӯроквории ғанигардонидашуда, пешгирии норасоии микронутриентӣ ва бемориҳои вобаста ба онро санадҳои меъёрии ҳуқуқии Ҷумҳурии Тоҷикистон муқаррар мекунанд.

Моддаи 12. Мониторинги бехатарии маҳсулоти хӯрокворӣ ва саломатии аҳолӣ

1. Бо мақсади муайян намудани самтҳои афзалиятноки ҳифзи саломатии аҳолӣ ва таҳияи тадбирҳо оид ба пешгирии ворид шудани маҳсулоти хӯроквории ба саломатии аҳолӣ зарарнок аз тарафи мақомоти дахлдори давлатӣ якҷо бо мақомоти иҷроияи маҳаллии ҳокимияти давлатӣ мониторинги (мушоҳида, арзёбӣ ва пешгӯйи) амалисозии барномаҳои мавҷуда, бехатарии маҳсулоти хӯроквории ғанигардонидашуда, премиксҳо, инчунин ҳолати норасоии микронутриентӣ ва бемориҳои вобаста ба он ташкил ва гузаронида мешавад.

2. Шахсони воқеӣ ва иттиҳодияҳои ҷамъиятӣ бо тартиби муқаррарнамудаи қонунгузории Ҷумҳурии Тоҷикистон метавонанд дар баргузории мониторинги ҳолати норасоии микронутриентӣ ва бемориҳои вобаста ба он, инчунин пешгирии ба бозори истеъмолӣ ворид гардидани маҳсулоти хӯроквории ғанигардонидашудаи зарарнок ва премиксҳоро, ки ба саломатии инсон зарар мерасонанд, иштирок намоянд.

БОБИ 3. ПЕШГИРИИ НОРАСОИИ МИКРОНУТРИЕНТӢ ВА БЕМОРИҲОИ ВОБАСТА БА ОН

Моддаи 13. Самтҳои асосии пешгирии норасоии микронутриентӣ ва пешгирии бемориҳои вобаста ба он дар байни аҳолӣ 

Самтҳои асосии пешгирии норасоии микронутриентӣ ва пешгирии бемориҳои вобаста ба он дар байни аҳолӣ аз инҳо иборат мебошанд: 

- амалисозии чораҳои ташкилӣ, иҷтимоӣ, иқтисодӣ, ҳуқуқӣ,  иттилоотӣ ва чораҳои дигари ба таъмини аҳолӣ бо маҳсулоти хӯроквории ғанигардонидашуда равонагардида;

- танзими меъёрии техникии ғанигардонии орди гандум ва маҳсулоти ғизоии дигар бо витаминҳои дорои оҳан, минералҳо ва моддаҳои дигар, аз ҷумла йодноккунии намаки ошӣ ва маҳсулоти хӯроквории дигар; 

- таъмин, риоя ва иҷро намудани талабот нисбат ба муомилоти маҳсулоти хӯроквории ғанигардонидашуда, аз ҷумла таъмини шахсони дорои норасоии микронутриентӣ бо дорувории йод ва оҳандошта; 

- таъмини дастрасии кумаки тиббӣ ба шахсони мубталои  бемориҳои норасоии йод ва оҳан дар ташкилотҳои тандурустӣ;

- таъмини назорати давлатии сифат ва бехатарии маҳсулоти хӯроквории ғанигардонидашуда ва премиксҳои барои ғанигардонии маҳсулоти хӯрокворӣ пешбинигардида; 

- дастгирии давлатии истеҳсоли маҳсулоти хӯроквории ғанигардонидашуда ва премиксҳо барои ғанигардонии маҳсулоти хӯрокворӣ, инчунин тадқиқоти илмӣ оид ба ташкил намудани технологияи инноватсионии барои ошкорсозии барвақтии норасоии микронутриентӣ ва усулҳои пешгирии он; 

- мониторинг ва арзёбии амалигардонии барномаҳои давлатии ба пешгирии норасоии микронутриентӣ дар байни аҳолӣ равонагардида.

Моддаи 14. Чораҳои пешгирии норасоии микронутриентӣ ва бемориҳои вобаста ба он дар байни аҳолӣ 

Пешгирии норасоии микронутриентӣ ва бемориҳои вобаста ба он дар байни аҳолӣ амалӣ намудани чорабиниҳои зеринро пешбинӣ менамояд: 

- ташкил намудани муоинаи аҳолӣ, ошкор кардани шахсони гирифтори бемориҳои норасоии йод ва оҳан;

- арзёбӣ ва мониторинги ҳамасолаи раванди паҳншавии бемориҳои норасоии йод ва оҳан, самарабахш будани тадбирҳои гузаронидашавандаи пешгирӣ;

- ташкил ва тавассути матбуоти даврӣ, воситаҳои дигари ахбори омма ва рекламаи иҷтимоӣ амалӣ намудани таблиғи фарҳанги санитарӣ оид ба масъалаҳои пешгирӣ намудани норасоии микронутриентӣ;

- риояи ҳатмии талаботи қоидаю меъёрҳои санитарию гигиенӣ оид ба таъмини сифат ва бехатарии маҳсулоти хӯроквории ғанигардонидашуда;

- муайян намудани эҳтиёҷот ва таъмини истеъмоли маҳсулоти хӯроквории ғанигардонидашуда;
- таҳкими малакаҳои гигиенӣ оид ба истеъмоли ғизо ва фарҳанги истеъмоли ғизо аз ҷониби кӯдакон, таъмини ғизои солим дар муассисаҳои таълимии томактабӣ ва таҳсилоти миёнаи умумӣ;

- таъмини устувори гурӯҳҳои мақсадноки аҳолӣ бо дорувории дар таркибаш оҳандошта ва витаминҳо, беҳбудӣ бахшидан ба гигиена ва санитария дар байни аҳолӣ барои пешгирии бемориҳо ва вайроншавии мубодилаи ғизо;

- афзун намудани дастрасии сарчашмаҳои иттилоот оид ба истеъмоли ғизои солим бо мақсади беҳтар намудани нигоҳубин ва таҷрибаи ғизодиҳӣ, солимии репродуктивӣ, пешгирии бемориҳои дигари вобаста ба норасоии микронутриентӣ, инчунин истифодаи маҳсулоти хӯроквории ғанигардонидашуда;

- таҳия ва амалисозии маҷмӯи корҳои огоҳӣ ва пешгирикунанда бо мақсади ривоҷ додани малакаҳои падару модарон барои беҳтар намудани солимии ҷисмонию равонӣ, инчунин рушди равонию иҷтимоии кӯдакону наврасон; 

- чораҳои дигари санитарию гигиенӣ ва фаҳмондадиҳӣ.

БОБИ 4. ТАЛАБОТ НИСБАТ БА ҒАНИГАРДОНИИ  МАҲСУЛОТИ ХӮРОКВОРӢ

Моддаи 15. Шартҳои ғанигардонии маҳсулоти хӯрокворӣ 

1. Ғанигардонии маҳсулоти хӯроквории пешбининамудаи Қонуни мазкур танҳо бо ҳиссаҳои микронутриентӣ, ки барои истифода аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ иҷозат дода шудааст, ба роҳ монда мешавад. Арзиши ғизоии маҳсулоти хӯроквории ғанигардонидашуда, ки талаботи физиологии инсонро ба моддаҳо ва неруи зарурӣ қонеъ мегардонад, бояд ба талаботи муқаррарнамудаи қонунгузории Ҷумҳурии Тоҷикистон ҷавобгӯй бошад.

2. Ғанигардонии маҳсулоти хӯрокворӣ бо усулҳое сурат мегирад, ки таъсири номатлубро ба муҳити зист аз байн мебаранд ё маҳдуд месозанд. 

   Моддаи 16. Талаботи умумӣ нисбат ба ғанигардонии маҳсулоти хӯрокворӣ 

1. Ғанигардонии маҳсулоти хӯрокворӣ бо дарназардошти намуди маҳсулоти хӯрокворӣ ва технологияи истифодашаванда ҳатман дар шароити аз ҷиҳати гигиенӣ тоза амалӣ мегардад.

2. Ғанигардонии маҳсулоти хӯрокворӣ набояд хусусиятҳои истеъмолии маҳсулоти хӯроквории ғанигардонидашаванда, моддаҳои дигари дар таркиби он бударо кам кунад ё ҳазмшавии онҳоро халалдор созад. Дар ин сурат, намнокии таркиби маҳсулот набояд аз меъёри муқарраргардидаи ниҳоӣ зиёд бошад ё дар баробари ин муҳлати нигоҳдорӣ ё истифодабарии онҳоро кам кунад. 

3. Маҳсулоти хӯровории ғанигардонидашуда набояд дар таркиби худ моддаҳои зараровар дошта бошанд. Онҳо бояд тавре баркаш ва борпеч карда шаванд, ки ҳангоми нигоҳдорӣ, интиқол ва фурӯш сифат ва бехатарии маҳсулотро таъмин карда тавонанд. 

4. Ғанигардонии маҳсулоти хӯрокворӣ бо дар назар доштани намуд ва арзиши ғизоии онҳо мутобиқи  регламентҳои техникии (санадҳои меъёрии техникӣ) аз ҷониби Ҳукумати Ҷумҳурии Тоҷикистон тасдиқгардида амалӣ мегардад. Раванди ғанигардонии маҳсулоти хӯроквориро қоидаю меъёрҳои санитарию гигиенӣ, шартҳои техникӣ, дастуру дастурамалҳои технологӣ ва санадҳои меъёрии дигар танзим менамоянд. (ҚҶТ аз 23.12.2021с., №1828)

5. Миқдори умумии витаминҳо, минералҳо ва моддаҳои дигари ба маҳсулоти хӯрокворӣ иловашуда набояд аз меъёри муқарраргардидаи ниҳоӣ зиёд бошад. Миқдори ниҳоии микронутриентҳо дар маҳсулоти серғизо ва хушккардашуда бояд ба миқдори дар таркиби маҳсулоти хӯрокворӣ ҷойдошта, ки барои истеъмол омода шудаанд, баробар бошад. 

6. Миқдори витаминҳо ва моддаҳои минералии таркиби маҳсулоти хӯроквории ғанигардонидашуда бояд бо воҳидҳои бузургии низоми байналмилалии воҳидҳо (миллиграмм ё микрограмм) ё бо воҳидҳои бузургии дигар, ки барои истифода мутобиқи қонунгузории Ҷумҳурии Тоҷикистон дар соҳаи таъмини ченаки ягона иҷозат дода шудаанд, нишон дода шаванд.

7. Сифат ва бехатарии маҳсулоти хӯроквории ғанигардонидашуда бояд ба талаботи регламентҳои техникӣ (санадҳои меъёрии техникӣ), қоидаю меъёрҳои санитарӣ, байторӣ, фитосанитарӣ, инчунин дигар санадҳои меъёрии ҳуқуқии Ҷумҳурии Тоҷикистон мутобиқ бошанд. (ҚҶТ аз 23.12.2021с., №1828)

Моддаи 17. Намудҳои маҳсулоти хӯроквории ғанигардонидашаванда

Намудҳои зерини маҳсулоти хӯрокворӣ ғанӣ гардонида мешаванд:

- орди гандумии навъи олӣ ва якум;

- хамирмояи (дрожжи) нонпазӣ, маҳсулоти нонӣ ва қаннодӣ;

- шир ва маҳсулоти ширии туршмаза, аз ҷумла барои ғизои кӯдакон пешбинигардида;

- шарбат, шаҳди мева ва (ё) сабзавот, нӯшокиҳои мевагӣ ва (ё) сабзавотии шарбатдор;

- оби нӯшокии дар зарфҳо ҷойгиршуда ва нӯшокиҳои ғайримашруботӣ;

- намаки ошӣ.

Моддаи 18. Талабот ба сертификатсия ва тамғагузории маҳсулоти хӯроквории ғанигардонидашуда

1. Маҳсулоти хӯроквории ғанигардонидашуда, ки барои фурӯш пешбинӣ гардидааст, мутобиқи қонунгузории Ҷумҳурии Тоҷикистон дар бораи баҳодиҳии мутобиқат сертификатсия карда мешавад. 

2. Тамғагузории маҳсулоти хӯроквории ғанигардонидашуда ҳатмӣ мебошад.

3. Дар варақаҳои борпечӣ – замимавии маҳсулоти хӯроквории ғанигардонидашуда, тамғакоғаз ё тамғаи бор бояд ба забони давлатӣ маълумоте, ки бо қонунгузории Ҷумҳурии Тоҷикистон муайян гардидааст, дарҷ карда шавад. 

4. Борҷомаи маҳсулоти хӯроквории ғанигардонидашуда бояд имконияти нигоҳ доштани моддаҳои ба он иловагардидаро ба миқдори пешбининамудаи стандарт ва регламентҳои техникӣ таъмин намояд.

 5. Аломатҳои тамғагузории маҳсулоти хӯроквории ғанигардонидашуда бояд маълумот оид ба навъ, қайди ҳуҷҷате, ки мутобиқи он ҳаммонандкунӣ анҷом дода мешавад, маълумот дар хусуси тасдиқ намудани мутобиқат, калимаҳои «Ғанигардонидашуда», «Йодноккардашуда»-ро бо ҳарфҳои калон дар бар гиранд.

6. Қонунгузории Ҷумҳурии Тоҷикистон ба тамғагузории намудҳои алоҳидаи маҳсулоти хӯроквории ғанигардонидашуда метавонад талаботи иловагиро муқаррар намояд.

БОБИ 5. ИСТЕҲСОЛ ВА МУОМИЛОТИ МАҲСУЛОТИ ХӮРОКВОРИИ ҒАНИГАРДОНИДАШУДА

Моддаи 19. Хусусиятҳои истеҳсол ва муомилоти маҳсулоти хӯроквории ғанигардонидашуда

1. Истеҳсол ва муомилоти маҳсулоти хӯроквории ғанигардонидашуда бо тартиби пешбининамудаи Қонуни мазкур ва  дигар санадҳои меъёрии ҳуқуқии Ҷумҳурии Тоҷикистон амалӣ карда мешаванд.

2. Муомилоти маҳсулоти хӯроквории ғанигардонидашуда дар ҳолати  мавҷуд будани ҳуҷҷатҳои тасдиқкунандаи мутобиқати он ба талаботи сифат ва бехатарӣ роҳ дода мешавад. Ҳуҷҷатҳои тасдиқкунандаи сифат ва бехатарии маҳсулоти хӯроквории ғанигардонидашуда сертификатҳое мебошанд, ки аз ҷониби мақомоти дахлдори давлатӣ дар асоси натиҷаи сертификатсияи бо тартиби муқаррарнамудаи қонунгузории Ҷумҳурии Тоҷикистон анҷомдодашуда дода шудаанд. 

Моддаи 20. Истеҳсоли маҳсулоти хӯроквории ғанигардонидашуда

1. Истеҳсоли маҳсулоти хӯроквории ғанигардонидашуда дар асоси саноатӣ аз ҷониби шахсони ҳуқуқӣ ва соҳибкорони инфиродие амалӣ карда мешавад, ки объекти истеҳсолӣ (сохт, ҷойгиршавӣ, андоза), асбобу анҷом ва таҷҳизоти технологии онҳо бо асбобҳои назоратии дахлдоре таҷҳизонида шудаанд, ки ба талабот нисбат ба маводи бо маҳсулоти ғизоӣ робитадошта пешниҳодшаванда сохта шудаанд ва шиносномаи истеҳсолотро доранд. (ҚҶТ аз 23.12.2021с., №1828)

2. Истеҳсолкунандагони маҳсулоти хӯроквории ғанигардонидашуда уҳдадоранд назорати  истеҳсолии бехатарии онҳоро дар ҳама марҳилаҳои истеҳсол ташкил кунанд ва анҷом диҳанд, намунаи маҳсулоти хӯроквории ғанигардонидашударо гиранд, талаботи санадҳои меъёрии ҳуқуқиро нисбат ба шартҳои муомилоти маҳсулоти ғизоӣ риоя кунанд. Бо мақсади таъмин намудани сифат ва бехатарии маҳсулоти хӯроквории ғанигардонидашуда истеҳсолкунандагон уҳдадоранд санҷиши сатҳи премиксҳо, назорати таҷҳизот, раванди омехтакунӣ, мониторинг, назорати баркаш ва борпечкунӣ, тамғагузорӣ, инчунин таъмин намудани фурӯшандагонро бо сертификати миқдори муайяни маҳсулоти хӯроквории ғанигардонидашуда, ки ба фурӯш бароварда шудаанд, ба роҳ монанд. 

3. Истеҳсолкунандаи маҳсулоти хӯроквории ғанигардонидашуда уҳдадор аст дақиқии ба вояҳо тақсим карданро бо ҳаҷми (вазни) муайяншудаи маҳсулоти ғизоӣ риоя кунад, ба миқдори муқарраргардида ҷой доштани премиксҳои дахлдорро дар таркиби маҳсулоти хӯроквории ғанигардонидашуда кафолат диҳад. Дар ин сурат, мавҷудияти премиксҳо дар таркиби маҳсулоти хӯроквории ғанигардонидашуда, ки аз ҷониби истеҳсолкунанда кафолат дода мешавад, бояд ба меъёрҳои муносиби истеъмол асос ёфта, эҳтиёҷоти тавсияшавандаро ба чунин микронутриентҳо қонеъ гардонад. 

4. Истеҳсолкунандагони маҳсулоти хӯроквории ғанигардонидашуда барои исбот кардани сифат ва бехатарии маҳсулоти мазкур, ки ба фурӯш мебароранд, масъул мебошанд. 

Моддаи 21. Нигоҳдории маҳсулоти хӯроквории ғанигардонидашуда

1. Нигоҳдории маҳсулоти хӯроквории ғанигардонидашуда низоми равандҳои технологиро оид ба фароҳам овардани шароит барои таъмини бехатарии маҳсулоти хӯроквории ғанигардонидашуда, нигоҳдорӣ ва ҳифзи хусусиятҳои истеъмолии онҳо дар бар мегирад.

2. Нигоҳдории маҳсулоти хӯроквории ғанигардонидашуда дар биною иншооти махсус таҷҳизонидашуда, ки ба талаботи қоидаю меъёрҳои санитарӣ ҷавобгӯй мебошанд, бо риояи талаботи экологӣ, зиддисӯхторӣ, фитосанитарӣ ва талаботи дигари муқаррарнамудаи қонунунгузории Ҷумҳурии Тоҷикистон ба роҳ монда мешавад.

3. Бо мақсади ба ҳадди ақал расонидани талафоти эҳтимолии премиксҳо, аз ҷумла йод, маҳсулоти хӯроквории ғанигардонидашуда бояд аз таъсири бевоситаи нурҳои офтоб ё сарчашмаи равшании барзиёд, ҳарорат ё намнокии баланд, олудашавӣ бо чангу ифлосиҳои дигар аз муҳити зист ё таъсироти дигари номатлуби пешбининамудаи регламентҳои техникӣ ҳифз карда шаванд. 

Моддаи 22. Фурӯши маҳсулоти хӯроквории ғанигардонидашуда

1. Фурӯши маҳсулоти хӯроквории ғанигардонидашуда бо тартиби муқаррарнамудаи қонунгузории Ҷумҳурии Тоҷикистон ба роҳ монда мешавад.

2. Намудҳои алоҳидаи маҳсулоти хӯроквории ғанигардонидашудаи муҳлати нигоҳдориашон гузашта барои хӯроки чорво ва парандагон коркард ё бо тартиби муқаррарнамудаи Қонуни мазкур ва дигар санадҳои меъёрии хуқуқии Ҷумҳурии Тоҷикистон нобуд карда мешаванд. 

Моддаи 23. Воридоти маҳсулоти хӯроквории ғанигардонидашуда

1. Воридоти маҳсулоти хӯроквории ғанигардонидашуда ба ҳудуди Ҷумҳурии Тоҷикистон бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад. Ба муомилоти озод баровардани маҳсулоти хӯроквории ғанигардонидашуда танҳо дар ҳолати мавҷуд будани сертификати мутобиқат амалӣ карда мешавад, агар шартномаҳои байналмилалии Ҷумҳурии Тоҷикистон тартиби дигарро пешбинӣ накарда бошанд.

2. Ба воридоти маҳсулоти хӯроквории ғанигардонидашуда ба Ҷумҳурии Тоҷикистон бе сертификати дахлдор танҳо бо тартиби муқаррарнамудаи қонунгузории Ҷумҳурии Тоҷикистон барои ба намоишҳо гузоштан ва бо мақсади гузаронидани тадқиқот ё озмоиш иҷозат дода мешавад.  

Моддаи 24. Маҳдуд намудани муомилоти маҳсулоти хӯроквории ғанигардонидашуда

1. Фурӯши маҳсулоти хӯроквории ғанигардонидашуда, ки ба талаботи Қонуни мазкур, дигар санадҳои меъёрии ҳуқуқӣ, қоидаю меъёрҳои санитарию байторӣ ва фитосанитарӣ ҷавобгӯй намебошанд, дар ҳудуди Ҷумҳурии Тоҷикистон манъ аст.

2. Ба Ҷумҳурии Тоҷикистон ворид намудан, инчунин истеҳсол ва фурӯши маҳсулоти хӯроквории ғанигардонидашуда бе сертификати   мутобиқат, шартҳои барои интиқол, нигоҳдорӣ ва фурӯш зарурӣ, инчунин тамғагузоринашуда манъ аст. Аз ҷумла, иҷро намудани амалҳои зерин манъ аст:

- ба муомилоти озод баровардан ва содироти орди гандумии воридотии ғанигардониданашудаи навъи олӣ ва якум;

- истеҳсол ва фурӯши орди гандумии ғанигардониданашудаи навъи олӣ ва якум; 

- фурӯхтани маҳсулоти хӯроквории ғанигардонидашуда, аз ҷумла намаки йодноккардашуда ва маҳсулоти ғизоии йодноккардашудаи муҳлати нигоҳдориашон гузашта;

- воридоти намаки йодноккарданашуда;  

- воридот, содирот ва фурӯши маҳсулоти қалбакӣ;

- истифодаи намаки йодноккарданашуда барои саноати хӯрокворӣ;

- аз ҷониби истеҳсолкунандагон ё воридкунандагон таҳвил намудани намаки йодноккардашуда барои истеъмоли инсон ва барои эҳтиёҷоти саноати хӯрокворӣ, ки миқдори йод дар таркиби он аз сатҳи муқаррарнамудаи регламентҳои техникӣ (санадҳои меъёрии техникӣ) камтар аст; (ҚҶТ аз 23.12.2021с., №1828)

- фурӯхтани маҳсулоти хӯроквории ғанигардонидашудаи дар таркибаш премиксдошта, аз ҷумла намаки йодноккардашуда, ки миқдори йод дар таркиби он аз сатҳи муқаррарнамудаи регламентҳои техникӣ (санадҳои меъёрии техникӣ) дар натиҷаи аз ҷониби субъекти фаъолияти хоҷагидорӣ риоя нагардидани қоидаҳои ҳамлу нақл, нигоҳдорӣ ё фурӯши муайяннамудаи истеҳсолкунанда кам шудааст; (ҚҶТ аз 23.12.2021с., №1828)

- савдои яклухт ва чаканаи маҳсулоти хӯроквории ғанигардонидашудаи баркаш ва борпечнашуда. 

Моддаи 25. Рекламаи маҳсулоти хӯроквории ғанигардонидашуда

Рекламаи маҳсулоти хӯроквории ғанигардонидашуда бо тартиби пешбининамудаи қонунгузории Ҷумҳурии Тоҷикистон амалӣ карда мешавад. 

Моддаи 26. Партовкунии маҳсулоти хӯроквории ғанигардонидашуда

1. Партовкунии маҳсулоти хӯроквории ғанигардонидашудаи барои истеъмол ношоям бо тартиби муқаррарнамудаи қонунгузории Ҷумҳурии Тоҷикистон бо иштироки намояндагони мақомоти дахлдори давлатӣ анҷом дода мешавад. 

2. То партовкунии маҳсулоти хӯроквории ғанигардонидашуда моликони (соҳибони) он уҳдадоранд чораҳоеро андешанд, ки истифодаи минбаъдаи онро аз рӯи таъйинот истисно мекунанд. Дар ин ҳолат имконияти истифодаи маҳсулоти хӯроквории ғанигардонидашуда ба сифати хӯроки чорво ва паранда бо хулосаи ташхис муайян карда шуда, бо мақоми ваколатдори давлатӣ дар соҳаи байторӣ мувофиқа карда мешавад.

3. Молики (соҳиби)  маҳсулоти хӯроквории ғанигардонидашуда дар мувофиқа бо мақоми ваколатдори назорати давлатии тандурустӣ ва ҳифзи иҷтимоии аҳолӣ бо мақсади пешгирӣ намудани оқибатҳои номатлуб усулу шартҳои партовкунии онро интихоб менамояд.

БОБИ  6. ХУСУСИЯТҲОИ ҒАНИГАРДОНИИ НАМУДҲОИ АЛОҲИДАИ МАҲСУЛОТИ ХӮРОКВОРӢ

Моддаи 27. Ғанигардонии орди гандумии навъи олӣ ва якум

1. Орди гандумии навъи олӣ ва якум, ки барои фурӯш дар бозори дохилии истеъмолӣ таъйин гардидааст, бояд ғанӣ гардонида шавад. 

2. Орд бо витаминҳои дар таркибашон оҳан, минералҳо ва моддаҳои дигардошта дар асоси ягонагии қоидаҳои бамеъёрдарории таркиби ҳиссаҳои ғанигардонӣ, равандҳои (усулҳои) истеҳсол, нигоҳдорӣ, интиқол, фурӯш ва истифода ғанӣ гардонда мешавад. Меъёрҳои мавҷудияти витаминҳо, минералҳо ва моддаҳои дигар дар таркиби орд, сифат, бехатарӣ ва усулҳои ғанигардонии он бояд ба қоидаю меъёрҳои санитарию эпидемиологӣ, инчунин талаботи дигари меъёрӣ мутобиқ бошанд.

3. Ғанигардонии орд аз тарафи корхонаҳои ордбарории дорои раванди пурра ташаккулёфтаи технологии истеҳсоли орд дар ҳолати мавҷудияти таҷҳизоти дахлдори технологӣ барои ба вояҳо тақсим кардан ва омехтакунӣ, инчунин мавод ва ашёи хоми ба талаботи регламентҳои техникӣ (санадҳои меъёрии техникӣ) ҷавобгӯй анҷом дода мешавад. (ҚҶТ аз 23.12.2021с., №1828)

4. Корхонаҳои истеҳсолкунандаи орд ҳуқуқ доранд, ки тибқи шартномаҳои баимзорасонидашуда орди гандумии ғанигардониданашударо барои содирот истеҳсол кунанд.

5. Дар борҷомаи орди ғанигардонидашуда навиштаҷоте қайд мегардад, ки мутобиқи он ҳаммонандкунӣ анҷом дода мешавад ва маълумот оид ба тасдиқ намудани мутобиқат бо дарҷи номгӯйи иловаҳои воридкардашуда (премиксҳо) сабт мегардад.

Моддаи 28. Ғанигардонии шир, маҳсулоти ширӣ ва нӯшокиҳои дар асоси шир истеҳсолшуда

1. Шир, маҳсулоти ширӣ ва нӯшокиҳои дар асоси шир истеҳсолшуда, ки барои истеъмоли умум пешбинӣ шудаанд, дар алоҳидагӣ ё дар маҷмӯъ бо витаминҳо, микро ва макроэлементҳо, нахҳои ғизоӣ ва дигар маводи барои истифода иҷозатдодашуда дар корхонаҳои саноатии коркарди шир бо тартиби муқаррарнамудаи қонунгузории Ҷумҳурии Тоҷикистон ғанӣ гардонда мешаванд. Намудҳои алоҳидаи маҳсулоти ширӣ бо йод ғанӣ гардонда мешаванд.

2. Дар борпечи маҳсулоти хӯроквории зикршуда бояд маълумот оид ба таркиби микро ва макроэлементҳо, витаминҳо дар маҳсулоти тайёри ғанигардонидашуда, маводи дигари барои ғанигардонии маҳсулот истифодашуда, моддаҳои дигари бо зикри мансубияти миқдори ба маҳсулот иловашуда, моддаҳои ба вояи шабонарӯзии истеъмоли онҳо ва хусусиятҳои истеъмоли маҳсулот (ҳангоми зарурат) ҷойгир карда шавад. Миқдори моддаҳое, ки ба маҳсулоти ширии ғанигардонидашуда илова карда шудаанд, бо дар назар доштани таркиби онҳо дар маҳсулоти зикршуда бо қайд намудани муҳлати охири истифодабарии он нишон дода мешавад. 

Моддаи 29. Ғанигардонии маҳсулоти ғизои кӯдакон 

1. Аз маҳсулоти барои ғизои кӯдакон пешбинишуда маҳсулоти дар асоси шир истеҳсолгардида барои ғизои кӯдакони навзод омехтаҳои ширии мутобиқгардондашуда ё қисман мутобиқгардондашудаи аввалия ё баъдина (аз ҷумла омехтаҳои ширии хушк), омехтаҳои хушки ширии туршмазза, нӯшокиҳои ширӣ (аз ҷумла, хушккардашуда) барои кӯдакони навзод, омехтаҳои хушк барои шӯла (дар шароити хона бо истифодаи оби нӯшокӣ тайёр кардашаванда) ғанӣ гардонда мешаванд. Миқдори мавҷудияти витамину минералҳо дар таркиби омехтаҳои моеъ ва хушки ширӣ барои ғизои кӯдакони навзод бо регламентҳои техникӣ (санадҳои меъёрии техникӣ) муқаррар карда мешаванд. (ҚҶТ аз 23.12.2021с., №1828)

2. Дар борҷомаи маҳсулоти ширии барои ғизои кӯдакони навзод пешбинигардида маълумоти иловагӣ оид ба арзиши ғизоии маҳсулот, аз ҷумла миқдори витаминҳо, моддаҳои минералӣ ва арзиши неруии он дарҷ мегардад.

Моддаи 30. Ғанигардонии шарбат, шаҳди мева ва (ё) сабзавот, нӯшокиҳои мевагӣ ва (ё) сабзавотии шарбатдор

1. Барои ғанигардонии шарбат, шаҳди мева ва (ё) сабзавот, нӯшокиҳои мевагӣ ва (ё) сабзавотии шарбатдор витамину моддаҳои витаминмонанд, моддаҳои минералӣ, кислотаҳои органикӣ, нахҳои ғизоӣ, кислотаҳои чарбуии пурранашуда, маҷмӯи қандҳо (полисахарид) ва моддаҳои дигари пешбининамудаи регламентҳои техникӣ (санадҳои меъёрии техникӣ), ки бо тартиби муқарраргардида барои истифодабарӣ дар саноати хӯрокворӣ пешбинӣ шудаанд, истифода бурда мешаванд. (ҚҶТ аз 23.12.2021с., №1828)

2. Дар борҷомаи шарбат, шаҳди мева ва (ё) сабзавот, нӯшокиҳои мевагӣ ва (ё) сабзавотии шарбатдори ғанигардонидашуда ҳатман ҳама микронутриентҳои ба таркиби он дохилгардида дарҷ карда мешаванд. 

Моддаи 31. Ғанигардонии хамирмояи (дрожжи) нонпазӣ, маҳсулоти нонӣ ва қаннодӣ 

1. Хамирмояи (дрожжи) нонпазӣ, маҳсулоти нонӣ ва қаннодӣ бо ингредиентҳои дахлдор, инчунин йод, ки истифодаи онҳоро мақоми ваколатдори назорати давлатии тандурустӣ ва ҳифзи иҷтимоии аҳолӣ барои ғанигардонии маҳсулоти хӯрокворӣ иҷозат додааст, аз ҷониби истеҳсолкунанда ғанӣ гардонда мешаванд. 

2. Ғанигардонӣ ва йодноккунии хамирмояи нонпазӣ, маҳсулоти нонӣ ва қаннодӣ аз ҷониби регламентҳои техникӣ (санадҳои меъёрии техникӣ) муқаррар карда шуда, мувофиқи дастуру дастурамалҳои технологӣ ба миқдори пешбининамудаи меъёрҳои пешгирии аз ҷиҳати илмӣ асоснокшудаи миқдори онҳо дар таркиби маҳсулот анҷом дода мешаванд. (ҚҶТ аз 23.12.2021с., №1828)

Моддаи 32. Йодноккунӣ ва ғанигардонии оби нӯшокии дар зарфҳо ҷойгиркардашуда ва нӯшокиҳои ғайримашруботии ташнагишикан

1. Оби нӯшокии дар зарфҳо ҷойгиркардашуда барои истифодабарӣ дар маҳсулоти хӯрокворӣ бо иҷозати мақоми ваколатдори назорати давлатии тандурустӣ ва ҳифзи иҷтимоии аҳолӣ йоднок карда мешавад.

2. Ғанигардонии оби нӯшокии дар зарфҳо ҷойгиркардашуда бо микро ва макроэлементҳо ва нӯшокиҳои ташнагишикани ғайримашруботӣ бо микроэлементҳо дар сатҳи меъёрҳои гигиении сифати онҳо анҷом дода мешавад, ки бо талаботи санитарию эпидемиологӣ ва гигиенӣ нисбат ба моли таҳти назорати санитарию эпидемиологӣ қарордошта муқаррар гардидааст. 

Моддаи 33. Йодноккунии намаки ошӣ

1. Дар Ҷумҳурии Тоҷикистон намаки барои истеъмол таъйингардида йоднок карда мешавад. Истеҳсолкунандагони намаки ошӣ уҳдадоранд, ки йодноккунии намаки аз ҷониби онҳо истеҳсол, тайёр, фурӯхташаванда ё тақсимотшавандаро анҷом диҳанд. Намаки ошии йодноккардашуда, ки дар Ҷумҳурии Тоҷикистон фурӯхта ва ё тақсимот карда мешавад, новобаста ба мамлакати истеҳсол, бояд сертификатсия ва тамғагузорӣ шуда, сифату бехатарии он ба талаботи регламентҳои техникӣ (санадҳои меъёрии техникӣ) ва қоидаю меъёрҳои дар Ҷумҳурии Тоҷикистон амалкунанда мувофиқ бошад. Талабот ба сифат ва бехатарӣ инчунин ба намаки ошии йодноккардашудаи воридшаванда бояд риоя шаванд. (ҚҶТ аз 23.12.2021с., №1828)

2. Намаки ошии йодноккардашуда ба сифати ҳомили иловаҳои ғизоӣ дар саноати хӯрокворӣ, хӯриши мустақил, ҷузъи маҳсулоти ғизоӣ, инчунин якҷоя бо маҳсулоти ғизоии дигар, моддаҳои минералӣ ҳангоми пухтани хӯрок дар хонаводаҳо, корхонаҳои хӯроки умумӣ ва саноати хӯрокворӣ истифода бурда мешавад. 

3. Усули йодноккунии намаки ошӣ, сифат ва бехатарии он, ғилзати йод, нишондиҳандаҳои мониторинги раванди технологии йодноккунии намак ва дараҷаи мавҷудияти йод дар таркиби намак дар марҳилаи нигоҳдорӣ то истеъмол, истифодаи он бояд ба ҳама талаботи ҳуҷҷатҳои меъёрии амалкунанда ҷавобгӯй бошанд. Равандҳои истеҳсолию технологӣ, яъне тозакунӣ, майдакунӣ ва йодноккунӣ, баркаш ва борпечкунӣ, тамғагузорӣ, инчунин интиқол, нигоҳдорӣ ва фурӯши намак бояд ба меъёрҳои амалкунандаи санитарию гигиенӣ оид ба сифат ва бехатарии маҳсулоти хӯрокворӣ ва пешгирӣ намудани ҳама гуна хавфҳои олудашавии онҳо қатъиян мутобиқ бошанд. 

4. Намаки ошии йодноккардашуда бояд ба халтаҳои бофтаи полипропилении тоза, халтаҳои ҷутии истифоданашуда ё маводи дигари дорои дарунхалтаи полиэтилении ғафс, ки нигоҳдории йодро дар давоми муддати истеъмол дар сатҳи дахлдор нигоҳ медорад, ҷойгир карда шавад. Борҷомаи намаки йодноккардашуда бояд нигоҳдории сифат ва  миқдори камтарини муқарраргардидаи йодро дар таркиби намак то гузаштани муҳлати истеъмоли он таъмин кунад. 

5. Таҳвили намаки ошии йодноккардашуда барои фурӯши чакана ё нуқтаҳои ниҳоии тақсимкунии он на дертар аз 12 моҳ аз рӯзи истеҳсоли он анҷом дода шуда, баъд аз он муҳлати нигоҳдорияш гузашта ҳисобида мешавад. Намаки муҳлати нигоҳдорияш гузашта бояд иваз ё ба таҳвилгари (фурӯшандаи) он баргардонда шавад. 

6. Истеҳсолкунандагон, тайёркунандагон, аз ҷумла субъектҳое, ки дар соҳаи хӯроки умумӣ хизматрасониро анҷом медиҳанд ва намаки оширо истифода мебаранд, уҳдадоранд ҳангоми истеҳсол намудани маҳсулоташон намаки ошии йодноккардашударо истифода баранд. 

7. Вобаста ба пайдоиш ва усули истеҳсоли намаки ошӣ ба таркиби он ба ғайр аз йод метавонанд моддаҳои дигари минералие, ки барои истифода дар маҳсулоти хӯрокворӣ аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ иҷозат дода шудаанд, бо миқдори гуногун илова карда шаванд. 

8. Ба муомилоти намаки йодноккарданашуда, яъне намаки саноатӣ, ки барои коркард, коркарди дубора ва (ё) истеҳсоли маҳсулоти тиҷоратии ба маҳсулоти хӯрокворӣ дохилнабуда истифода мешавад, бо тартиби муқаррарнамудаи санадҳои меъёрии ҳуқуқии Ҷумҳурии Тоҷикистон ва санадҳои меъёрии техникӣ иҷозат дода шудааст.

9. Дар самти йодноккунии намак бо мақсади пешгирии бемориҳои вобаста ба норасоии йод дар Ҷyмҳypии Тоҷикистон тадбирҳои зерин андешида мешаванд:

- ташкили муоинаи аҳолӣ, пешгирӣ ва ошкор кардани шахсоне, ки гирифтори бемориҳои норасоии йод гардидаанд;

- баҳодиҳии ҳарсола бо мақсади мониторинги раванди паҳншавии бемориҳо аз норасоии йод, самаранокии чораҳои пешгирӣ ва ба мақомоти дахлдор пешниҳод кардани маълумот дар бораи натиҷаҳои он;

- гузаронидани тадқиқоти илмии ба пешгирӣ аз бемориҳои норасоии йод равонагардида;

- огоҳ кардани аҳолӣ дар бораи чораҳои пешгирӣ аз бемориҳои норасоии йод ва ташкили воситаҳои маърифати санитарӣ тавассути матбуот, радио ва телевизион оид ба масъалаҳои пешгирии бемории норасоии йод, нашри варақаҳо, маълумотномаҳо ва дигар тадбирҳо;

- ҳатмӣ будани риояи стандартҳо, талаботи меъёрҳои санитарию гигиенӣ ва қоидаҳои таъмини сифат ва бехатарии намаки ошии йодноккардашуда аз ҷониби шахсони воқеӣ ва ҳуқуқие, ки ба истеҳсол, содирот, воридот ва фурӯши намаки ошии йодноккардашуда машғул мебошанд.

БОБИ 7. МУҚАРРАРОТИ ХОТИМАВӢ

Моддаи 34. Ҷавобгарӣ барои риоя накардани талаботи Қонуни мазкур

Шахсони воқеӣ ва ҳуқуқӣ барои риоя накардани талаботи Қонуни мазкур мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.

Моддаи 35. Дар бораи аз эътибор соқит донистани Қонуни Ҷумҳурии Тоҷикистон «Дар бораи йоднокгардонии намак»

Қонуни Ҷумҳурии Тоҷикистон аз 2 декабри соли 2002 «Дар бораи йоднокгардонии намак» (Ахбори Маҷлиси Олии Ҷумҳурии Тоҷикистон, с. 2002,  №11, мод. 738; с. 2007, №5, мод. 369) аз эътибор соқит дониста шавад.

Моддаи 36.Тартиби мавриди амал қарор додани Қонуни мазкур

Қонуни мазкур пас аз интишори расмӣ мавриди амал қарор дода шавад.

                     Президенти

             Ҷумҳурии Тоҷикистон                                                               Эмомалӣ РАҲМОН

      ш. Душанбе,

19 июли соли 2019,

       № 1635

ҚОНУНИ

ҶУМҲУРИИ ТОҶИКИСТОН

ДАР БОРАИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Қонуни мазкур асосҳои ҳуқуқӣ, ташкилӣ, иқтисодӣ, иҷтимоии таъмини оби нӯшокӣ ва рафъи обҳои партов, кафолатҳои давлатии таъмини оби нӯшокӣ ва рафъи обҳои партов, инчунин сифат ва бехатарии онҳоро муқаррар мекунад.

БОБИ 1. МУҚАРРАРОТИ УМУМӢ

Моддаи 1. Мафҳумҳои асосӣ

Дар Қонуни мазкур мафҳумҳои асосии зерин истифода мешаванд:

- оби нӯшокӣ – обе, ки аз ҷиҳати сифат ва бехатарӣ дар ҳолати табиӣ ё баъди коркард (тозагардонӣ, безараргардонӣ, илова намудани моддаҳои кимиёвӣ) ба талаботи меъёрии муқарраршуда ҷавобгӯ буда, барои нӯшидан, тайёр намудани хӯрок, эҳтиёҷоти дигари хоҷагидорию маишии аҳолӣ ва истеҳсоли маҳсулоти хӯрокворӣ истифода мешавад;

- талаботи меъёрӣ нисбат ба сифат ва бехатарии оби нӯшокӣ – маҷмӯи нишондиҳандаҳои кимиёвию микробиологӣ ва хусусиятҳои органолептикии оби нӯшокӣ (мазза, ранг, бӯй, ҳарорат), ки бо усулҳои илмию таҳқиқотӣ ва қоидаҳои санитарӣ муқаррар гардида, бехатарӣ ва безарарии онро барои саломатии аҳолӣ кафолат медиҳад;

- таъмини оби нӯшокӣ – фаъолияте, ки барои таъмини талаботи шахсони воқеӣ ва ҳуқуқӣ ба оби нӯшокӣ равона карда шудааст;

- манбаи таъмини оби нӯшокӣ – обҳои табиӣ (рӯизаминӣ ва зеризаминӣ), ки баъди коркарди мувофиқ ва ё бе коркард барои таъмини оби нӯшокӣ истифода мешаванд; 

- шабакаи мутамаркази таъмини оби нӯшокӣ (шабакаи оби нӯшокии истифодаи умум) – маҷмӯи таҷҳизот, иншооти гидротехникӣ ва дигар таъйиноти хоҷагии об барои гирифтан, коркард, нигоҳ доштан ва ба маҳалли истеъмол расонидани оби нӯшокӣ, ки барои истифодаи оммавии шахсони воқеӣ ва (ё) ҳуқуқӣ дастрас мебошад;

- шабакаи ғайримутамаркази таъмини оби нӯшокии истифодаи умум – таҷҳизоти гидротехникӣ ва иншооти дигари таъйиноти хоҷагии об барои гирифтан ва коркарди (ё бе коркарди) оби нӯшокӣ, бе расонидани он ба маҳалли истеъмол, ки барои истифодаи оммавии шахсони воқеӣ ва (ё) ҳуқуқӣ дастрас мебошанд;

- шабакаҳои мухтори таъмини оби нӯшокӣ – таҷҳизоти иншооти гидротехникӣ ва дигар иншооти таъйиноти хоҷагии об барои гирифтани оби нӯшокӣ ва расонидани (ё нарасонидани) он ба ҷойҳои истеъмолшавӣ, ки дар истифодаи фардӣ қарор доранд (бинои алоҳида, хоҷагии фермерӣ, бӯстонсарой ё иншооти алоҳидаи дигар); 

- шабакаи таъмини оби нӯшокӣ дар воситаҳои нақлиёт – таҷҳизоту дастгоҳҳое, ки дар воситаҳои нақлиёт барои бо оби нӯшокӣ таъмин намудани мусофирон, ҳайати идоракунандаи нақлиёт ва хизматрасон дар самти ҳаракати воситаҳои нақлиёти мусофиркаш ё таъйиноти дигар ҷойгир карда шудаанд;

- шабакаи таъмини оби нӯшокӣ – ҳама намуди шабакаҳо (мутамарказ, ғайримутамарказ, мухтор ва шабакаҳои таъмини оби нӯшокӣ дар воситаҳои нақлиёт) ҳангоми мавҷуд будани меъёрҳои умумии мутобиқ барои қонеъ гардонидани талаботи физиологии инсон ба оби нӯшокӣ ва эҳтиёҷоти хоҷагидорию маишӣ; 

- рафъи обҳои партов – қабул, интиқол ва тозакунии обҳои партов бо истифодаи шабакаи рафъи обҳои партов;

- шабакаҳои рафъи обҳои партов – маҷмӯи иншоотҳои бо ҳам алоқаманди муҳандисӣ, гидротехникӣ ва иншооти дигаре, ки барои қабул, интиқол, тозакунӣ ва безараргардонии обҳои партов ва такшини онҳо то сатҳи талаботи муқарраршуда пеш аз нобудкунӣ ва ё партофтани онҳо ба иншоотҳои обӣ,  дигар қабулгоҳи обҳои партов таъйин гардидаанд;

- обҳои партов – обҳое, ки мувофиқи тартиби муайянкардашуда баъди истифода ба иншооти обӣ партофта мешаванд ё аз минтақаҳои олудашуда дохил мешаванд;

- таркиб ва хусусияти обҳои партов – маҷмӯи нишондиҳандаҳои тавсифкунандаи хусусиятҳои табиӣ, кимиёвӣ, бактериологӣ ва дигари обҳои партов, аз ҷумла ғализияти ҷузъҳои ифлоскунанда ва микроорганизмҳо дар обҳои партов;  

- эътимоднокии шабакаҳои таъмини оби нӯшокӣ – хусусияти шабака, ки реҷаи муайяни интиқоли оби нӯшокиро ба истеъмолкунандагон тибқи талаботи меъёрӣ нисбат ба сифат ва бехатарии оби нӯшокӣ таъмин менамояд;

- эътимоднокии шабакаҳои рафъи обҳои партов – хусусияти шабака, ки қабул, интиқол ва тозакунии мунтазами обҳои партовро мувофиқи меъёрҳои муқарраргардидаи сифат ва бехатарӣ таъмин менамояд; 

- минтақаҳои санитарию муҳофизатии манбаъҳои таъмини оби нӯшокӣ ва шабакаҳои он – ҳудудҳо ва марзобҳое, ки дар онҳо низоми махсуси хоҷагидорӣ ва фаъолияти дигар барои пешгирӣ аз ифлосшавии об бо мақсади таъмини сифат, бехатарии обҳо ва ҳифзи он муқаррар гардидааст; 

- минтақаҳои санитарию муҳофизатии шабакаҳои рафъи обҳои партов – ҳудуди пешбинишуда ва ҳифзгардида барои ҳифзи иншооти рафъи обҳои партов ва аз таъсири номусоиди беруна ва ҳифзи муҳити атроф, ки ҳудуди он бо тартиби муқаррарнамудаи қонунгузории Ҷумҳурии Тоҷикистон муайян карда мешавад; 

- меъёри истеъмоли оби нӯшокӣ – миқдори зарурии оби нӯшокӣ барои қонеъ гардонидани эҳтиёҷоти физиологӣ ва маишии як одам дар давоми як шабонарӯз дар маҳалли мушаххас, иншооти алоҳида ё воситаи нақлиёт ҳангоми фаъолияти муътадили шабакаҳои таъмини оби нӯшокӣ, халалдор гардидани фаъолияти муътадили онҳо ва дар ҳолатҳои фавқулода;

- ташкилоти таъмини оби нӯшокӣ ва рафъи обҳои партов – шахсони ҳуқуқие, ки ҳуқуқи истифодабарӣ, пешбурди хоҷагидорӣ ва идоракунии оперативии шабакаҳои мутамарказ, ғайримутамарказ ва мухтори таъмини оби нӯшокӣ ва мувофиқан шабакаҳои рафъи обҳои партовро амалӣ менамоянд;

- истеъмолкунандагони оби нӯшокӣ – шахсони воқеӣ ва ҳуқуқӣ, ки оби нӯшокиро барои талаботи шахсиашон истифода менамоянд;

- муштарӣ – шахсони воқеӣ ва ҳуқуқӣ, ки барои таъмини оби нӯшокӣ ва ё рафъи обҳои партов шартнома бастаанд ва ё  уҳдадоранд шартнома банданд; 

- истифодабарандагони шабакаҳои рафъи обҳои партов – шахсони воқеӣ ва ҳуқуқие, ки шабакаҳои рафъи обҳои партовро барои партофтани оби партов истифода мебаранд;

- реагентҳо – моддаҳои кимиёвие, ки барои тоза ва безараргардонии оби нӯшокӣ ва обҳои партов аз ҷониби ташкилоти таъмини оби нӯшокӣ ва рафъи обҳои партов истифода бурда мешаванд.

Моддаи 2. Қонунгузории Ҷумҳурии Тоҷикистон дар бораи оби нӯшокӣ ва рафъи обҳои партов

Қонунгузории Ҷумҳурии Тоҷикистон дар бораи оби нӯшокӣ, таъмини оби нӯшокӣ ва рафъи обҳои партов ба Конститутсияи Ҷумҳурии Тоҷикистон асос ёфта, аз Қонуни мазкур, дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалие, ки Тоҷикистон онҳоро  эътироф намудааст, иборат мебошад.

Моддаи 3. Вазифаҳои Қонуни мазкур

Вазифаҳои Қонуни мазкур аз инҳо иборатанд:

- муқаррар намудани кафолатҳои ҳуқуқӣ ва қонеъ гардонидани талаботи шахсони воқеӣ ва ҳуқуқӣ ба оби нӯшокӣ;

- муқаррар намудани асосҳои хоҷагию иқтисодии таъмини оби нӯшокӣ;

- муқаррар намудани кафолатҳои давлатии эътимоднокии таъмини оби нӯшокӣ ва рафъи обҳои партов, инчунин асосҳои ба ҷавобгарӣ кашидан барои вайрон кардани қоидаҳои таъмини оби нӯшокӣ ва рафъи обҳои партов.

Моддаи 4. Принсипҳои сиёсати давлатӣ дар самти таъмини оби нӯшокӣ ва рафъи обҳои партов

Принсипҳои сиёсати давлатӣ дар самти таъмини оби нӯшокӣ ва рафъи обҳои партов аз инҳо иборатанд:

- ҳуқуқи инсон ба оби бехатар ва санитария;

- гуногунии шаклҳои моликият ва идоракунӣ, аз ҷумла шарикии давлат ва бахши хусусӣ;

- ғайриинҳисорӣ ва ғайримутамарказонии низоми идоракунӣ;

- баҳисобгирии хусусиятҳои татбиқи таъмини оби нӯшокӣ ва рафъи обҳои партови шаҳр ва деҳот;

- ягонагии хоҷагидории ҳар як шабакаи таъмини оби нӯшокӣ ва шабакаи рафъи обҳои партови ба он алоқаманд;

- аҳамияти ҳаётан муҳим доштани шабакаҳои таъмини оби нӯшокӣ ва рафъи обҳои партов;

- назорати давлатӣ ва танзими давлатии масъалаҳои таъмини оби нӯшокӣ дар таъмини оби нӯшокӣ ва рафъи обҳои партов;

- баҳисобгирӣ ва ҳисоботдиҳӣ дар самти таъмини оби нӯшокӣ ва рафъи обҳои партов;

- музднокии хизматрасонии таъмини оби нӯшокӣ ва рафъи обҳои партов.

БОБИ 2. ИДОРАКУНИИ ДАВЛАТӢ ДАР САМТИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Моддаи 5. Салоҳияти Ҳукумати Ҷумҳурии Тоҷикистон дар самти таъмини оби нӯшокӣ ва рафъи обҳои партов

Ба салоҳияти Ҳукумати Ҷумҳурии Тоҷикистон дар самти таъмини оби нӯшокӣ ва рафъи обҳои партов дохил мешавад:

- таҳия ва татбиқ намудани сиёсати давлатӣ дар самти таъмини оби нӯшокӣ ва рафъи обҳои партов;

- тасдиқи (қабули) санадҳои меъёрии ҳуқуқӣ дар самти таъмини оби нӯшокӣ ва рафъи обҳои партов;  

- тасдиқ намудани барномаҳои давлатии таъмини оби нӯшокӣ ва рафъи обҳои партов дар Ҷумҳурии Тоҷикистон;

- тасдиқи тартиби қабул ва супоридани фондҳои асосии таъмини оби нӯшокӣ ва рафъи обҳои партов, новобаста аз шакли моликият ва идоракунӣ; 

- танзими масъалаҳои рушди шарикии давлат ва бахши хусусӣ дар самти таъмини оби нӯшокӣ ва рафъи обҳои партов;

- татбиқ намудани сиёсати нархгузорӣ дар самти таъмини оби нӯшокӣ ва рафъи обҳои партов;

- муайян кардани тартиби баҳисобгирӣ ва ҳисоботдиҳӣ дар самти таъмини оби нӯшокӣ ва рафъи обҳои партов;

- муайян намудани тартиби таъсис ва истифодабарии захираҳои молиявӣ ва моддию техникӣ барои барқарорсозии шабакаҳои таъмини оби нӯшокӣ ва рафъи обҳои партов, ки зери таъсири манфии ҳолатҳои фавқулода қарор гирифтаанд; 

- муайян намудани мақоми ваколатдори давлатӣ дар самти таъмини оби нӯшокӣ ва рафъи обҳои партов ва вазифаҳои он;

- ба роҳ мондани ҳамкориҳои байналмилалӣ дар самти таъмини оби нӯшокӣ ва рафъи обҳои партов;

- амалӣ намудани салоҳияти дигар тибқи қонунгузории Ҷумҳурии Тоҷикистон.

Моддаи 6. Ваколати мақоми ваколатдори давлатӣ дар самти таъмини оби нӯшокӣ ва рафъи обҳои партов

Ба ваколати мақоми ваколатдори давлатӣ дар самти таъмини оби нӯшокӣ ва рафъи обҳои партов дохил мешавад:

- ташкили меъёргузорӣ, баҳисобгирӣ ва ҳисоботдиҳӣ дар таъмини оби нӯшокӣ ва рафъи обҳои партов;

- амалӣ намудани сиёсати давлатӣ оид ба таъмини оби нӯшокӣ ва рафъи обҳои партов мувофиқи меъёрҳои амалкунандаи миқдор, сифат ва бехатарӣ;

- ҳамоҳангсозии таҳқиқотҳои илмӣ ва ҷорӣ намудани дастовардҳои нав дар самти таъмини оби нӯшокӣ ва рафъи обҳои партов, истеҳсоли маводи зарурӣ ва моддаҳои кимиёӣ барои тоза ва безараргардонии оби нӯшокӣ ва обҳои партов ва ташкили маблағгузории онҳо;

- тасдиқи барномаҳои мақсадноки минтақавӣ ва нақшаи чорабиниҳо оид ба ташкил, нигоҳдорӣ ва рушди шабакаҳои таъмини оби нӯшокӣ ва рафъи обҳои партов;

- муайян намудани чораҳо оид ба муҳофизати манбаъҳо ва шабакаҳои таъмини оби нӯшокӣ ва рафъи обҳои партов;

- якҷоя бо мақоми ваколатдори назорати давлатии тандурустӣ ва ҳифзи иҷтимоии аҳолӣ ва мақоми ваколатдори давлатӣ дар соҳаи ҳифзи муҳити зист ташкил намудани санҷишҳои техникӣ ва аудити технологии шабакаҳои таъмини оби нӯшокӣ ва рафъи обҳои партов тибқи тартиби муқаррарнамудаи қонунгузории Ҷумҳурии Тоҷикистон;

- ташкили таълим, бозомӯзӣ ва такмили ихтисоси кадрҳо дар самти таъмини оби нӯшокӣ ва рафъи обҳои партов;

- таҳия ва ба Ҳукумати Ҷумҳурии Тоҷикистон ҷиҳати қабул (тасдиқ) пешниҳод намудани санадҳои меъёрии ҳуқуқӣ дар самти таъмини об нӯшокӣ ва рафъи обҳои партов; 

- муқаррар намудани тариф барои хизматрасонии таъмини оби нӯшокӣ ва рафъи обҳои партов тибқи тартиби муқаррарнамудаи қонунгузории Ҷумҳурии Тоҷикистон;

- амалӣ намудани ваколатҳои дигар тибқи қонунгузории Ҷумҳурии Тоҷикистон.

Моддаи 7. Ваколати мақомоти иҷроияи маҳаллии ҳокимияти давлатӣ дар самти таъмини оби нӯшокӣ ва рафъи обҳои партов

Ба ваколати мақомоти иҷроияи маҳаллии ҳокимияти давлатӣ дар самти таъмини оби нӯшокӣ ва рафъи обҳои партов дохил мешавад:

- тасдиқи барномаҳои маҳаллӣ ва нақшаи чорабиниҳо оид ба ташкил, нигоҳдошт ва рушди шабакаҳои таъмини оби нӯшокӣ ва рафъи обҳои партов; 

- андешидани чораҳо ҷиҳати таъмини иҷрои барномаҳои давлатӣ ва минтақавие, ки барои беҳтар намудани таъмини оби нӯшокӣ ва рафъи обҳои партов амалӣ гардонида мешаванд; 

- андешидани чораҳо ҷиҳати таъмини меъёрҳои сифат ва бехатарии обҳои партов, инчунин оби нӯшокӣ ва истифодаи самарабахши он, ҳифзи манбаъҳои таъмини оби нӯшокӣ аз ифлосшавӣ, олудашавӣ ва камобшавӣ;

- ташкили корҳо оид ба таъмини шахсони воқеӣ ва ҳуқуқӣ бо оби нӯшокӣ ва рафъи обҳои партов мувофиқи меъёрҳои муқарраргардида;

- ташкили корҳо ҷиҳати ба таври ҳатмӣ ҷорӣ намудани насби иншооти инфиродӣ ва ҷамъиятии хурди замонавии тозакунандаи обҳои партов ва нобудгардонии партовҳои наҷосатнок дар деҳот;

- мусоидат ба рушди шарикии давлат ва бахши хусусӣ мутобиқи қонунгузории Ҷумҳурии Тоҷикистон дар самти таъмини оби нӯшокӣ ва рафъи обҳои партов;

- амалӣ намудани ваколатҳои дигар тибқи қонунгузории Ҷумҳурии Тоҷикистон.

Моддаи 8. Ваколати мақомоти худидоракунии шаҳрак ва деҳот дар самти таъмини оби нӯшокӣ ва рафъи обҳои партов

Ба ваколати мақомоти худидоракунии шаҳрак ва деҳот дар самти таъмини оби нӯшокӣ ва рафъи обҳои партов дохил мешавад:

- мутобиқи талаботи қонунгузории Ҷумҳурии Тоҷикистон ташкил намудани таъмини истеъмолкунандагон бо оби нӯшокӣ ба миқдори зарурӣ ва сифату бехатарӣ, ҳамчунин рафъи обҳои партов;

- таҳияи пешниҳодҳо ба барномаҳо ва нақшаи чорабиниҳои маҳаллӣ оид ба рушди шабакаҳои таъмини оби нӯшокӣ ва рафъи обҳои партов;

- гузаронидани чорабиниҳо оид ба ташкили минтақаҳои санитарию муҳофизатии манбаъҳо ва шабакаҳои таъмини оби нӯшокӣ ва рафъи обҳои партов, инчунин истифодаи оқилона ва ташкили мониторинги сифат ва бехатарии оби нӯшокӣ ва обҳои партов;

- мусоидат дар ташкили маблағгузорӣ, таъминоти моддию техникии корҳо оид ба таъмини оби нӯшокӣ ва рафъи обҳои партов;

- дар асоси хулосаи мақоми ваколатдори назорати давлатии тандурустӣ ва ҳифзи иҷтимоии аҳолӣ қабули қарор дар бораи манъ ё маҳдуд намудани истифодаи оби нӯшокӣ дар ҳолати ҷавобгӯ набудани он ба талаботи меъёру қоидаҳои санитарӣ;

- пешгирии ҳолатҳои вайронкунии низоми истифодаи минтақаҳои санитарию муҳофизатии манбаъҳо ва шабакаҳои таъмини оби нӯшокӣ ва рафъи обҳои партов;

- мусоидат ба аҳолӣ ҷиҳати риояи талаботе, ки нисбати таъмини оби нӯшокӣ ва рафъи обҳои партов дар ҳолатҳои фавқулода пешбинӣ шудаанд;

- таъмини истеъмолкунандагони оби нӯшокӣ бо иттилооти зарурӣ оид ба сифат ва бехатарии оби нӯшокӣ, меъёрҳои харҷ ва усулҳои сарфаи он, тартиби пардохти ҳаққи хизматрасонии таъмини оби нӯшокӣ ва рафъи обҳои партов;

- амалӣ намудани ваколатҳои дигар тибқи қонунгузории Ҷумҳурии Тоҷикистон.

БОБИ 3. НАМУДҲОИ ШАБАКАҲОИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Моддаи 9. Намудҳои шабакаҳои таъмини оби нӯшокӣ ва рафъи обҳои партов

1. Шабакаҳои таъмини оби нӯшокӣ метавонанд моликияти давлатӣ (ҷумҳуриявӣ ва коммуналӣ), инчунин моликияти шахсони воқеӣ ва ҳуқуқӣ бошанд. 

2. Гузаштани ҳуқуқи моликият ё тағйирдиҳии шакли моликият, пешниҳоди ҳуқуқи истифодабарии шабакаҳои давлатии таъмини оби нӯшокӣ ва рафъи обҳои партов ба муҳлати муайян ва (ё) бе муқаррар намудани муҳлат дар ҳар шакле, ки қонунгузории Ҷумҳурии Тоҷикистон манъ накардааст, бо шарти халалдор нагардидани фаъолияти ин шабакаҳо роҳ дода мешавад.

3. Соҳибмулкони шабакаҳои таъмини оби нӯшокӣ ва рафъи обҳои партов метавонанд, дар ҳар шакле, ки қонунгузории Ҷумҳурии Тоҷикистон манъ накардааст, ба шахсони воқеӣ ва ҳуқуқӣ, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, иттиҳодияҳои истифодабарандагони об, ки хизматрасонии ин шабакаҳоро амалӣ менамоянд, ҳуқуқи истифодабарии шабакаҳоро пешниҳод намоянд.

4. Ҳангоми халалдор гардидани фаъолият ва риоя накардани шартҳои техникии таъмини оби нӯшокӣ ва рафъи обҳои партов, ки ба саломатии аҳолӣ хатар доранд, шабакаҳои ғайридавлатии мутамарказ, ғайримутамарказ ва мухтори таъмини оби нӯшокӣ ва рафъи обҳои партов ба моликияти давлатӣ бо тартиби муайянгардидаи Қонунгузории Ҷумҳурии Тоҷикистон гирифта шуда, барои ташкили беҳтари истифодабарӣ ба ташкилоти дигар тибқи тартиби муайянкардаи Қонунгузории Ҷумҳурии Тоҷикистон супорида мешаванд.

5. Ҳуқуқи истифодабарӣ, пешбурди хоҷагидорӣ ва идоракунии оперативии шабакаҳои давлатии таъмини оби нӯшокӣ ва рафъи обҳои партов дар ҳолатҳои зерин қатъ карда мешавад:

- халалдоргардии бисёркаратаи фаъолияти ин шабакаҳо;

- мунтазам таъмин нагардидани меъёрҳои сифат ва бехатарии оби нӯшокӣ, инчунин партофтани обҳои партов ба муҳити табиӣ. 

6. Қарор оид ба қатъи ҳуқуқи истифодабарӣ, пешбурди хоҷагидорӣ ва идоракунии оперативии шабакаҳои давлатии таъмини оби нӯшокӣ ва рафъи обҳои партов аз ҷониби Ҳукумати Ҷумҳурии Тоҷикистон, мақоми ваколатдори давлатӣ дар самти таъмини оби нӯшокӣ ва рафъи обҳои партов, мақомоти иҷроияи маҳаллии ҳокимияти давлатӣ,  мақомоти худидоракунии шаҳрак ва деҳот вобаста ба ваколати онҳо қабул карда мешавад.

7. Қарор оид ба қатъ намудани ҳуқуқи моликият ва истифодабарии шабакаҳои ғайридавлатии таъмини оби нӯшокӣ ва рафъи обҳои партов бо пешниҳоди мақоми ваколатдори давлатӣ ва мақомоти иҷроияи маҳаллии ҳокимияти давлатӣ тибқи қонунгузории Ҷумҳурии Тоҷикистон бо тартиби судӣ амалӣ карда мешавад. 

Моддаи 10. Шабакаҳои мутамаркази таъмини оби нӯшокӣ ва рафъи обҳои партов

1. Шабакаҳои мутамаркази таъмини оби нӯшокӣ асоси таъмини муттасили истеъмолкунандагон бо оби нӯшокӣ буда, иншооти ҳаётан муҳим дониста мешаванд.

2. Номгӯи таҷҳизот, мавод ва реагентҳо барои дастрасии оби нӯшокӣ, ки барои фаъолияти ташкилоти аз шабакаи мутамаркази обтаъминкунии шаҳрҳо ва минтақаҳои дигари аҳолинишин истифодабаранда заруранд, ба номгӯи маҳсулоти зарурии эҳтиёҷоти давлатӣ дохил карда мешавад.

3. Идоракунии шабакаҳои мутамаркази таъмини оби нӯшокӣ ва рафъи обҳои партовро соҳибмулкони он метавонанд мустақилона амалӣ гардонанд ва ё ҳуқуқи истифодабариро ба шахсони дигари ҳуқуқӣ диҳанд.

Моддаи 11. Шабакаҳои ғайримутамарказ ва мухтори таъмини оби нӯшокӣ ва рафъи обҳои партов

1. Шабакаҳои ғайримутамарказ ва мухтори таъмини оби нӯшокӣ ва рафъи обҳои партов барои бо оби нӯшокӣ ва рафъи обҳои партов таъмин намудани истеъмолкунандагон ҳангоми набудани шабакаҳои мутамаркази таъмини оби нӯшокӣ ва рафъи обҳои партов ташкил карда мешаванд. 

2. Талабот ба интихоби манбаъҳои таъмини оби нӯшокӣ барои шабакаҳои ғайримутамарказ ва мухтори обтаъминкунӣ ва ҷойгиркунии шабакаҳои рафъи обҳои партови ба онҳо мутобиқ ва тозакунии обҳои партов тибқи қонунгузории Ҷумҳурии Тоҷикистон муқаррар карда мешаванд.

3. Идоракунии шабакаҳои ғайримутамарказ ва мухтори таъмини оби нӯшокӣ ва рафъи обҳои партовро молики ин шабакаҳо метавонад мустақилона амалӣ гардонад, ё ин ки ҳуқуқи идоракуниро ба шахсони дигари воқеӣ ва ҳуқуқӣ пешниҳод намояд.

Моддаи 12. Шабакаҳои таъмини оби нӯшокӣ ва рафъи обҳои партов дар воситаҳои нақлиёт

1. Шабакаҳои таъмини оби нӯшокӣ ва рафъи обҳои партов дар воситаҳои нақлиёт ҷузъи таркибии ин воситаҳо мебошанд. Фаъолияти муътадили шабакаҳои таъмини оби нӯшокӣ ва рафъи обҳои партов дар воситаҳои нақлиёт, мутобиқати сифат ва бехатарии оби нӯшокӣ ва обҳои партов дар ин шабакаҳоро соҳибони воситаҳои нақлиёт тибқи талаботи меъёрӣ таъмин менамоянд.

2. Рафъи обҳои партов дар воситаҳои нақлиёт, инчунин бартарафсозии обҳои партов мутобиқи талаботи меъёр ва қоидаҳои санитарӣ амалӣ гардонида мешавад.

3. Назорати таъмини оби нӯшокӣ ва рафъи обҳои партов дар воситаҳои нақлиёт аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ амалӣ гардонида мешавад.

БОБИ 4. ТАНЗИМИ ДАВЛАТӢ, МАБЛАҒГУЗОРӢ ВА ТАРИФИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Моддаи 13. Танзими давлатии таъмини оби нӯшокӣ ва рафъи обҳои партов

1. Рушди таъмини оби нӯшокӣ ва рафъи обҳои партов тавассути амалигардонии барномаҳои ҷумҳуриявӣ ва минтақавии таъмини аҳолӣ бо оби нӯшокӣ ва рафъи обҳои партов сурат мегирад. Таъмини оби нӯшокӣ ва рафъи обҳои партов ба нақшаҳои рушди иҷтимоию иқтисодии воҳидҳои маъмурию ҳудудӣ дохил карда мешаванд.

2. Лоиҳакашӣ, сохтмон ва азнавсозии шабакаҳои мутамарказ, ғайримутамарказ ва мухтори таъмини оби нӯшокӣ ва рафъи обҳои партов мутобиқи нишондиҳандаҳои баҳисобгирифташудаи нақшаҳои генералии рушди ҳудудҳо, меъёру қоидаҳои сохтмонӣ, стандартҳои давлатӣ, меъёру қоидаҳои санитарӣ ва талаботи экологӣ тибқи тартиби муқарраргардидаи қонунгузории Ҷумҳурии Тоҷикистон амалӣ мегардад. Ҳангоми ба нақша гирифтани чунин лоиҳаҳо талаботи эътимоднокии истифодабарии шабакаҳои мазкур ҳангоми ба онҳо таъсир расонидани омилҳои хусусияти табиӣ ва техногенидошта ба назар гирифта мешавад.

3. Корҳои лоиҳакашӣ, сохтмон ва истифодабарии шабакаҳои таъмини оби нӯшокӣ ва рафъи обҳои партов мутобиқи қонунгузории Ҷумҳурии Тоҷикистон аз ҷониби ташкилотҳои лоиҳакашӣ-кофтуковӣ, сохтмонӣ ва истифодабарӣ, ки дорои иҷозатномаи дахлдор бо ҳуқуқи машғул шудан ба чунин намуди фаъолият мебошанд, анҷом дода мешаванд. 

4. Ҷойгиркунонӣ ва кофтани чоҳҳо бо мақсади таъмини оби нӯшокӣ бе расонидани зарар ба обнокии мавҷудаи кони оби зеризаминӣ мутобиқи тартибе, ки қонунгузории Ҷумҳурии Тоҷикистон муқаррар кардааст, сурат мегирад. 

5. Масъалаҳои рушди таъмини оби нӯшокӣ ва рафъи обҳои партов дар нақшаҳои ҳавзавӣ оид ба идоракунии захираҳои обӣ аҳамияти афзалиятнок доранд. 

Моддаи 14. Назорати давлатӣ ва баҳисобгирӣ дар самти таъмини оби нӯшокӣ ва рафъи обҳои партов

1. Назорати давлатиро дар самти таъмини оби нӯшокӣ ва рафъи обҳои партов мақоми ваколатдори назорати давлатии тандурустӣ ва ҳифзи иҷтимоии аҳолӣ ва мақоми ваколатдори давлатӣ дар соҳаи ҳифзи муҳити зист таъмин менамоянд.

2. Баҳисобгирии манбаъҳои таъмини оби нӯшокӣ ва ҷои партофтани обҳои партовро мақоми ваколатдори давлатӣ дар соҳаи танзими истифодаи захираҳои об бо иштироки мақоми ваколатдори давлатӣ дар соҳаи ҳифзи муҳити зист (обҳои рӯизаминӣ), мақоми ваколатдори давлатӣ дар соҳаи истифодаи қаъри замин (обҳои зеризаминӣ) ва мақоми ваколатдори назорати давлатии тандурустӣ ва ҳифзи иҷтимоии аҳолӣ таъмин менамояд.

3. Муайян намудани сифату бехатарии оби нӯшокӣ ва назорати мувофиқати он ба меъёрҳои муқарраршуда аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ амалӣ мегардад.

4. Баҳисобгирӣ ва ҳисоботдиҳӣ оид ба оби аз шабакаҳои мутамарказ, ғайримутамарказ ва мухтори таъмини оби нӯшокӣ истифодашаванда, инчунин партофтани обҳои партов аз тарафи моликони ин шабакаҳо анҷом дода мешавад.

5. Назорати риояи талаботи стандартҳои давлатӣ оид ба оби нӯшокӣ ва обҳои партов, инчунин тарзу усулҳои назорати ин обҳо аз ҷониби мақомоти ваколатдори давлатӣ оид ба стандартикунонӣ якҷоя бо мақоми ваколатдори назорати давлатии тандурустӣ ва ҳифзи иҷтимоии аҳолӣ ва мақоми ваколатдори давлатӣ дар соҳаи ҳифзи муҳити зист таъмин карда мешавад.

6. Назорати давлатии риояи меъёру қоидаҳои сохтмонӣ ва санитарӣ ҳангоми лоиҳакашӣ ва сохтмони иншооти таъмини оби нӯшокӣ ва рафъи обҳои партов аз ҷониби мақоми ваколатдори давлатӣ оид ба сохтмон ва меъморӣ, инчунин мақоми ваколатдори назорати давлатии тандурустӣ ва ҳифзи иҷтимоии аҳолӣ амалӣ карда мешавад.

7. Назорати давлатӣ ва баҳисобгирӣ дар самти таъмини оби нӯшокӣ ва рафъи обҳои партов бо тартиби муқаррарнамудаи Ҳукумати Ҷумҳурии Тоҷикистон амалӣ карда мешавад.

8. Санҷиши фаъолияти субъектони хоҷагидор тибқи талаботи қонунгузории Ҷумҳурии Тоҷикистон дар бораи санҷиши фаъолияти субъектҳои хоҷагидор амалӣ карда мешавад.

Моддаи 15. Маблағгузорӣ ва тарифи хизматрасонии таъмини оби нӯшокӣ ва рафъи обҳои партов

1. Манбаъҳои маблағгузории таъмини оби нӯшокӣ ва рафъи обҳои партов инҳо мебошанд:

- маблағҳои буҷети ҷумҳуриявӣ ва маҳаллӣ;

- маблағҳои истеъмолкунандагони оби нӯшокӣ ва истифодабарандагони шабакаҳои рафъи обҳои партов мутобиқи тарифҳои тасдиқшуда; 

- маблағҳои ихтиёрии аҳолӣ ва субъектҳои хоҷагидор; 

- маблағҳои дигаре, ки қонунгузории Ҷумҳурии Тоҷикистон манъ накардааст. 

2. Бо мақсади дар як ҷо ҷамъ овардан ва самаранок истифода бурдани маблағҳои дар қисми 1 ҳамин модда номбаршуда, аз ҷумла созмонҳои байналмилалӣ, барои  татбиқи дастовардҳои муосири илмӣ ва техникӣ, барқарорсозӣ, азнавсозӣ ва сохтмони шабакаҳои нави таъмини оби нӯшокӣ ва рафъи обҳои партов мақомоти иҷроияи маҳаллии ҳокимияти давлатӣ бо иштироки шахсони воқеӣ ва ҳуқуқӣ бо тартиби муқаррарнамудаи Ҳукумати Ҷумҳурии Тоҷикистон метавонанд фондҳои боварӣ таъсис диҳанд.

3. Асоси муносибатҳои молиявии ташкилотҳои таъмини оби нӯшокӣ ва рафъи обҳои партов бо истеъмолкунандагон ва мақомоти андозро насби ҳатмии воситаҳои ченкунии оби истифодашуда барои ҳар як муштарӣ ва низоми нархгузории муносиб бо дар назар доштани мавҷудияти кумаки давлатӣ ба баъзе аз воҳидҳои маъмурию ҳудудӣ, ҳолати иҷтимоии табақаҳои гуногуни аҳолӣ ва чораҳои ҳимояи онҳо, даромаднокии соҳибкорон ва ташкилотҳо новобаста аз шакли моликият ташкил медиҳад. 

4. Тарифҳои хизматрасониҳои таъмини оби нӯшокӣ ва рафъи обҳои партов барои ҳар як гурӯҳи истеъмолкунандаи оби нӯшокӣ ва истифодабарандагони шабакаҳои рафъи обҳои партов алоҳида барои  меъёр ва аз меъёр зиёд таркибёфта аз инҳо иборат мебошад:

- қисмати амалиётӣ, ки пардохт аз рӯи нишондоди асбоби баҳисобгирӣ барои ҳар як метри мукааби оби нӯшокӣ рӯёнида мешавад;

- қисмати  хизматрасонӣ,  ки  пардохт аз истеъмол-кунандагони оби нӯшокӣ новобаста аз нишондоди асбоби баҳисобгирии он гирифта мешавад.

5. Тартиби таҳия намудани тарифҳо барои хизматрасонии таъмини оби нӯшокӣ ва рафъи обҳои партов аз ҷониби Ҳукумати Ҷумҳурии Тоҷикистон муайян карда мешавад.

6. Тасдиқи тарифҳо барои хизматрасонии таъмини оби нӯшокӣ ва рафъи обҳои партов, муайян намудани категорияҳои истеъмолкунандагони оби нӯшокӣ ва истифодабарандагони шабакаҳои рафъи обҳои партов ва пешниҳоди имтиёзҳои дахлдорро ба онҳо қонунгузории Ҷумҳурии Тоҷикистон муайян менамояд.

Моддаи 16. Дастгириии давлатии таъмини оби нӯшокӣ ва рафъи обҳои партов

Имтиёзҳои андозӣ, қарзӣ ва имтиёзҳои дигари барои ташкилотҳои таъмини оби нӯшокӣ ва рафъи обҳои партов, новобаста аз шакли моликият, инчунин барои истеҳсолкунандагони таҷҳизот ва маводи таъминкунандаи фаъолияти шабакаҳо ва сармоягузорон тибқи қонунгузории Ҷумҳурии Тоҷикистон муайян карда мешаванд.

БОБИ 5. КАФОЛАТҲОИ ДАВЛАТИИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Моддаи 17. Кафолатҳои давлатии таъмини оби нӯшокӣ ва рафъи обҳои партов

1. Давлат барои рушди таъмини оби нӯшокӣ ва рафъи обҳои партов шароит фароҳам меорад, таъмини истеъмолкунандагонро бо оби нӯшокии ҷавобгӯ ба меъёрҳои муқарраршудаи бехатарӣ, сифат ва миқдор, инчунин шабакаҳои комилан мувофиқи рафъи обҳои партов кафолат медиҳад. 

2. Эҳтиёҷоти истеъмолкунандагон ба оби нӯшокӣ ва рафъи обҳои партов дар маҳалли зист бо тадбирҳои рушди афзалиятноки шабакаҳои мутамарказ ё ғайримутамаркази шабакаи таъмини оби нӯшокӣ ва рафъи обҳои партов, инчунин бо чораҳои дастгирии давлатии онҳо қонеъ гардонида мешавад.

3. Кафолати ҳуқуқи шаҳрвандон ба оби нӯшокии бехатар ва рафъи обҳои партов дар ҷойҳои ҷамъиятӣ (дар роҳҳои оҳан, фурудгоҳҳо, боғҳои фароғатӣ, муассисаҳои варзишӣ ва табобатӣ, муассисаҳои таълимӣ, ҷойҳои оббозикунӣ (пляжҳо) ва дигар, инчунин ҳангоми ҳаракат дар воситаҳои нақлиёт аз тарафи моликони ин иншоот таъмин карда мешавад.

4. Дар ҳолати вайрон шудани кори шабакаҳои таъмини оби нӯшокӣ, ки боиси халалдор шудани таъмини истеъмолкунандагон бо оби нӯшокӣ ва (ё) номувофиқатии сифат ва бехатарии он мегардад, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, моликони шабакаҳо ва ташкилотҳои таъминоти оби нӯшокӣ дар доираи ваколатҳои худ уҳдадоранд, ки барои таъмини истеъмолкунандагон бо оби нӯшокӣ ба миқдор ва муҳлати барои чунин ҳолатҳо муқарраргардидаи меъёри истеъмоли оби нӯшокӣ бо истифода аз манбаъҳо ва шабакаҳои эҳтиётии таъмини оби нӯшокӣ, воситаҳои техникии маишӣ ва тозакунии дастаҷамъонаю безараргардонии об ва ё тариқи кашонидани оби нӯшокӣ бо зарфҳо чораҳо андешанд.

5. Номгӯи чорабиниҳое, ки дар ҳолатҳои халалдоршавии кори шабакаҳои мутамарказ, ғайримутамарказ ва мухтори таъмини оби нӯшокӣ ва рафъи обҳои партов андешида мешаванд, дар нақшаи корҳои таъҷилии таъмин намудани истеъмолкунандагони маҳалли мушаххас бо оби нӯшокӣ муайян мегарданд.

Моддаи 18. Таъмини сифат ва бехатарии оби нӯшокӣ 

Сифат ва бехатарии оби нӯшокие, ки ба истеъмолкунандагон дода мешавад, бояд ба талаботи меъёрӣ мутобиқ буда, бо чораҳои зерин таъмин карда мешавад:

- интихоби мувофиқи манбаи таъмини оби нӯшокӣ, технологияи тоза кардани об ва безараргардонии он;

- назорати мунтазами сифат ва бехатарии оби нӯшокӣ дар шабакаҳои таъмини оби нӯшокӣ;

- дар шабакаҳои таъмини оби нӯшокӣ истифода намудани таҷҳизот, мавод, реагентҳое, ки безарар будани онҳоро сертификати муқарраршуда тасдиқ мекунад;

- муқаррар намудан ва ҳар 5 сол аз нав баррасӣ кардани талаботи меъёрӣ нисбат ба оби нӯшокӣ ва манбаъҳои таъмини он мутобиқи дастовардҳои муосири илмӣ;

- ҳифзи манбаъҳо ва шабакаҳои таъмини оби нӯшокии мутамарказ, ғайримутамарказ ва мухтор бо муқаррар намудани минтақаҳои санитарию муҳофизатӣ ва андешидани чораҳои дигари ҳифзи оби нӯшокӣ аз ифлосшавӣ дар ҳолати амалҳои тасодуфӣ ё барқасдона;

- таҳия ва татбиқи нақшаҳои таъмини оби нӯшокӣ бо тартиби муқаррарнамудаи мақоми ваколатдори давлатӣ дар самти таъмини оби нӯшокӣ ва рафъи обҳои партов дар мувофиқа бо мақоми ваколатдори назорати давлатии тандурустӣ ва ҳифзи иҷтимоии аҳолӣ;

- таҳия ва татбиқи барномаҳои кории истифода ва назорати сифату бехатарии оби нӯшокии шабакаҳои обтаъминкунии мутамарказ, ғайримутамарказ ва мухтор вобаста ба шароити маҳал;

- муқаррар намудани чораҳои қатъии назорати даврии сифат ва бехатарии оби нӯшокӣ аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ ҳангоми таҳдиди хатар ба саломатии одамон вобаста ба бад гаштани сифати оби нӯшокӣ.

Моддаи 19. Таъмини сифат ва бехатарии обҳои партов 

Сифат ва бехатарии обҳои партов бояд ба талаботи меъёрӣ мутобиқ буда, бо чораҳои зерин таъмин карда шаванд:

- муқаррар намудани низоми мувофиқ барои партофтани маводи ифлоскунанда ба обҳои партофташаванда барои категорияи истеъмолкунандагони оби нӯшокӣ; 

- таъмин намудани ҳолати меъёрию техникии шабакаҳои рафъи обҳои партов;

- интихоби мувофиқи маҳалли ҷойгиркунонии иншооти тозакунанда ва технологияҳои тозакунии обҳои партов;

- назорати мунтазами сифат ва бехатарии обҳои партов дар шабакаҳои рафъи обҳои партов; 

- дар шабакаи рафъи обҳои партов истифода намудани таҷҳизот, мавод ва реагентҳое, ки бехатарии онҳо бо сертификати муқарраршуда тасдиқ гардидаанд; 

- муқаррар кардан ва ҳар 5 сол аз нав баррасӣ намудани талаботи меъёрӣ нисбат ба обҳои партов ва мутобиқати онҳо ба дастовардҳои муосири илмӣ; 

- муқаррар кардани минтақаҳои санитарию муҳофизатии шабакаҳои рафъи обҳои партов;  

- таҳия ва татбиқи нақшаҳои таъмини бехатарии обҳои партов бо тартиби муқаррарнамудаи мақоми ваколатдори давлатӣ дар самти таъмини оби нӯшокӣ ва рафъи обҳои партов дар мувофиқа бо мақоми ваколатдори давлатӣ дар соҳаи ҳифзи муҳити зист ва мақоми ваколатдори назорати давлатии тандурустӣ ва ҳифзи иҷтимоии аҳолӣ;

- вобаста аз шароити маҳал коркард ва татбиқи барномаҳои кории истифодабарӣ ва истеҳсолии назорати сифат ва бехатарии обҳои партови шабакаҳои рафъи обҳои партов;

- ҳангоми таҳдиди хатар ба саломатии одамон вобаста ба бад шудани сифати обҳои партов муқаррар намудани чораҳои қатъии назорати даврии сифат ва бехатарии обҳои партов аз ҷониби мақоми ваколатдори назорати давлатии тандурустӣ ва ҳифзи иҷтимоии аҳолӣ. 

Моддаи 20. Ҳифзи манбаъҳо ва шабакаҳои таъмини оби нӯшокӣ

1. Ҳифзи манбаъҳои таъмини оби нӯшокӣ аз ифлосшавӣ, хушкшавӣ, камобшавӣ, ҳифзи шабакаҳои таъмини оби нӯшокӣ аз осебу вайроншавӣ, пайвастшавии худсарона шарти ҳатмии таъмини бехатарӣ ва безарарии оби нӯшокӣ буда, бо иҷрои талаботи техникӣ, истифодабарӣ, санитарӣ, экологӣ ва тадбирҳои пешгирӣ аз ифлосшавӣ, хушкшавӣ ва камобшавии иншооти обии рӯизаминӣ ва зеризаминӣ, муқаррар намудани минтақаҳои санитарию муҳофизатии манбаъҳо ва шабакаҳои таъмини оби нӯшокӣ (ғайр аз шабакаҳои таъмини оби нӯшокӣ дар воситаҳои нақлиёт), риояи низоми барои минтақаҳои мазкур муқарраргардида, инчунин муқаррар намудани чораҳои таъсиррасонӣ барои амали барқасдона, ки ба ифлосшавии манбаъҳои таъмини оби нӯшокӣ ва зарар ба шабакаҳои таъмини оби нӯшокӣ оварда мерасонанд, амалӣ мегардад. 

2. Минтақаҳои санитарию муҳофизатӣ барои ҳамаи манбаъҳои таъмини оби нӯшокӣ, инчунин барои шабакаҳои мутамарказ, ғайримутамарказ ва мухтори таъмини оби нӯшокӣ, новобаста аз шаклҳои моликият, мутобиқи меъёру қоидаҳои санитарӣ, сохтмонӣ бо мақсади пешгирӣ намудан аз ифлосшавии тасодуфӣ ва барқасдонаи об муқаррар карда мешаванд.

3. Дар ҳудудҳои якум ва дуюми минтақаҳои санитарию муҳофизатии манбаъҳои таъмини оби нӯшокӣ партофтани обҳои партов ва сохтмони иншооте, ки ба шабакаҳои таъмини оби нӯшокӣ алоқамандӣ надоранд, манъ аст.

4. Дар ҳудуди сеюми минтақаҳои санитарию муҳофизатӣ партофтани обҳои партови шаҳрҳо, корхонаҳои саноатӣ, хоҷагиҳои кишоварзӣ, ки дар таркибашон моддаҳои ифлоскунанда ва унсурҳои биологии аз меъёрҳои дар ҳуҷҷатҳои иҷозатдиҳанда муқарраршуда зиёд доранд, инчунин сохтмони иншоот, ки чунин обҳои партов доранд, манъ аст.

5. Ташкили минтақаҳои санитарию муҳофизатӣ, тартиби лоиҳакашии онҳо, истифода ва муқаррар намудани андоза ва меъёрҳои ба онҳо мувофиқи ҳифзи об, муайян намудани маҷмӯи тадбирҳои ҳифзи санитарӣ, аз ҷумла номгӯи намудҳои фаъолияти манъгардида ва маҳдудшаванда мутобиқи талаботи қоидаву меъёрҳои санитарӣ анҷом дода мешавад.

6. Иҷрои маҷмӯи чорабиниҳои санитарию муҳофизатӣ ва экологӣ ба субъектони зерин вогузор карда мешавад:

- ташкилотҳои таъмини оби нӯшокӣ ва рафъи обҳои партов;

- мақомоти иҷроияи маҳаллии ҳокимияти давлатӣ;

- шахсоне, ки дар ҳудуди ин иншоотҳо фаъолияти хоҷагидориро анҷом медиҳанд.

7. Назорати иҷрои маҷмӯи чорабиниҳо ва риояи талаботи минтақаҳои санитарию муҳофизатӣ ба зиммаи мақоми ваколатдори назорати давлатии тандурустӣ ва ҳифзи иҷтимоии аҳолӣ ва мақоми ваколатдори давлатӣ дар соҳаи ҳифзи муҳити зист вогузор карда мешавад.

8. Мақомоти иҷроияи маҳаллии ҳокимияти давлатӣ метавонанд барои пешгирӣ намудани қасдан ифлос намудан ва осеб расонидан ба манбаъ ва шабакаҳои таъмини оби нӯшокӣ чораҳои иловагӣ андешанд.

Моддаи 21. Ҳифзи шабакаҳои рафъи обҳои партов

1. Ҳифзи шабакаҳои рафъи обҳои партов аз осебу харобшавӣ шарти ҳатмии таъмини фаъолияти устувор ва бехатарии онҳо ба ҳисоб рафта, бо анҷом додани иҷрои талаботи техникӣ, иттилоотӣ, санитарӣ, экологӣ ва чораҳои пешгирии ифлосшавии иншоотҳои об ва дар маҷмӯъ, муҳити зист аз обҳои партов, инчунин муқаррар намудани минтақаҳои санитарию муҳофизатӣ (ғайр аз шабакаҳои рафъи обҳои партов дар нақлиёт), риояи реҷаи муқарраршуда амалӣ карда мешавад. 

2. Шабакаҳои рафъи обҳои партов, новобаста аз шаклҳои моликият ва заминҳои ба онҳо вобаста, бояд танҳо бо мақсадҳое, ки барои онҳо пешбинӣ гардидаанд, истифода бурда шаванд.

3. Минтақаҳои санитарию муҳофизатии шабакаҳои рафъи обҳои партов, новобаста аз шакли моликият, бо мақсади пешгирии харобшавии тасодуфӣ ва барқасдонаи онҳо ва ифлосшавии муҳит муқаррар карда мешаванд. 

4. Ташкили минтақаҳои санитарию муҳофизатӣ, тартиби муқаррар намудани андозаи онҳо, лоиҳакашӣ, истифода ва меъёрҳои ба онҳо мувофиқи ҳифзи муҳити зист, муайянсозии маҷмӯи чораҳои ҳифзи санитарӣ, аз ҷумла номгӯи намудҳои фаъолияти манъгардида ва маҳдудшаванда дар онҳо, мутобиқ ба талаботи меъёр ва қоидаҳои санитарӣ амалӣ карда мешаванд. 

5. Иҷрои маҷмӯи чорабиниҳои ҳифзи санитарӣ ва экологӣ ба субъектони зерин вогузор карда мешавад:

- ташкилотҳои таъмини оби нӯшокӣ ва рафъи обҳои партов;

- мақомоти иҷроияи маҳаллии ҳокимияти давлатӣ; 

- шахсоне, ки дар ҳудуди ин минтақаҳо фаъолияти хоҷагидорӣ анҷом медиҳанд. 

6. Назорати иҷрои маҷмӯи чорабиниҳо ва риояи талаботи минтақаҳои санитарию муҳофизатии  шабакаҳои рафъи обҳои партов   ба зиммаи мақоми ваколатдори назорати давлатии тандурустӣ ва ҳифзи иҷтимоии аҳолӣ ва мақоми ваколатдори давлатӣ дар соҳаи ҳифзи муҳити зист вогузор карда мешавад.

7. Мақомоти иҷроияи маҳаллии ҳокимияти давлатӣ ҳангоми зарурат метавонанд чораҳои иловагӣ андешанд.

Моддаи 22. Кафолати таъмини оби нӯшокӣ дар ҳолатҳои фавқулода

1. Таъмини аҳолӣ бо оби нӯшокӣ дар ҳолатҳои фавқулода (ҳангоми садамаҳо, фалокатҳо, офатҳои табиии фалокатбор, ки дар натиҷаи онҳо манбаъҳои об ифлос мешаванд, шабакаҳои таъмини оби нӯшокӣ осеб мебинанд ва истеъмолкунандагони ин маҳал зиёда аз як шабонарӯз бе об мемонанд) аз тарафи мақомоти иҷроияи маҳаллии ҳокимияти давлатӣ зери роҳбарии комиссия оид ба ҳолатҳои фавқулода ва мудофиаи гражданӣ, инчунин мақомоти худидоракунии шаҳрак ва деҳот амалӣ мегардад.

2. Ҳолатҳои фавқулода дар самти таъмини оби нӯшокӣ аз тарафи мақомоти иҷроияи маҳаллии ҳокимияти давлатӣ якҷоя бо мақоми ваколатдори давлатӣ дар соҳаи ҳифзи муҳити зист пешгӯӣ гардида, барои таъмини истеъмолкунандагон бо оби нӯшокӣ, рафъи обҳои партов ва бартараф намудани оқибатҳои ҳолатҳои фавқулода чораҳо андешида мешаванд.

Моддаи 23. Иттилоот оид ба масъалаҳои таъмини оби нӯшокӣ ва рафъи обҳои партов

1. Иттилоот оид ба масъалаҳои оби нӯшокӣ ва рафъи обҳои партов ба дархосткунанда ройгон дода мешавад. Иттилоот оид ба сифат ва бехатарии оби нӯшокӣ ба истеъмолкунандагон тариқи воситаҳои ахбори омма пешниҳод карда мешавад.

2. Дар ҳолатҳои ошкор гардидани номутобиқатии сифат ва бехатарии оби нӯшокӣ ва обҳои партов ба талаботи меъёрии муқарраршуда, ки метавонад ба саломатии одамон таҳдид намояд, моликони шабакаҳо ва ташкилотҳои таъмини оби нӯшокӣ, мақомоти назораткунандаи мутобиқатии сифат ва бехатарии оби нӯшокӣ ва обҳои партов ба талаботи меъёрӣ уҳдадоранд, истеъмолкунандагони оби нӯшокиро дар бораи муҳлати барҳам додани ин номутобиқатӣ, инчунин чораҳои эҳтиётӣ (чораҳои иловагии коркарди об) ва ё аз маҳалу вақти додани оби нӯшокии ҷавобгӯ ба талаботи  меъёрӣ бетаъхир хабардор намоянд. 

3. Иттилоъ оид ба таваққуфҳои эҳтимолӣ дар таъмини оби нӯшокӣ аз ҷониби ташкилот ва мақоми ваколатдори давлатӣ дар самти таъмини оби нӯшокӣ ва рафъи обҳои партов ба истеъмолкунандагон бо тартиби ҳатмӣ, пешакӣ, расмӣ тавассути воситаҳои ахбори омма ё воситаҳои дигари дастрасии иттилоот расонида мешавад.

4. Ташкил ва назорати таъмини истеъмолкунандагон бо иттилооти саривақтӣ оид ба сифат ва бехатарии оби нӯшокӣ, ғайриимкон будани таъмини доимии он, инчунин вобаста ба масъалаҳои дигари таъмини оби нӯшокӣ ва рафъи обҳои партов ба зиммаи мақомоти иҷроияи маҳаллии ҳокимияти давлатӣ гузошта мешавад.

БОБИ 6. ҲУҚУҚ ВА УҲДАДОРИҲО ДАР САМТИ ТАЪМИНИ ОБИ НӮШОКӢ ВА РАФЪИ ОБҲОИ ПАРТОВ

Моддаи 24. Ҳуқуқ ва уҳдадориҳои моликони шабакаҳои таъмини оби нӯшокӣ ва ташкилотҳои таъмини оби нӯшокӣ ва рафъи обҳои партов

1. Моликони шабакаҳои таъмини оби нӯшокӣ ва рафъи обҳои партов ва ташкилотҳое, ки чунин шабакаҳоро истифода мебаранд, ҳуқуқ доранд:

- мутобиқи шартномаи дуҷониба аз истеъмолкунандагони оби нӯшокӣ ва истифодабарандагони шабакаҳои рафъи обҳои партов барои хизматрасонии оби воқеан додашуда ва рафъи обҳои партов пардохти маблағро талаб намоянд;

- барои ҷуброни зарар ба шахсони воқеӣ ва ҳуқуқӣ, ки сабаби ифлосшавӣ ва (ё) камобшавии манбаъҳои об гаштаанд, инчунин ба шабакаҳои таъмини об ва рафъи обҳои партов осеб расонидаанд, мутобиқи қонунгузории Ҷумҳурии Тоҷикистон ба суд аризаи даъвогӣ пешниҳод намоянд.

2. Моликони шабакаҳои таъмини оби нӯшокӣ ва рафъи обҳои партов ва ташкилотҳое, ки чунин шабакаҳоро истифода мебаранд, уҳдадоранд:

- нақшаҳои таъмини оби нӯшокии бехатар ва рафъи обҳои партовро тибқи тартиби муқаррарнамудаи мақоми ваколатдори давлатӣ дар самти таъмини оби нӯшокӣ ва рафъи обҳои партов таҳия ва амалӣ намоянд;

- шартҳои технологии ҷавобгӯ ба талаботи меъёрҳои оби нӯшокӣ ва обҳои партовро риоя намоянд;

- меъёрҳои мунтазами додани оби нӯшокии босифат ва бехатарро дар навбати аввал барои қонеъ гардонидани эҳтиёҷоти аҳолӣ, инчунин корхонаҳои саноати хӯрокворӣ ва муассисаҳои тиббӣ таъмин кунанд;

- ҳангоми зарурат додани оби нӯшокиро мутобиқи тартиби муқаррарнамудаи Ҳукумати Ҷумҳурии Тоҷикистон бо фосила ба роҳ монанд, маҳдуд созанд, боз доранд ва ё қатъ намоянд;

- таҷҳизот, мавод ва моддаҳои кимиёвии барои фаъолияти обтаъминкунӣ ва рафъи обҳои партов иҷозатдодашударо, ки дорои сертификати мутобиқат ба талаботи муқарраргардида мебошанд, истифода баранд;

- пешбурди баҳисобгирии муҳосибӣ ва ҳисоботи молиявиро мутобиқи қонунгузории Ҷумҳурии Тоҷикистон амалӣ намоянд; 

- оби нӯшокии истифодашуда ва рафъи обҳои партовро ба ҳисоб гиранд, махзани маълумот ва системаи иттилоотӣ таъсис диҳанд ва маълумоти дахлдорро тибқи тартиби муқаррарнамудаи қонунгузории Ҷумҳурии Тоҷикистон ба махзани иттилоотӣ ва системаи миллии иттилоотии захираҳои об ройгон пешниҳод намоянд; 

- ба истифодаи оби нӯшокӣ дар истеҳсолоти корхонаҳое, ки ҷараёни технологиашон истифодаи оби нӯшокиро талаб намекунад, дар ҳолатҳое, ки ин метавонад ба таъмини аҳолӣ бо оби нӯшокӣ бевосита таъсир расонад, роҳ надиҳанд;

- назорати идоравии сифат ва бехатарии оби нӯшокиро мутобиқ ва дар асоси усулҳои санҷидашудаи озмоишгоҳӣ ва ё стандартишуда ташкил намоянд ва истеъмолкунандагонро аз паст шудани сифати оби нӯшокӣ сари вақт огоҳ кунанд;

- мақомоти иҷроияи маҳаллии ҳокимияти давлатӣ, мақомоти ваколатдори давлатӣ дар соҳаи ҳифзи муҳити зист, таъмини оби нӯшокӣ ва рафъи обҳои партов ва мақоми ваколатдори назорати давлатии тандурустӣ ва ҳифзи иҷтимоии аҳолиро аз сар задани фалокат ва ҳолатҳои дигари фавқулодае, ки ба вазъи манбаъҳо ва шабакаҳои таъмини оби нӯшокӣ ва рафъи обҳои партов таъсир мерасонанд, инчунин ба талаботи меъёру қоидаҳои санитарии амалкунанда мувофиқат накардани сифат ва бехатарии оби нӯшокӣ сари вақт огоҳ намоянд;

- барои санҷиши иншооти обтаъминкунӣ ва рафъи обҳои партов аз ҷониби намояндагони мақоми ваколатдори назорати давлатии тандурустӣ ва ҳифзи иҷтимоии аҳолӣ, танзими истифодаи захираҳои об, мақоми ваколатдори давлатӣ дар соҳаи ҳифзи муҳити зист, инчунин мақоми ваколатдори давлатӣ дар самти таъмини оби нӯшокӣ ва рафъи обҳои партов монеъ нашаванд;

- қоидаҳои хоҷагидорӣ ва фаъолияти дигарро, ки барои минтақаҳои санитарию муҳофизатии манбаъҳо ва шабакаҳои таъмини оби нӯшокӣ, инчунин минтақаҳои санитарию муҳофизатии шабакаҳои рафъи обҳои партов муқаррар гардидаанд, риоя намоянд;

- ба вайрон намудани ҳуқуқҳои истеъмолкунандагони дигари оби нӯшокӣ ва расонидани зарар ба муҳити зист роҳ надиҳанд;

- таъмири ҷорӣ ва асосии шабакаҳои таъмини оби нӯшокӣ ва рафъи обҳои партовро сари вақт анҷом диҳанд;

- манбаъҳои таъмини оби нӯшокиро аз ифлосшавӣ, хушкшавию камобшавӣ ва шабакаҳои таъмини оби нӯшокӣ ва рафъи обҳои партовро аз осеб дидан муҳофизат намоянд;

- таҷҳизот ва асбобҳои ченкунии оби нӯшокӣ ва рафъи обҳои партовро насб ва хизматрасонии онҳоро таъмин намоянд. 

3. Ҷавобгарии моликони шабакаҳои таъмини оби нӯшокӣ ва рафъи обҳои партов, ки ҳуқуқи идора кардани ин шабакаҳоро ба ташкилотҳои таъмини оби нӯшокӣ ва рафъи обҳои партов вогузор намудаанд, дар асоси шартномаҳои тарафайн бо риояи муқаррароти қонунгузории Ҷумҳурии Тоҷикистон муайян карда мешавад.

Моддаи 25. Ҳуқуқ ва уҳдадориҳои истеъмолкунандагони оби нӯшокӣ ва истифодабарандагони шабакаҳои рафъи обҳои партов

1. Истеъмолкунандагони оби нӯшокӣ ва истифодабарандагони шабакаҳои рафъи обҳои партов ҳуқуқ доранд:

- аз шабакаҳои мутамарказ, ғайримутамарказ ва мухтори таъмини оби нӯшокӣ мувофиқи меъёрҳои сифат, бехатарӣ ва истеъмолӣ бо оби нӯшокӣ таъмин бошанд;

- назорати сифат ва бехатарии оби нӯшокии ба шабакаҳои мутамарказ, ғайримутамарказ ва мухтор расонидашаванда ва обҳои партови ба шабакаҳои  рафъи обҳои партов партофташавандаро талаб намоянд;

- тибқи тартиби пешбининамудаи қонунгузории Ҷумҳурии Тоҷикистон дар бораи сифат ва бехатарии оби нӯшокӣ ва обҳои партов ва эҳтимолияти таваққуф дар таъмини оби нӯшокӣ сари вақт ва пурра иттилоот гиранд;

- бо тартиби муқарраргардида барои гузаронидани экспертизаи санитарию эпидемиологӣ ва ҷамъиятии экологӣ бо ташаббус муроҷиат ва натиҷаи онро ба мақомоти дахлдори давлатӣ пешниҳод намоянд; 

- мониторинги ҷамъиятӣ гузаронанд;

- ҷуброни зарареро, ки дар натиҷаи таъмини оби нӯшокии ба талаботи меъёрҳо номутобиқ ва аз кори ғайриқаноатбахши шабакаҳои обҳои партов ба онҳо расонида шудааст, талаб намоянд.

2. Шахсони воқеӣ ҳуқуқ доранд, ки дар навбати аввал аз шабакаҳои мутамарказ, ғайримутамарказ ва мухтори таъмини оби нӯшокӣ мувофиқи меъёрҳои сифат, бехатарӣ ва истеъмолӣ бо оби нӯшокӣ таъмин карда шаванд.

3. Истеъмолкунандагони оби нӯшокӣ ва истифодабарандагони шабакаҳои рафъи обҳои партов уҳдадоранд:

- талаботи меъёриро нисбат ба сифат ва бехатарии оби нӯшокӣ ва рафъи обҳои партов, инчунин дигар талаботи муқаррарнамудаи санадҳои меъёрии ҳуқуқии Ҷумҳурии Тоҷикистонро риоя намоянд; 

- ба ифлосшавӣ, олудашавӣ ва камобшавии манбаъҳои таъмини оби нӯшокӣ, инчунин осеб дидани шабакаҳои таъмини оби нӯшокӣ ва рафъи обҳои партов роҳ надиҳанд;

- оби нӯшокиро барои эҳтиёҷоти маишӣ ва истеҳсолӣ самаранок ва оқилона истифода баранд;

- ҳаққи хизматрасонии таъмини оби нӯшокӣ ва рафъи обҳои партовро мувофиқи тарифҳои муқарраргардида сари вақт пардохт намоянд;

- нигоҳдорӣ ва истифодаи дурусти шабакаҳоро таъмин намоянд;

- сари вақт мақомоти иҷроияи маҳаллии ҳокимияти давлатӣ, мақоми ваколатдори назорати давлатии тандурустӣ ва ҳифзи иҷтимоии аҳолӣ мақоми ваколатдори давлатӣ дар соҳаи ҳифзи муҳити зист, таъмини оби нӯшокӣ ва рафъи обҳои партовро аз ҳолати ғайриқаноатбахши шабакаҳо, инчунин амалҳои шахсони воқеӣ ва ҳуқуқӣ, ки метавонанд ба ифлосшавӣ ва (ё) олудашавии манбаъҳои таъмини оби нӯшокӣ, шикастан ва вайрон шудани шабакаи таъмини оби нӯшокӣ ва рафъи обҳои партов оварда мерасонад, хабардор кунанд.

БОБИ 7. МУҚАРРАРОТИ ХОТИМАВӢ

Моддаи 26. Ҷавобгарӣ барои риоя накардани талаботи Қонуни мазкур 

Шахсони воқеӣ ва ҳуқуқӣ барои риоя накардани талаботи Қонуни мазкур бо тартиби муқаррарнамудаи қонунгузории Ҷумҳурии Тоҷикистон ба ҷавобгарӣ кашида мешаванд.

Моддаи 27. Дар бораи аз эътибор соқит донистани Қонуни Ҷумҳурии Тоҷикистон «Дар бораи оби нӯшокӣ ва таъмини он»

Қонуни Ҷумҳурии Тоҷикистон аз 29 декабри соли 2010 «Дар бораи оби нӯшокӣ ва таъмини он» (Ахбори Маҷлиси Олии  Ҷумҳурии  Тоҷикистон,  с.  2010,  №  12,  қ. 1,  мод. 829; с. 2018, № 1, мод.15) аз эътибор соқит дониста шавад.

Моддаи 28. Тартиби мавриди амал қарор додани Қонуни мазкур

Қонуни мазкур пас аз интишори расмӣ мавриди амал қарор дода шавад.

        Президенти 

Ҷумҳурии Тоҷикистон                                                                              Эмомалӣ РАҲМОН

           ш. Душанбе,

19 июли соли 2019,

          № 1633