Соли 1978 факултети ҳуқуқшиносии Донишгоҳи миллии Тоҷикистонро бо дипломи аъло хатм намуда, дар ҳамон ҷо минбаъд ба ҳайси ассистент, дотсент ва профессори кафедраи «Ҳуқуқи соҳибкорӣ ва тиҷоратӣ» фаъолият намуд. Соли 1985 рисолаи номзадиро дар мавзӯи «Иҷрои мутақобилаи уҳдадориҳои шартномавии ҳуқуқи гражданӣ дар байни корхонаҳои сотсиалистӣ» ва соли 2000 рисолаи докториро дар мавзӯи «Проблемаҳои ҳуқуқии ноил шудан ба натиҷаи ниҳоии фаъолияти соҳибкорӣ» ҳимоя намуд. Санаи 15 июни соли 1987 бо қарори Кумитаи давлатии ИҶШС сазовори унвони илмии дот­сент ва соли 2010 бо фармони Хадамоти федералӣ оид ба назорат дар соҳаи маориф ва илми Федератсияи Россия сазовори унвони илмии профессор гардидааст. Аз соли 1985 то соли 1993 ба ҳайси муовини декани факултети ҳуқуқшиносӣ фаъолият намуда, соли 1994 мудири кафед­раи ҳуқуқи соқибкорӣ ва тиҷорати факултети ҳуқуқшиносии Донишгоҳи давлатии миллии Тоҷикистон интихоб шуда, дар ҳамин вазифа то соли 2000 кор кардааст.

 Соли 2000 Раҳимзода М.3. бо тариқи худпешбарӣ вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии № 9 ноҳияи А.Рӯдакӣ, интихоб шуд. Такроран соли 2005 вакили Маҷлиси намо­яндагони Маҷлиси Олии Ҷумҳурии Тоҷикистон аз ҳавзаи зикршуда интихоб гардид. Дар Маҷлиси намояндагони Маҷлиси Олии Ҷумҳурии Тоҷикистон профессор Раҳимзода М.З. ба ҳайси Раиси комиссияи Маҷлиси намояндагон оид ба назорати Дастур ва ташкили кор, муовини раи­си Кумитаи Маҷлиси намояндагон оид ба қонунияти конститутсионӣ, қонунгузорӣ ва ҳуқуқи инсон, роҳбари гуруҳи вакилони ғайриҳизбӣ, узви комиссияи доимии Ассамблеяи байнипарлумонии АвруОсиё ва намояндаи комилҳукуқи Маҷлиси намояндагон дар Суди конститутсионӣ фаъолият намудааст.

Профессор Раҳимзода М.3. зиёда аз 50 асар ва 250 мақолаҳои илмӣ, китобҳои дарсию васоити таълимӣ-методӣ инчунин илмию оммавӣ омода ва нашр намудааст, аз ҷумла: «Исполнение хозяйственных обязательств: (Встречное исполнение)»; «Правовые проблемы достижения конечного результата предпринимательской деятельности»; «Основы новейшей государственности»; «Ҳуқуқи соҳибкорӣ»; «Асосҳои давлат ва ҳуқуқи Ҷумҳурии Тоҷикистон»; «Ҳуқуқи гражданӣ» (қ.1); «Ҳуқуқи гражданӣ» (қ.2); «Конечный результат предпринимательской деятельности: теория и правовое регулирование»; «Общество, государство и право»; «Техникаи  қонунгузорӣ»; «Тафсири Кодекси мурофиавии иқтисодии Ҷумҳурии Тоҷикистон»; «Избранные труды по гражданскому и предпринимательскому праву»; «Фарҳанги русӣ ба тоҷикии истилоҳоти ҳуқуқ» ва ғайра. 

Таҳти роҳбарии ӯ даҳ нафар рисолаи номзадӣ ҳимоя намудааст.

Профессор Раҳимзода М. 3. Узви Шӯрои машваратӣ-илмии Суди Олии Ҷумҳурии Тоҷикистон ва Суди Олии иқтисодии Ҷумҳурии Тоҷикистон, Узви Шӯрои ҳимояи рисолаҳои номзадию докторӣ дар соҳаи ҳуқуқшиносӣ дар назди Донишгоҳи миллии Тоҷикистон, Институти фалсафа, сиёсатшиносӣ ва ҳуқуқи ба номи А.М. Баҳоваддинови Академияи илмҳои Ҷумҳурии Тоҷикистон ва Донишгоҳи русӣ-тоҷикӣ (славянӣ), Узви Шӯрои ҳимояи рисолаҳои доктории назди Донишгоҳи гуманитарию ҳуқуқии Қазоқистон (солҳои 2005-2007) низ буд. Соли 2010 профессор Раҳимзода М.З. ба ҳайси ҷонишини раиси Суди ҳакамии Маркази байналмилалӣ оид ба ҳалли баҳсҳои назди Суди иқтисодии Иттиҳоди Давлатҳои Мустақил интихоб гардид.

Сармуҳаррири маҷаллаи «Қонунгузорӣ», ҳамзамон яке аз муҳаррирони маҷаллаи илмӣ-амалии Федератсияи Россия «Право­вое поле современной экономики» ва «Осори академияи ВКД Тоҷикистон» низ мебошад.

Бо Фармони Президенти Ҷумҳурии Тоҷикистон аз 4 июни соли 2009, № 668 Директори Маркази миллии конунгузории назди Президенти Ҷумҳурии Тоҷикистон таъин карда шуд, ки то ҳол дар ҳамин вазифа фаъолият менамояд.

Раҳимзода М.З. бо мукофотҳои давлатӣ, аз ҷумла бо унвони фахрии Арбоби илм ва техникаи Тоҷикистон, Ордени «Иттиҳод»-и Ассамблеяи Байнипарлумонии Иттиҳоди Давлатҳои Мустақил, медали 20 солагии Истиқлолияти давлатии Ҷумҳурии Тоҷикистон ва ифтихорномаю медалҳои давлатӣ сарфароз гардонида шудааст.