Маркази миллии қонунгузории назди Президенти Ҷумҳурии Тоҷикистон

ДАСТУРИ ИСТИФОДАБАРАНДА

ХУШ ОМАДЕД БА CОМОНАИ РАСМИИ МАРКАЗИ МИЛЛИИ ҚОНУНГУЗОРИИ НАЗДИ ПРЕЗИДЕНТИ ҶУМҲУРИИ ТОҶИКИСТОН!

КОР БО МАХЗАНИ ҚОНУНГУЗОРИИ ҶУМҲУРИИ ТОҶИКИСТОН

Муҳтарам меҳмонон ва истифодабарандагони сомонаи расмии Маркази миллии қонунгузории назди Президенти Ҷумҳурии Тоҷикистон (ММҚ),

Барои оғози кор бо «Махзани Қонунгузории Ҷумҳурии Тоҷикистон» (МҚҶТ) ба блоки бо номи шабеҳ дар сомонаи расмии ММҚ зер кунед. Блоки «Махзани Қонунгузории Ҷумҳурии Тоҷикистон» кушодашаванда буда, ҳамеша дар қисми болои сомона дастрас аст. Шумо инчунин метавонед ба «Махзани Қонунгузории Ҷумҳурии Тоҷикистон» (МҚҶТ) аз феҳристи асосӣ (меню асосӣ) бо зеркунии пайванди «Қонунгузории Ҷумҳурии Тоҷикистон» дастрасӣ пайдо намоед.

БЛОКИ «МАХЗАНИ ҚОНУНГУЗОРИИ ҶУМҲУРИИ ТОҶИКИСТОН» (МҚҶТ)

Ҳамаи модулҳо ва имконоти ҷустуҷӯи санадҳо дар «Махзани Қонунгузории Ҷумҳурии Тоҷикистон» (МҚҶТ) мустақилона кор мекунанд. Ин маънои онро дорад, ки ҳангоми кор бо МҚҶТ ворид кардани «Ном»-и санад ва бо ҳамроҳи он интихоб кардани ҳамаи имконоти дигар, масалан «Таснифгар», «Мақомот», «Рақам», «Сана», «Матни асосӣ» ва ғайра ҳатмӣ нест. Аммо барои ҷустуҷӯи васеъ шумо метавонед аз ҳамаи имконоти ҷустуҷӯи санадҳо ба таври дилхоҳ истифода баред. Ҳамаи санадҳое, ки ба МҚҶТ ворид шуданд дар зери «Лавҳаи имконоти ҷустуҷӯ», яъне дар «Ҷадвали санадҳо» дастрасанд.

ЛАВҲАИ ИМКОНОТИ ҶУСТУҶӮ

Лавҳаи имконоти ҷустуҷӯ

ҶАДВАЛИ САНАДҲО

ТУГМАҲОИ «ТАТБИҚ КАРДАН» ва «БОЗСОЗӢ»

Тугмаи «Татбиқ кардан»: Баъд аз он ки Шумо дар «Лавҳаи имконоти ҷустуҷӯ» имконоти дилхоҳро ворид карда, интиход мекунед, барои намоиш додани натиҷа тугмаи «Татбиқ кардан»-ро зер кунед. Аммо, вақте ки шумо дар «Лавҳаи имконоти ҷустуҷӯ» дархостеро ворид мекунед ё имконеро интихоб менамоед, онҳо ба таври худкор дарҳол татбиқ карда мешаванд.

Тугмаи «Бозсозӣ»: Агар хоҳед, ки ҳамаи дархостҳо ва имконотеро дар «Лавҳаи имконоти ҷустуҷӯ» лағв кунед, аз тугмаи «Бозсозӣ» истифода баред.

Агар шумо хоҳед, ки номи санади дақиқро аз санадҳои дар махзан мавҷудбуда ба даст оред, калидвожаи номи санадро ба сатри «Ном» ворид намоед. Ҳамаи санадҳое, ки дорои калидвожаи воридуша мебошанд нишон дода мешаванд. Масалан, агар шумо калидвожаи «дастрасӣ»-ро ворид кунед, санадҳое, ки калимаи «дастрасӣ»-ро дар бар мегиранд, дар «Ҷадвали санадҳо» нишон дода мешаванд (масалан, ҚОНУНИ ҶУМҲУРИИ ТОҶИКИСТОН ДАР БОРАИ ҲУҚУҚИ ДАСТРАСӢ БА ИТТИЛООТ)

САТРИ «НОМ»

Шумо инчунин метавонед санадҳоро аз рӯи муҳтаво бо истифодаи сатри «Матни асосӣ» ва полои дилҳол ҷустуҷӯ намоед. Масалан, барои ёфтани санад(ҳо)и дорои калима(ҳо), калидвожа(ҳо) ё ибора(ҳо)и лозимӣ, ба сатри «Матни асосӣ» дархостро ворид намуда, имкони «Дар бар мегирад»-ро интихоб намоед. Санадҳои дархостшуда ба таври худкор нишон дода мешаванд. Ё ин ки аз тугмаи «Татбиқ кардан» истифода баред. Ҳамин тавр аз имкони «Дар бар намегирад» ё имконоти ҷустуҷӯи дигар истифода баред, Масалан, агар шумо ба сатри «Матни асосӣ» калимаи «Интернет»-ро ворид кунед ва имкони «Дар бар мегирад»-ро интихоб намоед, саданҳое, ки дар муҳтавои худ дорои калимаи «Интернет» мебошанд, нишод дода мешаванд.

САТРИ «МАТНИ АСОСӢ»

Сатри «Матни асосӣ»

Шумо метавонед санадҳоро аз рӯи «Ном», «Таснифгар», «Мақомот», «Рақам», «Сана», «Матни асосӣ» ва ғайра алоҳида ё якҷоя ба таври дилхоҳ ҷустуҷӯ намоед.

Масалан, агар хоҳед, ки санадҳоро танҳо «Аз рӯи моҳ ва сол» ҷустуҷӯ кунед, танҳо аз имкони «Аз рӯи моҳ ва сол» бо интихоби моҳ ва сол истифода баред. Санадҳо ба таври худкор нишон дода мешаванд. Ё ин ки аз тугмаи «Татбиқ кардан» истифода баред.

Агар хоҳед, ки санадҳоро танҳо дар давраи муайян ҷустуҷӯ кунед, танҳо аз имкони «Аз санаи интихобшуда» ва/ё «То санаи интихобшуда» алоҳида ё якҷоя бо интихоби моҳ ва сол истифода баред. Санадҳо ба таври худкор нишон дода мешаванд. Ё ин ки аз тугмаи «Татбиқ кардан» истифода баред.

Ҳамин тавр Шумо метавонед ҳар гуна санадҳои махзанро алоҳида ё бо интихоби имконоти иловагӣ ҷустуҷӯ намоед ва ба даст оред.

Барои дидани санад ва мутолиа кардани он, аз тугмаи «ДИДАН» истифода баред ва барои пинҳон кардани он, аз тугмаи «ПИНҲОН КАРДАН» истифода баред.

ТУГМАҲОИ «ДИДАН» ва «ПИНҲОН КАРДАН»

Шумо ҳам метавонед, бо зеркунии пайванди номи санад онро дар саҳифаи алоҳида кушоед ё ин ки дар форматҳои Word, PDF ва ZIP аз сомонаи мо боргирӣ намоед.

ЗАМИМА ДАР ФОРМАТҲОИ WORD, PDF ва ZIP (ДАР ҶАДВАЛИ САНАДҲО)

Замима

КОР БО СОМОНАИ РАСМӢ - БАҚАЙДГИРӢ ВА ВОРИДШАВӢ

Ҳамаи маводҳои Маркази миллии қонунгузории назди Президенти Ҷумҳурии Тоҷикистон, ки ба ахбори омма дахл доранд, дар сомонаи мо дастрасанд. Барои гирифтани маълумот Шумо метавонед аз Феҳристи асосӣ (менюи асосӣ), Харитаи сомона, имкони Ҷустуҷӯ ва Ҷустуҷӯи васеъ истифода баред.
Барои бақайдгирӣ дар сомонаи Маркази миллии қонунгузории назди Президенти Ҷумҳурии Тоҷикистон, лутфан ба таври расмӣ муроҷиат намоед. Корбарони бақайдгирифташуда метавонанд аз имкониятҳои иловагӣ истифода баранд, масалан, пайдо кардани дастрасӣ ба лоиҳаҳои санадҳо.

Махзани Қонунгузории Ҷумҳурии Тоҷикистон

Матни асосӣ:
Дидан

**ҚОНУНИ**

**ҶУМҲУРИИ ТОҶИКИСТОН**

**ДАР БОРАИ АВФ**

(Ахбори Маҷлиси Олии Ҷумҳурии Тоҷикистон, соли 2006, №8-9, мод. 380)

Ба муносибати понздаҳумин солгарди истиқлолияти давлатии Ҷумҳурии Тоҷикистон ва бо дарназардошти принсипи башардустӣ Маҷлиси намояндагони Маҷлиси Олии Ҷумҳурии Тоҷикистон Қонуни мазкурро қабул мекунад.

**Моддаи 1.**

Маҳкумшудагоне, ки бори аввал ҷиноят содир намудаанд, аз ҷазои маҳрум сохтан аз озодӣ сарфи назар аз мўҳлати ҷазои таъиншуда, инчунин аз ҷазоҳои бо маҳрум сохтан аз озодӣ алоқаманднабуда озод карда шаванд:

а) занҳо;

б) шахсоне, ки дар давраи содир кардани ҷиноят ба синни ҳаждаҳсолагӣ нарасидаанд;

в) мардони аз 55-сола боло;

г) маъюбони гурўҳҳои I ва II;

д) иштирокчиёни Ҷанги Бузурги Ватанӣ, иштирокчиёни амалиётҳои ҷангӣ дар ҳудуди дигар давлатҳо, шахсоне, ки дар рафъи оқибатҳои садамаи Нерўгоҳи барқии атомии Чернобил иштирок намудаанд ва ё аз фалокати Чернобил ҷабр дидаанд;

е) шаҳрвандони хориҷӣ.

**Моддаи 2.**

Маҳкумшудагоне, ки аз беэҳтиётӣ ҷиноят содир намудаанд ва барои он то даҳ сол аз озодӣ маҳрум карда шудаанд ё ба ҷазои бо маҳрум сохтан аз озодӣ алоқаманднабуда маҳкум шудаанд, аз ҷазо озод карда шаванд.

**Моддаи 3.**

Маҳкумшудагоне, ки барои қасдан содир кардани ҷиноят ба ҷазои бо маҳрум сохтан аз озодӣ маҳкум шудаанд, озод карда шаванд:

а) маҳкумшудагоне, ки бори аввал ба мўҳлати то панҷ сол маҳкум шудаанд;

б) маҳкумшудагоне, ки бори аввал ба мўҳлати то дувоздаҳ сол маҳкум шудаанд ва агар на камтар аз се ду ҳиссаи мўҳлати ҷазоро дар ҷойҳои маҳрумӣ аз озодӣ адо карда бошанд;

в) маҳкумшудагоне, ки бори аввал ба мўҳлати зиёда аз дувоздаҳ сол маҳкум шудаанд ва на камтар аз чор се ҳиссаи мўҳлати ҷазоро дар ҷойҳои маҳрумӣ аз озодӣ адо карда бошанд.

**Моддаи 4.**

Маҳкумшудагоне, ки нисбат ба онҳо ҷазо шартан татбиқ карда нашудааст ё ҷазоро дар колонияҳои ислоҳии сукунат адо мекунанд, ба истиснои шахсоне, ки ҷинояти махсусан вазнин содир кардаанд, инчунин онҳое, ки ба дигар ҷазои новобаста ба маҳрумӣ аз озодӣ маҳкум гардидаанд, аз ҷазо озод карда шаванд.

**Моддаи 5.**

Тафтиши парвандаҳои зерин, ки таҳти таҳқиқ ва тафтиши пешакӣ қарор доранд ва парвандаҳое, ки аз тарафи судҳо баррасӣ нагардидаанд, қатъ карда шаванд:

а) дар бораи ҷиноятҳое, ки то эътибор пайдо кардани ҳамин Қонун аз тарафи шахсони дар моддаи 1 Қонуни мазкур номбаршуда содир гардидаанд;

б) дар хусуси ҷиноятҳое, ки барои онҳо Кодекси ҷиноятии Ҷумҳурии Тоҷикистон ҷазоҳои бо маҳрум сохтан аз озодӣ алоқаманднабударо пешбинӣ намудааст;

в) нисбати шахсоне, ки аз беэҳтиётӣ ҷиноят содир кардаанд ва барои он Кодекси ҷиноятии Ҷумҳурии Тоҷикистон ҷазои маҳрум сохтан аз озодиро ба мўҳлати то даҳ сол пешбинӣ намудааст;

г) нисбати шахсоне, ки қасдан ҷиноят содир намудаанд ва Кодекси ҷиноятии Ҷумҳурии Тоҷикистон барои он ба мўҳлати то панҷ сол ҷазои аз озодӣ маҳрум сохтанро пешбинӣ намудааст.

**Моддаи 6.**

Мўҳлати адонагардидаи ҷазои шахсоне, ки ба маҳрум сохтан аз озодӣ маҳкум шудаанд ва таҳти амали моддаҳои 1-4 ҳамин Қонун қарор намегиранд, ба истиснои шахсоне, ки дар моддаҳои 8 ва 15 ҳамин Қонун зикр гардидаанд, кам карда шавад:

а) маҳкумшудагоне, ки барои қасдан содир намудани ҷиноят ба мўҳлати то дувоздаҳ сол аз озодӣ маҳрум шудаанд - аз се як ҳисса;

б) маҳкумшудагоне, ки барои қасдан содир намудани ҷиноят ба мўҳлати зиёда аз дувоздаҳ сол аз озодӣ маҳрум гардидаанд-аз чор як ҳисса;

в) маҳкумшудагоне, ки аз беэҳтиётӣ ҷиноят содир кардаанд ва ба маҳрумӣ аз озодӣ зиёда аз даҳ сол маҳкум шудаанд-нисфи мўҳлати ҷазо.

**Моддаи 7.**

Нисбати шахсоне, ки барои ҷиноятҳои зерин ба ҷавобгарии ҷиноятӣ кашида шудаанд, ё маҳкум гардидаанд, амали моддаҳои 1, 3 ва 5 ҳамин Қонун татбиқ карда нашавад:

а) барои ҷиноятҳои бо моддаҳои 61-70, 74, 75 қисми 2, 76 қисмҳои 3 ва 4 (ба истиснои воситаҳои нашъадор), 89 қисми 4, 90 қисми 4, 91 қисмҳои 2 ва 3, 95 қисми 3, 96, 99 қисми 2, 104, 105, 111 қисми 2, 121, 135 қисми 3, 154 қисми 4, 155, 156, 160 қисми 3, 186 қисмҳои 2 ва 3, 187 қисми 2, 187¹ қисми 2, 206 ¹, 220 қисми 3, 227 қисми 3, 233 қисми 3, 234 қисмҳои 1 ва 2, 234¹, 240 қисми 2, 240¹, 241 қисми 3, 241², 249 банди «в», 250 бандҳои «б» ва «в», 252 банди «б», 260, 261 банди «в», 270 банди «в», 276- 277 Кодекси ҷиноятии Ҷумҳурии Тоҷикистон (таҳрири соли 1961) пешбинишуда;

б) барои ҷиноятҳои бо моддаҳои 104, 110 қисмҳои 2 ва 3, 130 қисмҳои 2 ва 3, 130¹ қисмҳои 2 ва 3, 131 қисми 3, 132 қисми 3, 138, 139 қисмҳои 2, 3 ва 4, 167, 179, 181, 184 қисми 3, 186, 187, 189, 195 қисмҳои 2 ва 3, 196 қисмҳои 2 ва 3, 199, 200 қисми 4, 201 қисми 4, 202 қисмҳои 2 ва 3, 202¹ қисми 3, 202² қисми 3, 203 қисми 3, 204 қисмҳои 3 ва 4, 205 қисми 2, 206 қисмҳои 2 ва 3, 212 қисми 3, 237 қисми 3, 244 қисмҳои 3 ва 4, 245 қисмҳои 3 ва 4, 246 қисми 3, 247 қисмҳои 3 ва 4, 248 қисмҳои 2, 3 ва 4, 249, 250, 252 қисмҳои 2 ва 3, 289 қисмҳои 2, 3 ва 4 (бо истиснои воситаҳои нашъадор), 305-310, 313, 316 қисми 3, 319 қисмҳои 3 ва 4, 329, 331, 332, 364, 365, 368 қисми 2, 369 қисмҳои 2 ва 3, 370 қисмҳои 2 ва 3, 382, 386 қисми 4, 391 қисмҳои 3 ва 4, 395- 405 Кодекси ҷиноятии Ҷумҳурии Тоҷикистон (таҳрири соли 1998) пешбинишуда;

в) шахсоне, ки кирдорашон боиси марги ду ё бештар шахс гардидааст ва маҳкумшудагоне, ки ҷинояти қасдонаро дар маҳалли адои ҷазо дар намуди маҳрум сохтан аз озодӣ содир кардаанд;

г) маҳкумшудагоне, ки мувофиқи Кодекси ҷиноятии Ҷумҳурии Тоҷикистон ретсидивистони махсусан хавфнок эътироф шудаанд ва ё ҷиноятро дар ҳолати ретсидиви махсусан хавфнок содир намудаанд;

д) шахсоне, ки пештар ба тариқи бахшиши ҷазо ё авфи умумӣ аз ҷавобгарии ҷиноятӣ ва ҷазо озод карда шудаанд ва боз қасдан ҷиноят содир намудаанд, агар мўҳлати ҷазое, ки аз рўи он авфи умумӣ ё бахшидани ҷазо татбиқ карда шудааст, нагузашта бошад;

е) маҳкумшудагоне, ки тартиби муқарраргардидаи адои ҷазоро ба таври ашаддӣ вайрон кардаанд, ба истиснои маҳкумшудагоне, ки дар бандҳои «а», «в» ва «г»-и моддаи 1 ҳамин Қонун нишон дода шудаанд.

**Моддаи 8.**

Амали моддаи 6 ҳамин Қонун ба шахсоне, ки бо моддаҳои 61-70, 74, 104, 121 қисмҳои 3 ва 4, 156 Кодекси ҷиноятии Ҷумҳурии Тоҷикистон (таҳрири соли 1961) ва шахсоне, ки бо моддаҳои 104, 179, 138 қисми 3, 186, 189, 247 қисмҳои 3 ва 4, 249 қисмҳои 3 ва 4, 305-310, 313, 395-405 Кодекси ҷиноятии Ҷумҳурии Тоҷикистон (таҳрири соли 1998) маҳкум шудаанд, инчунин шахсоне, ки кирдорашон боиси марги ду ё бештар шахс гардидааст ё ҷинояти қасдонаро дар маҳалли адои ҷазо дар намуди маҳрум сохтан аз озодӣ содир кардаанд, татбиқ карда намешавад.

**Моддаи 9.**

Ҳамин Қонун нисбати шахсоне, ки аз ҷониби мақомоти таҳқиқи ибтидоӣ ва тафтиши пешакӣ ба ҷавобгарии ҷиноятӣ кашида шудаанд, ё аз ҷониби судҳои Ҷумҳурии Тоҷикистон маҳкум шудаанд ва то эътибор пайдо кардани ҳамин Қонун ҷиноят содир намудаанд, инчунин нисбати шаҳрвандони Ҷумҳурии Тоҷикистон, ки аз ҷониби судҳои давлатҳои Иттиҳоди Давлатҳои Мустақил маҳкум шудаанд ва барои минбаъд адо намудани ҷазо ба Ҷумҳурии Тоҷикистон оварда шуда буданд, татбиқ карда мешавад. Татбиқи Қонуни мазкур доғи судии шахсро намебардорад.

**Моддаи 10.**

Иҷрои ҳамин Қонун ба зиммаи мақомоти зерин гузошта шавад:

а) мақомоти таҳқиқи ибтидоӣ ва тафтиши пешакӣ нисбати шахсоне, ки парванда ва мавод оид ба ҷиноятҳояшон таҳти баррасии ин мақомот қарор доранд, инчунин шахсоне, ки парвандаҳои ҷиноятӣ нисбати онҳо таҳти тафтиши пешакӣ ва таҳқиқ қарор дошта, дар кофтуков мебошанд;

б) судҳо:

-нисбати шахсоне, ки парванда ва мавод оид ба ҷиноятҳояшон дар суд таҳти баррасӣ қарор дошта, то эътибор пайдо намудани ҳамин Қонун баррасӣ нашудаанд, инчунин маҳкумшудагоне, ки парвандаҳои ҷиноятиашон баррасӣ гардида, вале ҳукми онҳо эътибори қонунӣ пайдо накардаанд;

-нисбати маҳкумшудагоне, ки иҷрои ҳукмашон мавқуф гузошта шудааст ва маҳкумшудагоне, ки нисбати онҳо бо ҳукми суд ҷазо шартан татбиқ карда нашудааст (масъалаи татбиқи авф аз рўи пешниҳоди нозироти корҳои ислоҳие, ки рафтори маҳкумшударо назорат менамояд, аз ҷониби суди маҳалли иҷрои ҳукм ё зисти маҳкумшуда ҳал карда мешавад);

-нисбати маҳкумшудагоне, ки аз маҳалли маҳрум сохтан аз озодӣ шартан пеш аз мўҳлат аз ҷазо озод шудаанд, ё қисми адонагардидаи ҷазои нисбати онҳо таъиншуда то эътибор пайдо намудани ҳамин Қонун ба ҷазои сабуктар иваз карда шудааст (масъалаи татбиқи санади авфро суди маҳалли иҷрои ҳукм ё зисти маҳкумшуда бо пешниҳоди нозироти корҳои ислоҳӣ ҳал мекунад);

-нисбати маҳкумшудагоне, ки ба ҷазои ҷарима маҳкум шудаанд, агар то эътибор пайдо кардани ҳамин Қонун ҷарима бо сабабҳои узрнок ситонида нашуда бошад (масъалаи татбиқи авфро суде, ки ҳукм баровардааст, бо пешниҳоди иҷрочии суд ҳал менамояд);

в) муассисаҳои системаи иҷрои ҷазои ҷиноятии Раёсати корҳои ислоҳии Вазорати адлияи Ҷумҳурии Тоҷикистон:

-нисбати маҳкумшудагоне, ки ба ҷазои маҳрум сохтан аз озодӣ маҳкум шудаанду дар ҳабс нестанд ва ҳукмҳо нисбати онҳо эътибори қонунӣ пайдо кардаанд;

-нисбати маҳкумшудагоне, ки ҷазоро дар намуди корҳои ҳатмӣ, корҳои ислоҳӣ дар ҷои корашон, ё дар ҷойҳои дигаре, ки мақомоти иҷрокунандаи ҳукм муайян менамояд, маҳрум намудан аз ҳуқуқи ишғоли мансабҳои муайян, ё машғул шудан бо фаъолияти муайян адо мекунанд;

-нисбати маҳкумшудагоне, ки дар ҷойҳои маҳрумӣ аз озодӣ буда, ҳукм нисбати онҳо эътибори қонунӣ пайдо кардааст;

-нисбати маҳкумшудагоне, ки ҷазоро дар колонияҳои ислоҳии сукунат адо мекунанд;

г) фармондеҳии қисмҳои ҳарбии интизомӣ нисбати хизматчиёни ҳарбие, ки ба нигоҳ доштан дар қисми ҳарбии интизомӣ маҳкум шудаанд.

**Моддаи 11.**

Озод намудани маҳкумшудагон аз ҷазоҳои иловагӣ, ки то рўзи ба қувваи қонунӣ даромадани ҳамин Қонун иҷро нашудаанд, ба зиммаи мақомот ва муассисае гузошта мешавад, ки масъалаи аз ҷазои асосӣ озод намудани чунин маҳкумшудагон гузошта шудааст.

**Моддаи 12.**

Қарор дар бораи татбиқ кардан ё накардани авф нисбати ҳар як шахс алоҳида қабул карда мешавад. Дар сурати мавҷуд набудани маълумоти зарурӣ дар бораи маҳкумшуда муҳокимаи масъалаи татбиқи авф то пайдо намудани ҳуҷҷатҳои иловагӣ, вале на дертар аз як моҳ мавқуф гузошта мешавад.

**Моддаи 13.**

Қарор дар бораи татбиқи авф, ки аз тарафи мақомоти таҳқиқи ибтидоӣ ва тафтиши пешакӣ, фармондеҳии қисмҳои интизомии ҳарбӣ, муассисаҳои системаи иҷрои ҷазои ҷиноятии Раёсати корҳои ислоҳии Вазорати адлияи Ҷумҳурии Тоҷикистон қабул карда мешавад, аз ҷониби прокурор иҷозат (санксия) дода мешавад.

Ҳангоми татбиқи санади авф аз ҷониби судҳо иштироки прокурор ҳатмист.

**Моддаи 14.**

Ҳангоми татбиқи Қонуни мазкур бояд ба назар гирифта шавад:

а) зербанди «а» моддаи 1 Қонуни мазкур нисбати заноне татбиқ мегардад, ки то рўзи ба қувваи қонунӣ даромадани ҳамин Қонун ҷиноят содир кардаанд;

б) таҳти амали зербанди «б» моддаи 1 шахсоне қарор мегиранд, ки то рўзи содир кардани ҷиноят ба синни ҳаждаҳсолагӣ нарасидаанд;

в) таҳти амали зербанди «в» моддаи 1 мардоне қарор мегиранд, ки то рўзи ба қувваи қонунӣ даромадани Қонуни мазкур ба синни 55-солагӣ расидаанд;

г) зербанди «г» моддаи 1 Қонуни мазкур нисбати шахсоне татбиқ карда мешавад, ки мувофиқи тартиби муқарраршуда то ба қувваи қонунӣ даромадани ҳамин Қонун маъюбони гурўҳҳои I ва II дониста шудаанд.

**Моддаи 15.**

Қонуни мазкур нисбати шахсоне, ки барои содир намудани маҷмўи ҷиноятҳо айбдор дониста ва ё маҳкум шудаанд, агар яке аз онҳо дар зербандҳои «а» ва «б» моддаи 7 Қонуни мазкур пешбинӣ шуда бошад, татбиқ карда намешавад, вале мўҳлати адои ҷазо бо тартиби пешбиникардаи моддаи 6 ҳамин Қонун ва бо дарназардошти талаботи моддаи 8 Қонуни мазкур кам карда мешавад.

**Моддаи 16.**

Мўҳлати ҷазои адокардашудаи маҳкумшудагони дар зербандҳои «б» ва «в» моддаи 3 Қонуни мазкур нишондодашуда, то рўзи ба қувваи қонунӣ даромадани ҳамин Қонун ба ҳисоб гирифта мешавад.

**Моддаи 17.**

Мутобиқи моддаи 6 Қонуни мазкур қисми мўҳлати ҷазои адонагардида, ки то рўзи ба қувваи қонунӣ даромадани ҳамин Қонун боқӣ мондааст, кам карда мешавад.

Нисбати шахсоне, ки пештар мўҳлати ҷазояшон ба тариқи бахшиши ҷазо ё авф кам карда шуда буд, авф бо назардошти мўҳлати ҷазои адонагардида татбиқ карда мешавад.

**Моддаи 18.**

Шахсоне, ки нисбати онҳо Қонуни мазкур татбиқ карда мешавад, аз барқарор намудани товони зарари моддии бо кирдори ҷиноятӣ расонидаашон озод карда намешаванд.

**Моддаи 19.**

Шахсони мувофиқи Қонуни мазкур авфшаванда ҳам аз ҷазои асосӣ ва ҳам аз ҷазои иловагӣ озод карда мешаванд. Маҳкумшудагоне, ки мўҳлати адои ҷазояшон мутобиқи моддаи 6 Қонуни мазкур кам карда мешавад, аз адои ҷазои иловагӣ озод карда намешаванд.

**Моддаи 20.**

Маводи шахсоне, ки таҳти амали Қонуни мазкур қарор мегиранд ва мувофиқи тартиби муқарраргардида ба онҳо табобати маҷбурӣ аз майзадагӣ, нашъамандӣ ё бемориҳои зўҳравӣ таъин гардидааст, дар давраи иҷрои ҳамин Қонун баррасӣ гардида, қарор дар бораи озод намудани онҳо, танҳо пас аз ба охир расидани давраи пурраи табобати маҷбурӣ мавриди иҷро қарор дода мешавад.

Барои анҷомёфта донистани муолиҷаи касалии зўҳравии маҳкумшуда хулосаи тиббӣ ва нисбати шахсе, ки суд аз майзадагӣ ё нашъамандӣ табобати маҷбурӣ фармудааст, таъиноти суд дар бораи қатъ кардани табобати маҷбурӣ асос мебошад.

**Моддаи 21.**

Вайронкунандагони тартиби муқарраргардидаи адои ҷазо, ки зербанди «е» моддаи 7 Қонуни мазкур пешбинӣ менамояд, чунин маҳкумшудагон дониста мешаванд:

а) маҳкумшудагоне, ки тартиби муқарраргардидаи адои ҷазоро ба таври ашаддӣ вайрон кардаанд (моддаи 122 Кодекси иҷрои ҷазои ҷиноятии Ҷумҳурии Тоҷикистон) ва муҷозоти мўҳлаташ адонашуда ё бекорнашуда дошта бошанд;

б) маҳкумшудагоне, ки дар вақти адо намудани ҷазо қасдан ҷиноят содир кардаанд;

в) маҳкумшудагоне, ки бе сабабҳои узрнок дар мўҳлатҳои Қонун ва суд муқарраркарда ҷаримаро насупоридаанд.

**Моддаи 22.**

Нисбати шахсоне, ки ҷиноятҳои давомдор ё дарозмуддат содир кардаанд, ҳамин Қонун танҳо дар мавриде татбиқ карда мешавад, ки агар ин намуд ҷиноятҳо то рўзи ба қувваи қонунӣ даромадани Қонуни мазкур анҷом ёфта бошанд.

**Моддаи 23.**

Ба мақомоти иҷроияи маҳаллии ҳокимияти давлатии Вилояти Мухтори Кўҳистони Бадахшон, вилоятҳо, шаҳри Душанбе, шаҳру ноҳияҳо ва мақомоти худидоракунии шаҳраку деҳот супорида шавад:

а) бақайдгирии саривақтии шахсони мувофиқи Қонуни мазкур аз адои ҷазо озодшударо ҷиҳати расонидани кўмаки иҷтимоӣ ва назорати рафтори онҳо таъмин намоянд;

б) назорати ноболиғони мутобиқи Қонуни мазкур озодшударо ба падару модарон ё шахсони ивазкунандаи онҳо вогузор намуда, дар мавриди зарурӣ барои ба мактаб-интернатҳо ҷойгир кардани ноболиғони бесаробон чора андешанд;

в) масъалаи ҷойгир кунонидани беморонро дар муассисаҳои тиббӣ ва маъюбону пиронсолони бекасро дар интернат ва хонаҳои пиронсолон ташкил намоянд.

**Моддаи 24.**

Қонуни Ҷумҳурии Тоҷикистон «Дар бораи авф» дар давоми шаш моҳ мавриди иҷро қарор дода шавад.

**Моддаи 25.**

Агар масъалаи татбиқи Қонуни мазкур пас аз мўҳлати шашмоҳаи баъд аз ба қувваи қонунӣ даромадани ҳамин Қонун ба миён ояд, он мувофиқи тартиби муқаррарнамудаи моддаи 10 Қонуни мазкур иҷро карда мешавад.

**Моддаи 26.**

Суди Олии Ҷумҳурии Тоҷикистон, Прокурори генералии Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Вазорати амнияти Ҷумҳурии Тоҷикистон, Вазорати адлияи Ҷумҳурии Тоҷикистон, Вазорати даромадҳо ва пардохтҳои давлатии Ҷумҳурии Тоҷикистон, Шўрои адлияи Ҷумҳурии Тоҷикистон, Агентии назорати маводи нашъаовари назди Президенти Ҷумҳурии Тоҷикистон, мақомоти иҷроияи маҳаллии ҳокимияти давлатии Вилояти Мухтори Кўҳистони Бадахшон, вилоятҳо, шаҳри Душанбе, шаҳру ноҳияҳо ва мақомоти худидоракунии шаҳраку деҳот дар муддати як моҳи пас аз гузаштани мўҳлати иҷрои Қонуни Ҷумҳурии Тоҷикистон «Дар бораи авф» ба Президенти Ҷумҳурии Тоҷикистон дар хусуси иҷрои он ҳисобот пешниҳод намоянд.

**Моддаи 27.**

Қонуни мазкур пас аз интишори расмӣ мавриди амал қарор дода шавад.

Президенти

Ҷумҳурии Тоҷикистон Э.Раҳмонов

ш. Душанбе, 18 августи соли 2006

№ 203

Пинҳон кардан
Таснифгар	Рақам	Ном	Мақомот	Сана	Ҳолат	Замима
ҚОНУН	203	ҚОНУНИ ҶУМҲУРИИ ТОҶИКИСТОН ДАР БОРАИ АВФ	Маҷлиси Олии ҶТ	18.08.2006	Амалкунанда	WORD PDF ZIP

Матни асосӣ:
Дидан

**ҚОНУНИ**

**ҶУМҲУРИИ ТОҶИКИСТОН**

**ДАР БОРАИ РАМЗҲОИ ПРЕЗИДЕНТИ ҶУМҲУРИИ ТОҶИКИСТОН**

(Ахбори Маҷлиси Олии Ҷумҳурии Тоҷикистон, с. 2006, №7, мод. 340; с. 2013, №11, мод. 783; Қонуни ҶТ аз 02.01.2018 с., №1495)

Бо Қарори Маҷлиси намояндагони Маҷлиси Олии Ҷумҳурии Тоҷикистон аз 30-юми июни соли 2006, № 341 (Ахбори Маҷлиси Олии Ҷумҳурии Тоҷикистон, соли 2006, №6, моддаи 300) қабул гардидааст.

Бо Қарори Маҷлиси миллии Маҷлиси Олии Ҷумҳурии Тоҷикистон аз 20-уми июли соли 2006, № 221 (Ахбори Маҷлиси Олии Ҷумҳурии Тоҷикистон, соли 2006, №7, моддаи 35; ҚҶТ аз ***12.11.2013с.***, ***№1026;) ҷонибдорӣ гардидааст.***

Қонуни мазкур рамзҳои Президенти Ҷумҳурии Тоҷикистонро муқаррар намуда, вазъи ҳуқуқӣ, тасвир ва тартиби истифодаи расмии онҳоро танзим мекунад.

**Моддаи 1. Рамзҳои Президенти Ҷумҳурии Тоҷикистон**

Рамзҳои Президенти Ҷумҳурии Тоҷикистон аз Ливо ва Нишони Президенти Ҷумҳурии Тоҷикистон иборат мебошанд.

Ливо ва Нишон рамзҳои расмии ҳокимияти президентӣ дар Ҷумҳурии Тоҷикистон мебошанд.

Президенти Ҷумҳурии Тоҷикистон аз рўи мансаб дорандаи ордени «Ситораи Президенти Тоҷикистон» дараҷаи I мебошад. **(ҚҶТ аз 12.11.2013с. №1026)**

**Моддаи 2.** **Тасвири Ливои Президенти Ҷумҳурии Тоҷикистон**

Ливои Президенти Ҷумҳурии Тоҷикистон матои хоси росткунҷаест, ки он аз се рахи рангаи ба таври уфуқӣ ҷойгирифта иборат мебошад: рахи боло ранги сурх дошта, паҳнои он ба рахи сабзи поён баробар мебошад; рахи сафеди мобайнӣ якуним баробари паҳнои яке аз рахҳои ранга аст.

Даври Ливо ба андозаи 50 мм, бо ресмони зарҳалин дастдўзӣ шуда, бо шилшилаҳо ороиш ёфтааст.

Таносуби бару дарозии умумии Ливо 1:2 аст.

Дар Маркази Ливо тасвири «Дирафши Ковиён» инъикос ёфтааст, ки он рамзи пойдорӣ ва бардавомии давлатдории миллӣ мебошад.

Дар қисми болоии «Дирафши Ковиён» найза ҳамчун рамзи ирода ва қудрати ҳифзи Ватан тасвир ёфтааст.

Қисмати чаҳоргонаи «Дирафши Ковиён» - чаҳор қисмати гетӣ буда, рамзи равобити некӣ, дўстӣ ва ҳамкорӣ бо кишварҳо ва халқҳои ҷаҳон аст.

Дар дохили «Дирафши Ковиён» чаҳор шохаи марғула дар даври Хуршед – ҳамчун рамзи ҳамеша дар ҳаракат будани вақту замон, гардиши замин ва дигар ***унсурҳои*** коинот дар атрофи Хуршед инъикос ёфта, баёнгари бахт, ваҳдат, саодат ва пешрафти кишвар мебошад. (**ҚҶТ аз 02.01.18 с., №1495)**

Дар маркази «Дирафши Ковиён» Шери болдор ҳамчун рамзи қудрат, ***нер***у***мандӣ*** ва шукўҳи давлат дар рўи осмони кабуд инъикос ёфтааст. (**ҚҶТ аз 02.01.18 с., №1495)**

Дар болои тасвири Шери болдор Тоҷ ва ҳафт ситора ҳамчун асоси Нишони давлатии Ҷумҳурии Тоҷикистон мебошад, инъикос ёфтаанд.

«Дирафши Ковиён» аз ресмонҳои рангаи зарҳалин дар ҳар ду ҷониби Ливо дастдўзӣ мешавад.

Андозаи «Дирафши Ковиён» 3:5 таносуби Ливо аст.

Дар қисмати болоии чўбдасти Ливо лавҳаи заррин васл мегардад, ки дар он ***насаб***, ном ва номи падари Президенти Ҷумҳурии Тоҷикистон бо зикри му***ҳлати*** салоҳияти конститутсионии ў ҳаккокӣ мешавад. (**ҚҶТ аз 02.01.18 с., №1495)**

Нўги чўбдасти Ливо шакли гунбази заррин дорад.

**Моддаи 3.** **Тасвири Нишони Президенти Ҷумҳурии Тоҷикистон**

Нишони Президенти Ҷумҳурии Тоҷикистон дар асоси такмили ордени «Ситораи Президенти Тоҷикистон дараҷаи I» бо шаддаи хоси ***заррин*** тайёр карда шудааст. (**ҚҶТ аз 02.01.18 с., №1495)**

Нишони Президенти Ҷумҳурии Тоҷикистон аз се қисми таркибӣ – ордени «Ситораи Президенти Тоҷикистон дараҷаи I», Шери болдор ва Шаддаи заррин иборат мебошад. (**ҚҶТ аз 02.01.18 с., №1495)**

Дар меҳвари Нишони Президенти Ҷумҳурии Тоҷикистон ситораи ҳафтгўшаи сурх, ки аз ёқути сурх сохта шудааст, ҷойгир буда, баёнгари мубориза баҳри озодӣ, истиқлол, адолат ва пешрафт мебошад.

Дар доираи давродаври заррин ибораи «Ситораи Президенти Тоҷикистон» аз тилло ҳаккокӣ шудааст.

Дар дохили доираи ситораи ҳафтгўша Нишони давлатии Ҷумҳурии Тоҷикистон аз тилло тасвир гардидааст.

Ситораи ҳафтгўша бо нурҳои нуқрагин зиннат ёфтааст, ки онро шукўҳ ва ороиш бахшида, рамзи покӣ ва озодагии рўҳу сират мебошад.

Ҳар хатти тўлонии нур (маҷмўан: 7 хат) бо се лаъли ҳалқагин, хатҳои миёна (маҷмўан: 14 хат) бо ду лаъли ҳалқагин ва хатҳои хурди нур (маҷмўан: 14 хат) бо 1 лаъл оро ёфтаанд.

Ба ҳар гўшаи Ситора лавҳаи мураббаи заррин (маҷмўан: 7 лавҳа) васл гардидааст, ки дар қисмати болоии он зумуррад дар шакли мураббаъ ҷойгир аст.

Ордени такмилёфтаи «Ситораи Президенти Тоҷикистон дараҷаи I» бо нишони ҳалқавии Шери болдори дар ҳоли ҳаракати доимӣ буда, васл карда шудааст. Шери болдор рамзи қудрат, ***нер***у***мандӣ*** ва шукўҳи давлат мебошад. (**ҚҶТ аз 02.01.18 с., №1495)**

Нишони ҳалқавии Шери болдор аз ду ҷониб бо лавҳаҳои хоси заррин бо Шаддаи заррин пайваст аст. Тасвири ин лавҳаҳо ифодаи суннатии қудрат мебошад.

Шаддаи заррин 13 ҳалқаҳои зарринро дар таносуби муайян ва паиҳам пайванд намудааст.

Дар 6 ҳалқаи заррин тасвири Шери болдор ва дар 7 ҳалқаи заррин дар заминаи ранги осмонӣ тасвири заррини Нишони давлатии Ҷумҳурии Тоҷикистон инъикос ёфтааст.

Моддаи 4. *Маҳал*ии **нигоҳдошт ва тартиби истифодаи Ливои Президенти Ҷумҳурии Тоҷикистон**

(ҚҶТ аз 02.01.18 с., №1495)

***Маҳалии*** нигоҳдошти нусхаи асли Ливои Президенти Ҷумҳурии Тоҷикистон дафтари кории Президенти Ҷумҳурии Тоҷикистон дар қароргоҳи он пойтахти Ҷумҳурии Тоҷикистон – шаҳри Душанбе мебошад. (**ҚҶТ аз 02.01.18 с., №1495)**

Нусхаи Ливои Президенти Ҷумҳурии Тоҷикистон дар қароргоҳи Президенти Ҷумҳурии Тоҷикистон дар шаҳри Душанбе, қароргоҳи зисти доимии Президенти Ҷумҳурии Тоҷикистон, дигар қароргоҳҳо дар ҳузури Президенти Ҷумҳурии Тоҷикистон ҳангоми таҷлили ҷашнҳои давлатӣ, қабули шахсони расмии давлатҳои хориҷӣ ва созмонҳои байналмилалӣ, дар ҷаласаҳои якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, иҷлосияҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, ки бо иштироки Президенти Ҷумҳурии Тоҷикистон мегузаранд, супоридани мукофотҳои давлатӣ, қабули расмӣ аз номи Президенти Ҷумҳурии Тоҷикистон, дигар вохӯрию мулоқотҳои расмии Президенти Ҷумҳурии Тоҷикистон ва воситаҳои нақлиёти Президенти Ҷумҳурии Тоҷикистон афрохта мешавад. (**ҚҶТ аз 02.01.18 с., №1495)**

Ҳангоми дар хориҷа ба сифати шахси расмӣ будани Президенти Ҷумҳурии Тоҷикистон Ливои Президенти Ҷумҳурии Тоҷикистон мутобиқи тартиби протоколи тарафи қабулкунанда метавонад дар қароргоҳи зисти муваққатӣ ва воситаи нақлиёти Президенти Ҷумҳурии Тоҷикистон афрохта шавад.

Ҳангоми гузоштани Ливои Президенти Ҷумҳурии Тоҷикистон якҷоя бо Парчами давлатии Ҷумҳурии Тоҷикистон Ливои Президенти Ҷумҳурии Тоҷикистон ва Парчами давлатии Ҷумҳурии Тоҷикистон дар як сатҳ афрохта мешаванд.

Дар ҳама ҳолатҳои якҷоя афрохтани Ливои Президенти Ҷумҳурии Тоҷикистон ва Парчами давлатии Ҷумҳурии Тоҷикистон андозаи онҳо бояд баробар бошад.

**Моддаи 5. Тартиби истифодаи Нишони Президенти Ҷумҳурии Тоҷикистон**

Нишони Президенти Ҷумҳурии Тоҷикистон ҳангоми таҷлили ҷашнҳои давлатӣ, гузаронидани парадҳои расмӣ, қабули шахсони расмии давлатҳои хориҷӣ ва созмонҳои байналмилалӣ, ***ҷаласаи*** якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, иҷлосияҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, ***ки бо иштироки Президенти Ҷумҳурии Тоҷикистон мегузаранд,*** супоридани мукофотҳои давлатӣ, қабули расмӣ аз номи Президенти Ҷумҳурии Тоҷикистон ва дар ҳолатҳои дигар, инчунин ҳангоме, ки Президенти Ҷумҳурии Тоҷикистон дар хориҷи кишвар ба сифати меҳмони фахрӣ даъват шудааст ва ё дар пазироии расмӣ ҳузур дорад мутобиқи тартиби протоколи тарафи қабулкунанда метавонад мавриди истифода қарор дода шавад. (**ҚҶТ аз 02.01.18 с., №1495)**

**Моддаи 6. Ба Президенти Ҷумҳурии Тоҷикистон супоридани рамзҳои Президенти Ҷумҳурии Тоҷикистон**

Ба Президенти Ҷумҳурии Тоҷикистон пас аз интихоб шудан Нишони Президенти Ҷумҳурии Тоҷикистон бо ордени "Ситораи Президенти Тоҷикистон" дараҷаи I аз ҷониби Раиси Суди конститутсионии Ҷумҳурии Тоҷикистон супорида шуда, дар ҳамин маврид Ливои Президенти Ҷумҳурии Тоҷикистон афрохта мешавад.

Тартиби супоридани рамзҳои Президенти Ҷумҳурии Тоҷикистон аз ҷониби Президенти Ҷумҳурии Тоҷикистон муайян карда мешавад. **(ҚҶТ аз 12.11.2013с. №1026)**

**Моддаи 7. Ҷавобгарӣ барои риоя накардани талаботи Қонуни мазкур**

Риояи талаботи Қонуни мазкур ҳангоми афрохтани Ливои Президенти Ҷумҳурии Тоҷикистон ба зиммаи Дастгоҳи иҷроияи Президенти Ҷумҳурии Тоҷикистон, раисони вилоятҳо, шаҳрҳо ва ноҳияҳо гузошта мешавад.

Таҳқири рамзҳои Президенти Ҷумҳурии Тоҷикистон дар ҳар шакле, ки набошад, манъ аст.

Шахсони воқеӣ ва ҳуқуқӣ барои риоя накардани талаботи Қонуни мазкур мувофиқи қонунгузории Ҷумҳурии Тоҷикистон ба ҷавобгарӣ кашида мешаванд. (**ҚҶТ аз 02.01.18 с., №1495)**

**Моддаи 8. Мавриди амал қарор додани Қонуни мазкур**

Қонуни мазкур пас аз интишори расмӣ мавриди амал қарор дода шавад.

           Президенти

Ҷумҳурии Тоҷикистон                                                                                                              Э.Раҳмонов

      ш. Душанбе

28 июли соли 2006

           № 192

Пинҳон кардан
Таснифгар	Рақам	Ном	Мақомот	Сана	Ҳолат	Замима
ҚОНУН	192	ҚОНУНИ ҶУМҲУРИИ ТОҶИКИСТОН ДАР БОРАИ РАМЗҲОИ ПРЕЗИДЕНТИ ҶУМҲУРИИ ТОҶИКИСТОН	Маҷлиси Олии ҶТ	28.07.2006	Амалкунанда	WORD PDF ZIP

Матни асосӣ:
Дидан

**ҚОНУНИ ҶУМҲУРИИ ТОҶИКИСТОН**

**ДАР БОРАИ ҒАЛЛА**

(Ахбори Маҷлиси Олии Ҷумҳурии Тоҷикистон, соли 2006, №7, мод. 348)

Бо Қарори Маҷлиси намояндагони Маҷлиси Олии Ҷумҳурии Тоҷикистон аз 30-юми июни соли 2006, № 331 (Ахбори Маҷлиси Олии Ҷумҳурии Тоҷикистон, соли 2006, № 6, моддаи 295) қабул гардидааст.

Бо Қарори Маҷлиси миллии Маҷлиси Олии Ҷумҳурии Тоҷикистон аз 20-уми июли соли 2006, № 229 (Ахбори Маҷлиси Олии Ҷумҳурии Тоҷикистон, соли 2006, № 7, моддаи 363) ҷонибдорӣ гардидааст.

Қонуни мазкур муносибатҳоеро, ки дар раванди истеҳсол, тозакунӣ, нигоҳдорӣ ва фурӯши ғалла, идоракунии сифати ғалла ва тайёр кардани ғаллаи озуқаворӣ, маводи ему хошоки чорво, парранда ва тухмӣ дар Ҷумҳурии Тоҷикистон ба миён меоянд, танзим менамояд.

**БОБИ 1**

**МУҚАРРАРОТИ УМУМӣ**

**Моддаи 1. Мафҳумҳои асосӣ**

Дар Қонуни мазкур мафҳумҳои асосии зерин истифода шудаанд:

**-ғалла** –ҳосили зироатҳои хӯшадор, лӯбиёӣ ва равғандор, ки ба мақсадҳои хӯрокворӣ, тухмӣ, ему хошоки чорво, парранда ва техникӣ истифода мешаванд;

**-истеҳсоли ғалла**- маҷмӯи чорабиниҳои агротехникие, ки барои парвариши ғалла равона карда шудааст;

**-ғаллаи озуқаворӣ**- ғаллае, ки ба мақсади хӯрокворӣ истифода бурда мешавад;

**-ғаллаи тухмӣ** -ғаллае, ки аз рӯи сифат ва навъҳо ҷудо карда шудааст ва ба мақсадҳои кишт кардан истифода бурда мешавад;

**-ғаллаи маводи ему хошок**-ғаллае, ки барои хӯроки чорво ва паррандаҳо истифода бурда мешавад;

**-бехатарии озуқаворӣ**-ҳолати иқтисодиёт, аз ҷумла комплекси агросаноатии он, ки бо захираҳои дахлдор, иқтидор ва кафолатҳо таъмин карда шудааст, новобаста аз шартҳои дохилӣ ва берунӣ, ки зимни он талаботи аҳолӣ ба маводи хӯрокворӣ мутобиқи меъёрҳои физиологии ғизо қонеъ гардонида мешавад;

**-захираҳои давлатии ғалла** –захираҳои давлатии ғалла, ки бо мақсади таъмини бехатарии озуқаворӣ ва иҷрои ӯҳдадориҳои давлатӣ, инчунин барои ҳимоя ва танзими бозори ғалла пешбинӣ карда шудаанд;

**-сифати ғалла** – маҷмӯи хосиятҳои истеъмолии ғалла, ки мутобиқати онро ба талаботи стандартҳои давлатӣ, шартҳои техникӣ, меъёрҳои санитарӣ, байторӣ, фитосанитарӣ, гигиенӣ ва дигар ҳуҷҷатҳои меъёрӣ муайян менамояд;

**-сертификати сифати ғалла**- ҳуҷҷатест, ки мутобиқати сифати ғалларо ба талаботи стандартҳои давлатӣ тасдиқ мекунад;

**-корхонаи қабули ғалла**- шахси ҳуқуқие, ки ба амбори ғалла (элеватор, пункти қабули ғалла), ки дар онҳо ғалла нигоҳ дошта мешавад, ҳуқуқи моликият дорад;

**-нигоҳдории ғалла**- маҷмӯи технологии хизматрасонӣ дар амбори ғалла (элеватор, пункти қабули ғалла), ки он аз қабул карда гирифтани ғалла, дар тарозу баркашидан, хушконидан, тоза кардан, нигоҳ доштан ва интиқоли онро дар бар мегирад.

**Моддаи 2. Қонунгузории Ҷумҳурии Тоҷикистон дар бораи ғалла**

Қонунгузории Ҷумҳурии Тоҷикистон дар бораи ғалла ба Конститутсияи (Сарқонуни) Ҷумҳурии Тоҷикистон асос ёфта, аз Қонуни мазкур, дигар санадҳои меъёрии ҳуқуқии Ҷумҳурии Тоҷикистон ва санадҳои ҳуқуқии байналмилалие, ки Ҷумҳурии Тоҷикистон онҳоро эътироф кардааст, иборат аст.

**Моддаи 3. Мақсад ва вазифаҳои қонунгузорӣ дар бораи ғалла**

1.Ғалла сарвати миллии Ҷумҳурии Тоҷикистон буда, яке аз омилҳои асосии устувории иқтисодиёти он мебошад.

2.Мақсади қонунгузорӣ дар бораи ғалла кам кардани вобастагии истеъмолкунандагони мамлакат аз бозори берунии ғалла бо роҳи дар мамлакат тараққӣ додани ғаллакорӣ ва коркарди маҳсулоти ғаллагӣ дар ташаккул ва инкишоф додани соҳа, фароҳам овардани муҳити мусоиди ҳуқуқӣ, иқтисодӣ ва ташкилӣ барои истеҳсолкунандагони маҳаллӣ мебошад.

3.Вазифаи қонунгузорӣ дар бораи ғалла аз муқаррар кардани қоидаҳои умумии истеҳсоли ғалла, танзими бозори ғалла ва таъмини сифати маҳсулоти ғаллагӣ иборат аст.

**Моддаи 4. Объектҳо ва субъектҳои фаъолияти ғаллакорӣ**

1.Объектҳои фаъолияти ғаллакорӣ – ҳама намуди маҳсулоти ғаллагӣ, воситаҳои техникии коркарди замин, воситаҳои технологӣ, ки дар ҳамаи марҳалаҳо ба ин ё он шакл дар робитаанд, инчунин маводи ёрирасони табиӣ ва сунъие, ки дар фаъолияти ғаллакорӣ истифода мешаванд.

2.Субъектҳои фаъолияти ғаллакорӣ шахсони воқеӣ ва ҳуқуқӣ мебошанд, ки бо истеҳсол, тайёркунӣ, нигоҳдорӣ, кашондан, фурӯш, воридот ва содироти маҳсулоти ғаллагӣ машғуланд.

**БОБИ 2**

**ИДОРАКУНӣ ВА ТАНЗИМИ ДАВЛАТИИ БОЗОРИ ҒАЛЛА**

**Моддаи 5. Мақсади идоракунии давлатии бозори ғалла**

Мақсади идоракунии давлатӣ ва танзими бозори ғалла аз инҳо иборат аст:

-таъмини бехатарии озуқаворӣ;

-васеъ кардани бозори фурӯши ғалла;

-таъмини сифати ғалла;

-таъмини вазъи бехатарии фитосанитарӣ;

-мувофиқ гардондани сохтори истеҳсоли ғалла бо назардошти шароити табиию иқлимӣ ва вазъи бозор, такмил додани технологияи истеҳсол, нигоҳдорӣ ва фурӯши ғалла;

-бартараф кардани камчинии эҳтимолии хӯрока дар чорводорӣ ва паррандапарварӣ дар доираи ҳаҷми захираҳои давлатӣ;

-ташаккул додани сиёсати маблағгузорӣ, қарзӣ, андозӣ ва гумрукӣ дар истеҳсоли ғалла.

**Моддаи 6. Шаклҳои танзими давлатии бозори ғалла**

Бозори ғалла аз тарафи давлат бо роҳҳои зерин танзим гардонда мешавад:

-сертификатонии ғалла мутобиқи қонунгузории Ҷумҳурии Тоҷикистон;

-назорат ба фаъолияти лабораторияҳои аккредитатсияшудаи экспертизаи сифати ғалла;

-ташаккул додани захираҳои давлатии ғалла ва назорат ба ҳаҷму сифати онҳо;

-маблағгузории давлатӣ ба чорабиниҳои муҳофизат ва карантини растаниҳо;

-назорати риояи талаботҳои махсус аз ҷониби корхонаҳои қабули ғалла нисбати қоидаҳои нигоҳдории ғалла.

**Моддаи 7. Салоҳияти Ҳукумати Ҷумҳурии Тоҷикистон**

Ҳукумати Ҷумҳурии Тоҷикистон салоҳият дорад, ки:

-барномаи давлатии ғалла-барномаи инкишофи бозори ғалла ва истеҳсоли ғаллаи Ҷумҳурии Тоҷикистонро таҳия ва амалӣ намояд;

-барномаҳои кӯмаки давлатии истеҳсоли ғалларо тасдиқ кунад, барои ҷалб намудани маблағгузорӣ шароити мусоид фароҳам созад ва барои инкишофи бозори ғалла ва нигоҳ доштани устувории он чораҳо андешад;

-ҳаҷм, сохтор, қоидаҳои ташкил, нигоҳдорӣ ва истифодаи захираҳои давлатии ғалларо тасдиқ намояд;

-вобаста ба амалиёти ғалла созишномаҳои байниҳукуматӣ бандад.

**Моддаи 8. Воридот ва содироти маҳсулоти ғаллагӣ**

1.Аз давлатҳои хориҷӣ ба Ҷумҳурии Тоҷикистон ғаллае метавонад ворид карда шавад, ки дар феҳристи давлатӣ ба қайд гирифта шуда, бо тартиби дахлдор сертификати мутобиқат ё шаҳодатномаи эътирофи онро дошта бошад.

2.Маҳсулоти ғаллагие, ки сертификати дахлдори дар ҳуҷҷатҳои меъёрии амалкунандаи Ҷумҳурии Тоҷикистон пешниҳодшударо надорад, ба қаламрави Ҷумҳурии Тоҷикистон мумкин аст танҳо бо тартиби муқарраркардаи қонунгузорӣ барои намоишгоҳҳо, бо мақсади тадқиқот ва гузаронидани санҷиш ворид карда шавад.

3.Содироти маҳсулоти ғаллагӣ бо тартиби муқарраркардаи санадҳои меъёрии ҳуқуқии Ҷумҳурии Тоҷикистон ва санадҳои ҳуқуқии байналмилалие, ки Тоҷикистон онҳоро эътироф кардааст, амалӣ гардонда мешавад.

**БОБИ 3**

**ДАСТГИРИИ ДАВЛАТИИ ИСТЕҲСОЛ ВА ФУРӯШИ ҒАЛЛА**

**Моддаи 9. Шаклҳои дастгирии давлатӣ**

Бо мақсади таъмин кардани устувории бозори ғалла давлат шаклҳои зерини дастгирии истеҳсол ва фурӯши ғалларо амалӣ мегардонад:

-таъмини хоҷагиҳои махсуси тухмипарварӣ бо тухмҳои суперэлита ва элита барои истеҳсолкунандагони ғалла бо тартиби муқаррарнамудаи Ҳукумати Ҷумҳурии Тоҷикистон;

-ҷудо кардани маблағ аз буҷети давлатӣ барои чорабиниҳои карантинӣ ва муҳофизати растаниҳо;

-хариди ғалла барои захираҳои давлатии ғалла;

-аз захираҳои давлатӣ қарз додани тухмӣ ба молистеҳсолкунандагони кишоварзӣ;

-ба маблағ таъмин намудани чорабиниҳои мелиоративӣ, механикӣ ва техникӣ дар доираи барномаҳои давлатӣ;

-бо маблағ таъмин намудани барномаҳои тадқиқоти илмии селексия, тухмипарварӣ ва нигоҳдории ҳосилхезии хок;

-мусоидат барои ҷорӣ кардани технологияҳои нави истеҳсол ва нигоҳдории ғалла.

**Моддаи 10. Захираҳои давлатии ғалла**

1.    Захираҳои давлатии ғалла аз инҳо иборатанд:

–захираҳои давлатии ғаллаи озуқаворӣ;

–захираҳои давлатии ем;

-захираҳои давлатии ғаллаи тухмӣ;

-захираҳои давлатии фурӯши ғалла;

-захираҳои давлатии эҳтиётӣ (ё амниятӣ).

2.Захираҳои давлатии ғалла аз ҳисоби истеҳсоли дохилӣ ва воридот ташкил меёбанд.

3.Захираҳои давлатии ғалла моликияти Ҷумҳурии Тоҷикистон мебошанд.

4.Тартиби ташкил, нигоҳдорӣ, навкунӣ, ҷойивазкунӣ ва истифодабарии захираи давлатии ғалларо Ҳукумати Ҷумҳурии Тоҷикистон муайян менамояд.

**БОБИ 4**

**КОРХОНАҲОИ ҚАБУЛИ ҒАЛЛА**

**Моддаи 11. Таъиноти корхонаҳои қабули ғалла**

1.    Корхонаҳои қабули ғалла амбори моли истифодаи умумӣ шуморида мешаванд.

2.    Хизматрасонӣ оид ба нигоҳдории ғалла аз ҷониби корхонаҳои қабули ғалла дар асоси шартнома анҷом дода мешавад.

3.    Корхонаҳои қабули ғалла фаъолияти худро оид ба нигоҳдории ғалла мутобиқи талаботи тахассусӣ ба роҳ мемонанд.

**Моддаи 12. Вазифаҳои корхонаҳои қабули ғалла**

Корхонаҳои қабули ғалла вазифадоранд, ки:

-тартиби нигоҳдории ғалла, инчунин чорабиниҳоеро, ки нигоҳдории ҳаҷму сифати ғалларо мутобиқи санадҳои меъёрии ҳуқуқии бо тартиби муқаррарӣ тасдиқшуда таъмин менамоянд, риоя кунанд;

-дар ҳолати зарурӣ ғалларо барои санҷиш бо тартиби муқарраршуда интихоб карда гиранд;

-хароҷоти корхонаҳои қабули ғалларо барои нигоҳдории ғалла мутобиқи шартнома ҷуброн кунанд.

**БОБИ 5**

**СИФАТИ МАҲСУЛОТИ ҒАЛЛАГӣ**

**Моддаи 13. Таъмини сифати маҳсулоти ғаллагӣ**

Сифати маҳсулоти ғаллагӣ ба усулҳои зерин таъмин карда мешавад:

-бамеъёрдарории талаботи сифати маҳсулоти ғаллагӣ;

-арзёбии сифати маҳсулоти ғаллагӣ ва бақайдгирии давлатии гигиении он;

-сертификатонии маҳсулоти ғаллагӣ;

-назорати давлатӣ ба сифати маҳсулоти ғаллагӣ.

**Моддаи 14. Бамеъёрдарории талаботи сифати маҳсулоти ғаллагӣ**

1.    Бамеъёрдарории талаботи таъмини сифати маҳсулоти коркарди ғалла бо тартиби бамеъёрдарории талаботи сифат ва бехатарии маҳсулоти хӯрокворӣ анҷом дода мешавад.

2.    Бамеъёрдарории таъмини сифати ғалла аз муайян кардани стандартҳо ва талаботе иборат мебошад, ки шароити истеҳсолот, тайёркунӣ, ба дараҷаи сифатнокӣ расонидан, кашондан, нигоҳдорӣ, коркард ва фурӯши намудҳои гуногуни ғалларо танзим менамояд.

3.Риояи тартиби бамеъёрдарории талаботи таъмини сифати маҳсулоти ғаллагӣ барои ҳамаи субъектҳои фаъолияти ғаллакорӣ ҳатмӣ мебошад.

**Моддаи 15. Арзёбии сифати маҳсулоти ғаллагӣ ва бақайдгирии давлатии гигиении он**

1.    Сифати маҳсулоти ғаллагӣ дар лабораторияҳои махсус бо тартиби муқарраргардида аз рӯи методикаи ягона арзёбӣ карда мешавад.

2.    Таркиби маҳсулоти ғаллагӣ, ки дар Ҷумҳурии Тоҷикистон истеҳсол мешавад ё ба ҷумҳурӣ ворид мегардад, аз рӯи нишондиҳандаҳои кимиёвӣ, биологӣ, токсикологӣ ва радиологӣ таҳлил ва арзёбӣ карда мешавад.

3.    Маҳсулоти коркарди ғалла аз ҷониби мақомоти дахлдор дар феҳристи давлатӣ низ аз қайди гигиенӣ гузаронида мешавад.

**Моддаи 16. Сертификатонии маҳсулоти ғаллагӣ**

1.    Ба маҳсулоти ғаллагӣ, ки аз рӯи нишондиҳандаҳои сифат арзёбӣ шудааст, инчунин ба маҳсулоти коркарди ғаллае, ки аз қайди давлатии гигиенӣ гузаштааст, сертификатҳои сифати ғалла дода мешаванд.

2.    Қоидаҳои сертификатонии маҳсулоти ғаллагӣ бо санадҳои меъёрии ҳуқуқии Ҷумҳурии Тоҷикистон танзим ва аз тарафи мақомоти ваколатдори Ҳукумати Ҷумҳурии Тоҷикистон назорат карда мешаванд.

**Моддаи 17.Назорати давлатӣ ба сифати маҳсулоти ғаллагӣ**

1.Мақсади назорати давлатӣ ба сифати маҳсулоти ғаллагӣ аз ҷониби шахсони воқеӣ ва ҳуқуқӣ риоя шудани стандартҳо ва талаботе мебошад, ки истеҳсол, тайёркунӣ, нигоҳдорӣ, кашондан, фурӯш, воридот ва содироти маҳсулоти ғалларо танзим менамояд.

2.Тартиби ташкил ва фаъолияти назорати давлатиро ба сифати маҳсулоти ғаллагӣ Ҳукумати Ҷумҳурии Тоҷикистон муайян мекунад.

**БОБИ 6**

**МУҚАРРАРОТИ ХОТИМАВӣ**

**Моддаи 18. Ҷавобгарӣ барои вайрон кардани Қонуни мазкур**

Шахсони воқеӣ ва ҳуқуқӣ барои вайрон кардани Қонуни мазкур мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.

**Моддаи 19. Тартиби мавриди амал қарор додани Қонуни мазкур**

Қонуни мазкур пас аз интишори расмӣ мавриди амал қарор дода шавад.

Президенти Ҷумҳурии Тоҷикистон                                                                                 Э.Раҳмонов

        **ш. Душанбе 28 июли соли 2006**

        **№ 200**

Пинҳон кардан
Таснифгар	Рақам	Ном	Мақомот	Сана	Ҳолат	Замима
ҚОНУН	200	ҚОНУНИ ҶУМҲУРИИ ТОҶИКИСТОН ДАР БОРАИ ҒАЛЛА	Маҷлиси Олии ҶТ	28.07.2006	Аз эътибор соқитшуда	WORD PDF ZIP

Primary tabs

^-A A ⁺A

Ноябр 2024

Дшб	Сшб	Чшб	Пшб	Ҷум	Шнб	Яшб
28	29	30	31	1	2	3

4	5	6	7	8	9	10

11	12	13	14	15	16	17

18	19	20	21	22	23	24

25	26	27	28	29	30	1

KHOVAR.TJ

АГЕНТИИ МИЛЛИИ ИТТИЛООТИИ ТОҶИКИСТОН «ХОВАР»
WWW.KHOVAR.TJ

«ХОВАР FM»

Садриддин Айнӣ (1878 – 1954): Адиб, олим ва асосгузори адабиёти муосири тоҷик. Аввалин Президенти Академияи илмҳои Ҷумҳурии Тоҷикистон. Муаллифи асарҳои «Таърихи амирони манғитияи Бухоро», «Таърихи инқилоби фикрӣ дар Бухоро», «Намунаи адабиёти тоҷик», «Дохунда», «Ғуломон», «Ёддоштҳо» ва дигар асарҳо, ки ба 29 забони хориҷӣ нашр шудаанд.
Бо фармони Президенти Ҷумҳурии Тоҷикистон Эмомалӣ Раҳмон аз 08 сентябри соли 1997 ба асосгузори адабиёти муосири тоҷик Садриддин Айнӣ унвони олии «Қаҳрамони Тоҷикистон» дода шуд.
Бобоҷон Ғафуров (1909 – 1977): Олим, академики Академияи Илмҳои ИҶШС, арбоби ҳизбӣ ва давлатӣ, муаллифи китоби оламшумули «Тоҷикон» ва зиёда аз 300 асару мақолаҳо.
Солҳои 1944-1946 котиби дуюм, с.1946-1956 котиби якуми КМ Ҳизби комунистии Тоҷикистон, 1956 – 1977 сарвари Пажуҳишгоҳи шарқшиносии ИҶШС.
Бо фармони Президенти Ҷумҳурии Тоҷикистон Эмомалӣ Раҳмон аз 08 сентябри соли 1997 ба таърихшинос ва шарқшиноси шинохтаи тоҷик, академик, муаллифи китоби «Тоҷикон» Бобоҷон Ғафуров унвони олии «Қаҳрамони Тоҷикистон» дода шуд.
Мирзо Турсунзода (1911-1977): Шоири халқӣ, раиси Иттифоқи нависандагони Тоҷикистон, Қаҳрамони меҳнати сотсиалистӣ, Раиси Кумитаи якдилии халқҳои Осиё ва Африқо. Барои достонҳои «Қиссаи Ҳиндустон»(1948), «Ҳасани аробакаш», «Чароғи абадӣ», «Садои Осиё»,(1960) «Ҷони ширин» (1963) бо ҷоизаҳои давлатии ИҶШС, ҶШС Тоҷикистон ва байналмилалии ба номи Ҷ. Неҳру (1967) сарфароз шуда буд.
Бо фармони Президенти Ҷумҳурии Тоҷикистон Эмомалӣ Раҳмон аз 07 майи соли 2001 ба шоири халқии Тоҷикистон, ходими намоёни ҷамъиятӣ Мирзо Турсунзода унвони олии «Қаҳрамони Тоҷикистон» дода шуд.
Эмомалӣ Раҳмон: Президенти Ҷумҳурии Тоҷикистон. 19 ноябри соли 1992 дар иҷлосияи XVI Шўрои Олии Ҷумҳурии Тоҷикистон раиси Шўрои Олии Ҷумҳурии Тоҷикистон, 6 ноябри соли 1994 бори аввал, солҳои 1999, 2006 ва 2013 Президенти Ҷумҳурии Тоҷикистон интихоб гардидаст.
Асосгузори сулҳу ваҳдати миллӣ-Пешвои миллат.
Бо қарори Маҷлиси Олии Ҷумҳурии Тоҷикистон 11 декабри соли 1999 барои мустаҳкам намудани давлатдории соҳибистиқлол ва пойдории сулҳ дар Ҷумҳурии Тоҷикистон бо унвони олии “Қаҳрамони Тоҷикистон” мукофотонида шудааст.
Нусратулло Махсум (1881 – 1938): Нусратулло Махсум (Лутфуллоев) ходими давлатӣ ва ҳизбӣ. Солҳои 1924-1926 раиси Кумитаи инқилобии ҶМШС Тоҷикистон, солҳои 1926-1933 раиси Кумитаи Иҷроияи Марказии ҶШС Тоҷикистон.
Бо фармони Президенти Ҷумҳурии Тоҷикистон аз 27 июни соли 2006 ба фарзанди барӯманди халқи тоҷик Нусратулло Махсум унвони олии “Қаҳрамони Тоҷикистон” дода шудааст.
Шириншоҳ Шоҳтемур (1899 – 1937): Ходими давлатӣ ва ҳизбӣ. Солҳои 1929-1931 котиби Ҳизби коммунистии ҶШС Тоҷикистон, солҳои 1933-1937 Раиси Кумитаи Иҷроияи Марказии ҶШС Тоҷикистон.
Бо фармони Президенти Ҷумҳурии Тоҷикистон аз 27 июни соли 2006 ба фарзанди барӯманди халқи тоҷик Шириншоҳ Шоҳтемур, унвони олии «Қаҳрамони Тоҷикистон» дода шудааст.